Apostolo 5:32-40

³²Mehet hinhinawas bia a tutun kaiken ra linge. Ma no Halhaliana Tanuo i hinhinawas mah huo. Ma aie nong God i te tar ie ta diet ing diet taram ie.”

³³Ma bia diet ga hadade kaiken ga mis ira bala diet ma diet ga sip bia diet na bu bing ira apostolo.

³⁴Sen bia ga mon tiga Parisi, hinsana ne Gamaliel, tiga tena harausur ta ira harkurai tane Moses, ma ira matanaiabar diet ga manga urur tana. Ga taman tut aram ta ira matmataan ta ira kaunsil gaam tange hadadas bia da lamus hasur baak ira apostolo uras nataman.

³⁵Io, ga tange ta ira kaunsil hoken: “Kaba tunaan me Israel, muat na harbalaurai timaan ta ira linge muat wara gilgil ta kaiken ra tunotuno.

³⁶Muat lik leh Tiudas. A bar tinahon nalua ga hanuat ma ga hinhinawas haan bia aie tiga lualua. Aihat na maar dak ira tunotuno diet ga murmur ie. Iesen di ga bu bing ie ma diet ing diet ga murmur ie diet ga hilau harbasia ma no uno pinapalim ga linge bia.

³⁷Io, namur tana, Iudas me Galili ga tur huat tano pakana bung ing di ga waswas ira matanaiabar. Ma ga halawen leh tiga kaba matanaiabar wara murmur ie bia diet naga kap se diet me Rom ing diet kure dahat. Aie mah ga hiruo ma diet ing diet ga murmur ie diet ga hilau harbasia mah.

³⁸Io kaik, uta iakan ra purpuruan kaiken, iau pir muat bia waak muat gil ta linge ta diet. Muat waak se tar diet. Bia iakan ra mangana lilik bia iakan ra pinapalim i tahuat ta ira tunotuno mon, io, na pataam.

³⁹Iesen bia ing i hanuat meram ta God, muat pai tale bia muat na tigal diet. Iesen na hanuat palai ta muat bia muat harharubu ma ne God.”

⁴⁰Io, diet ga mur ira nianga ta Gamaliel. Diet ga tatau halaka ira apostolo, diet gaam tange bia da hadangat diet. Io, diet ga tar ra dadas na nianga bia diet pa na iangianga baling tano hinsa Jisas ma diet ga bale se diet bia diet na langalanga.