Apostolo 13:9-42

⁹Tec Saulu, taŋ sêsam eŋ teŋ gebe Paulu naŋ, Ŋalau Dabuŋ gêjam eŋ auc ma kêpuc mata tôŋ eŋ

¹⁰ma kêsôm gebe “Aôm Sadaŋ latu. Biŋdansaŋ to alôb-alôb gêjam aôm auc samucgeŋ, tec kôkêŋ kisa gêdêŋ biŋ gêdêŋ samob. Aôm gôjam Apômtaunê intêna solop ôkwi ŋapaŋ. Êndêŋ ondoc, go ôwi siŋ.

¹¹Ôlic acgom, galoc Apômtaunê lêma oc ênac aôm gebe matampec êsa ôlic oc êtiam atom e ŋasawa teŋ acgom.” Ma sep tageŋ ŋakanuc to ŋakesec kêkôm eŋ auc ma gesom lau kêlêsageŋ gebe sêkam eŋŋa.

¹²Gôliŋwaga gêlic gêŋ tonaŋ tec kêtakê kêtu Apômtaunê mêtêŋa e kêkêŋ gêwiŋ.

¹³Paulu to nê lau sêpi waŋ aŋga Papo ma sêlac e jasêsô Perge, taŋ gêc Pampulia naŋ. Go Joaŋ kêtaiŋ tau su aŋga êsêagêcnêŋ ma gêmu gêja Jerusalem.

¹⁴Sêwi Perge siŋ ma sêsêlêŋ e sêô lasê Antiokia Pisidiaŋa. Gêdêŋ sabat sêsô Judanêŋ lôm jasêŋgôŋ.

¹⁵Lômmôkê sêsam Mosenê biŋsu to propetenêŋ biŋ lasê su acgom, go sêsakiŋ biŋ gêdêŋ êsêagêc gêja gebe “O lasitêwaagêc, biŋ êpuc lau tôŋŋa embe ênêc amagêcŋa, go asômmaŋ.”

¹⁶Tec Paulu gêdi sa gêjab lêma êsêac ma kêsôm gebe “O Israelwaga to amac, taŋ atêc Anôtô naŋ, akêŋ taŋem acgom.

¹⁷Lau Israel tonec nêŋ Anôtô kêjaliŋ tameŋi sa ma ketoc lau tau sa gêdêŋ taŋ sêŋgôŋ nom jaba Aiguptu naŋ, go gêôc lêma sa ma gêwê êsêac aŋga tonaŋ sêsa sêja.

¹⁸Ma gêlôm êsêac sêmoa gamêŋ sawa kêtôm jala 40.

¹⁹Go geseŋ nom Kanaan ŋalaum 7 su ma gêjac sam ŋagamêŋ tau gêdêŋ êsêac sêwê kaiŋ,

²⁰kêtôm jala 450. “Tonaŋ su, go kêkêŋ gôliŋwaga gêdêŋ êsêac e gêdêŋ propete Samuel nê têm.

²¹Gêdêŋ ŋasawa tonaŋ teteŋ kiŋ e Anôtô kêkêŋ Kis latu Saulu aŋga Benjaminnê gôlôac kêtu nêŋ kiŋ kêtôm jala 40.

²²Go kêsap eŋ tulu ma ketoc Dawid sa kêtu nêŋ kiŋ. Anôtô gêwa ŋac tonaŋ sa amboac tonec gebe ‘Aê katap Isai latu Dawid sa, naŋ ŋoc ŋalêlôm galic eŋ ŋajam. Eŋ oc êŋgôm aêŋoc biŋ samob êtu tôŋ.’

²³Aŋga ênê wakuc Anôtô kêkêŋ kêsiwaga Jesu gêdêŋ lau Israel kêtôm gêjac mata.

²⁴Jesu kêtu awê atomgeŋ, ma Joaŋ kêsôm mêtê lasê gêdêŋ lau Israel samob kêpi busaŋgu sênam tauŋ ôkwiŋa.

²⁵Kêdabiŋ gebe Joaŋ ênac mata nê koleŋ ma kêsôm gebe ‘Amac abe aê asa. Aê ŋac tau, taŋ asaê amoa naŋ atom. Alic acgom, ŋac tau oc êndaŋguc aê ma aê katôm gebe janac pêla ênê atapa ŋalêkôŋ atom.’

