Aposotolo Adi Hewau 13:9-42

⁹Arinai abo Saulo (esana hinage se torebui Paulo) Earua Tabuna i monau, i itadidini,

¹⁰i ene, “Oa tauboraborasom, baaea gamagamagari u monau boriboriri, oa diabolo natuna, laulau‐dudurai gamagaridi u hewaiunuedi, Guiau ena laulau‐dudurai oa u hegegewaridi, nige u lautom wa?

¹¹Arinai u ita, Guiau nimana potam eai ie tore, oa matam sora abo se gibu, mahana taba nige u ita i lau e, huiana sora.” Ma esega gau eo masigiri i hearo; i heoheodamumuliei bena headi se abinimaei abo se woeai se laei.

¹²Gavana wa wau laulau ie ita, arinai abo i awamamohoi Guiau ena riba i nooei.

¹³Paulo edi pele Papo se laugabaei, abo se lage Perega Pamepulia tehana eai: Ioane i laugabaedi ie uio Ierusalema eai.

¹⁴Isi abo Perega se laugabaei, se lage Anetioka Pisidia tehana eai, sabati esau se lau sunago alona eai se bawabigabiga.

¹⁵Laugagaeo eo peroveta edi buka se hasiri lautom, sunago tanuagadi headi se hetamaridi se lau aridi eai si ene, “Tatao e, eo ema tataoyao e, ena riba headidiri esau au nuatui tatao enadi, au ribaei aridi eai.”

¹⁶Arinai abo Paulo i toro, i nimaoiedi, i ene, “Isaraela tataomiu e, omi Eaubada matausina taumatausi, au ataiei komakomani.

¹⁷Teina Isaraela tataodi edi Eaubada tamadayao i abi‐hinehineridi; nei huiana ne Aigupito eai se mia doha laolaoma tataodi, ia i hedebasaedi eo i woeaidi i laedi murimuri eai ia nimana gigiborina eai.

¹⁸Borimai tatao‐labui‐se‐mate ia barabara eai i bobodiedi.

¹⁹Kanana eai eanua haligigi‐labui i hebaaeaheohidi, edi eanua kelero eai abo i soi enadi.

²⁰Abotai abo borimai handere‐hasi eo tatao‐labui‐se‐mate‐saudoudoi tau‐hedudurai i mosedi i lau e Samuela peroveta huiana eai.

²¹Isi se henua bena edi wasawasa se hetoro: arinai Eaubada Saulo Kiso natuna abo i mosei aridi eai, tau wa Beniamina bogana, i lau e ena borimai tatao‐labui‐se‐mate.

²²Eaubada ia i abihaiuioi na Davida abo i hetoro isi edi wasawasa eai ie lau; ia arinai hinage ie riba, i ene, Davida, Iese natuna, ea italobai ia nuagu i lauei ede; eau egu nuatu gamagaridi ta ia abo i abiwataidi.

²³Doha i ribahesunumadio, tau ta tumanayao aridi eai, Eaubada esau abo i hetoro Isaraela aridi eai Tauabihemauridi, ia ede Iesu.

²⁴Ia sora nige i laoma, Ioane Isaraela gamagaridi henuabui bapatisona i guguiabagunaidio.

²⁵Ioane ana paisoa i abiheohi, abo i ene, ‘Omi au ene eau eai? Eau nige ia. Na esau murigu eai i laoma ia aena umna bena ea eairi, nige ea lolo.’

²⁶“Tatao e, eo egu tataoyao e, boga Aberahama nanatunayao, Eaubada matausina tau‐matausi teina mauri ribana ta se hetamariawa omi enamiu.

²⁷Isi Ierusalema taumiaidi, eo adi tanuagao hinage, ia nige se nuatui, eo peroveta gamagaridi ribadi sabati gamagaridi se hasiridi nige se nuatuidi, arinai ede Iesu se hegiru, ribadi we se hemamohoi ede.

²⁸Isi ia ana matapaana nige se lobai, edi nuatu mo Pilato arinai ia bena se unui.

²⁹Riba gamagamagari se uri nonohaidi wa isi se hemamohoiedi, arinai abo oeagi ewana eai se taruhi dobeyama, bousa alona eai se tore.

³⁰Ia mate eai Eaubada i hetorouioiama.

³¹Isi maenayao Galilaia eai se saema Ierusalema, asubena gamagamagari ia se itaitai eo isi tatao enadi tau‐ribahemasaraha.

³²Kode wasana ai ribahemasaraha omi arimiu eai, doha tamadayao aridi eai se riba hesunumaedio wa,

³³Eaubada nei ribana i hemamohoiyama ita nanatudiyao arida eai, doha Iesu i hetorouioi; doha hinage se uriyao Buka Vana peina helabuiana eai, si ene, ‘Oa Natugu ede, teina asubena eai ta ea awatamaem’ (Psa. 2.7).

³⁴Ia i mateo, na i hetorouioi, taba nige i posauio, ina doha ena ribariba, i ene, ‘Davida ena aba‐helolodaoina abo ea leawa enamiu.’ (Is. 53.3)

³⁵Arinai hinage Vana esau eai, i ene, ‘Oaem Hetabu Tauna u nuanuaiei ia taba nige i posa’ (Psa. 16.10).

³⁶Paana ede Davida, ana isi i saguidi Eaubada ena nuatu debana eai, ia abo i tubahai, se tore‐esagaidi ma tamanayao, ia abo hinage ie posa:

³⁷na ia, Eaubada i hetorouioi wa, nige i posa.

³⁸Tatao e, eo egu tataoyao e, omi abo au ita, wau tau wa debana eai baaea ribagigirina se guguiaimiu:

³⁹ia debana eai hinage tauataiena gamagamagari se dudurai ginauri gamagamagari aridi eai doha nige au dudurai Mose ena laugagaeo debadi eai.

⁴⁰Arinai au itakomakomani ata meta peroveta se ribaeyao wa au hearo; i ene,

⁴¹‘Iei, omi tauhalanuinui, abo au noo, eo au tatagorigori: emi asubenadi eai paisoana ea paisoa, ena tau esau paisoa wa i riba hasahasaimiu taba nige au nuatui.’”

⁴²Iudea tataodi sunago eai se pesao, abo Murimuri‐tataodi headi se awanorini si ene, “Sabati esau matada eai bena ina riba ta u ribauioidi.”