²⁶“O lasitêwaac, Abraham latui amac ma amac lau, taŋ atêc Anôtô naŋ, Anôtô kêsakiŋ biŋ moasiŋŋa tonaŋ gêdêŋ aêac.

²⁷Lau taŋ sêŋgôŋ Jerusalem naŋ, to nêŋ laumata sêjala Jesu tônê to propetenêŋ biŋ, taŋ sêsam kêtôm sabatgeŋ naŋ atom. Mago sêkic ênê biŋ, tec sêgôm biŋ tau ŋanô kêsa.

²⁸Êsêac têtap ênê keso enseŋ eŋ suŋa teŋ sa atom, mago teteŋ Pilata gebe ênac eŋ êndu.

²⁹Êsêac sêgôm biŋ samob, taŋ teto kêpi eŋ naŋ, ŋanô kêsa su acgom, go sêkôc eŋ su aŋga ka jatetoc eŋ gêc sêô.

³⁰Go Anôtô gêŋu eŋ sa aŋga ŋacmatênêŋ.

³¹Bêc taêsam eŋ geoc tau lasê gêdêŋ êsêac, taŋ sêwiŋ eŋ aŋga Galilaia sêpi Jerusalem sêja. Ma lau tau tec galoc sêwa eŋ ŋam sa gêdêŋ lau sêmoa.

³²Ma aêac asôm ŋawae ŋajam, taŋ Anôtô gêjac mata gêdêŋ tameŋi naŋ, lasê gêdêŋ amac.

³³Ma biŋ tau Anôtô gêgôm ŋanô kêsa kêpi êsêac latuŋi aêac, gedeŋ taŋ gêŋu Jesu sa, kêtôm biŋ, taŋ teto gec Pesalem kêtu luagêcŋa gebe ‘Aôm kôtu aêŋoc Latuc, galoc katu aôm Tamam.’

³⁴Anôtô gêŋu eŋ sa aŋga ŋacmatênêŋ, gebe ôli êtu palê atomŋa. Eŋ geoc biŋ tonaŋ lasê kwanaŋgeŋ ma kêsôm gebe ‘Aê gabe jakêŋ Dawidnê gêŋ dabuŋ to ŋaŋêŋ tau êndêŋ amac.’

³⁵Ma kêsôm ŋagêdô gêc madiŋ teŋ gêwiŋ gebe ‘Aôm oc ôkêŋ nêm ŋac dabuŋ ôli êtu palê atom.’

³⁶Gebe Dawid tê gêjam sakiŋ kêtôm Anôtônê biŋ gêdêŋ tau nê launêŋ têm, go gêc nê bêc ma sêsuŋ eŋ gêwiŋ tamai ma ôli kêtu palê.

³⁷Ma ŋac, taŋ Anôtô gêŋu eŋ sa naŋ, ôli kêtu palê atom.

³⁸O Lasitêwaac, amboac tonaŋ ajala tonec êwiŋ acgom. Aêac asôm lasê êndêŋ amac gebe Anôtô kêsuc sec samob ôkwi kêtu ŋac tônêŋa. Samob taŋ sêkêŋ êwiŋ eŋ naŋ, têtu lau gêdêŋ. Mosenê biŋsu êtôm gebe enseŋ aêacnêŋ sec su e tatu lau gêdêŋ nec atom.

⁴⁰Amboac tonaŋ alic taôm gebe biŋ, tec propete sêsôm nec, êtap amac sa atom

⁴¹gebe ‘Amac aseŋ-biŋwaga alic acgom, oc aŋac lemem, mago anaŋa, gebe êndêŋ amacnêm têm aê oc janam ŋoc kôm teŋ. Embe sênac kôm tau ŋamiŋ, oc akêŋ êwiŋ atom.’”

⁴²Ŋac ulu sebe sêsa awê sêna ma lau teteŋ êsêagêc gebe êndêŋ sabat teŋ sêsôm biŋ tonaŋ ŋagêdô êndêŋ êsêac êtiam.