Aposole 9:18-41

¹⁸Dopa leamopa baanya lenge dolaponya kanopato kombangele mendapua siamo dupa lee mendai taka lala peamopa baa dee lenge tea-pyaa. Lenge tapala sakatao katapeamopa baanya kaimbu pyakamaiya-pyaa.

¹⁹Baa nee nao pupu latala Damasakosa yuu dokonya masoo miningi endakali dupa-pipa awapa kote mendatupa kateami-pyaa.

²⁰Dokopa baame Jutamanya losuu anda dupanya yapa pupala Jisasa baa Gote Ikiningi doko lamona lao pii lamaiya-pyaa.

²¹Endakali pitakame pii lamaiyamo dupa soo mona andapala lao pituu, “Wamba Jetusaleme katao Jisasa lao loma singi endakali dupa minao koyasiamo akali doko doko taa aipape? Indupa endakali dupa anjetala pitisa mupa dupa-kisa laminao patona lao lao angenya epeamo akali dokoaka taa aipape?” leami-pyaa.

²²Solome pupu lapae tumbi lao nyepala Jisasa baa Kataisa dokona lao lamaiyokondape piamo dokome Juta endakali Damasakosa kateamino dupanya pii doko angi nanjia-pyaa.

²³Kote longo pateamopa Juta dupame baa pyao kumasemana lao pii wasiami-pyaa.

²⁴Pii wasiamino doko Solome sia-pyaa. Dokaitame baa pyamana lao yuu taono dokonya lome kambu dupanya mendenya epelyape lao kuka kotakapi isoo kateami-pyaa.

²⁵Isoo kateaminoaka doko, kuka mendenya Solonya pii singi endakali dupame tatali mandi mendenya baa mandipala mandyuu kana kame dokonya kamalyatena pyandemi-pyaa.

²⁶Solo baa Jetusaleme dokonya pupala, masoo miningi endakali dupa-pipa awapa katamana lao masiamopa dokaita pitakame baame masoo minala naengena lao masetala paka kayami-pyaa.

²⁷Dokopa Banapasame Solo lanyepala laminao aposele dupa kateamino dokonya pea-pyaa. Pupala Solome Kamongo doko kaitinisa kandeamo dokopi, Kamongome baa pii lamaiyamo dokopi, Damasakosa katao Solome Jisasanya kenge doko lao pii pupu lao leamo dokopi dutupa baame dokaita lamaiya-pyaa.

²⁸Lamaitiamopa aposele dupa-pipa Solo awapa Jetusaleme yuu dokonya pata ipata pyoo kateami-pyaa. Kamongonya kenge doko lao baame paka nakayao pii panao lamaiyoo katea-pyaa.

²⁹Baame Juta endakali Gitiki pii lenge dupa pii lamaiyoo dupa-pipa pii yanda pyoloo pyoo kateamopa dupame baa pyamana lao makande pyoo kateami-pyaa.

³⁰Pyalanya piamino doko kandatala masoo miningi kaiminingi dupame baa Sisatia yuu taono dokonya laminao lanatala Tasasa yuu taono ongonya pena leami-pyaa.

³¹Dokopa sosa Jutiapi, Galiliapi, Samatiapi yuu dupanya kenda pipaepi mende naipao epe yuu yongea-pyaa. Ongopa sosanya endakali dupame pupu lapae epe nyoo katao Kamongo lao paka kayao payami-pyaa. Oli Sipitisa dokome endakali mendapua nisetala sosa dokonya nyoo konda peta peta pia-pyaa.

³²Pita baame Jutamanya yuu doko pitakanya kandama-kandama pao Lita yuu taono dokonya pyakanatala Gotenya endakali kateamino dupa kandea-pyaa.

³³Yuu dokonya baame akali Ainiasa lenge mende kandea-pyaa. Akali doko papa tambotae ee kana tukulapo tokonyaka paliuu singi-pyaa.

³⁴Pitame baa lamaiyoo, “Ainiasa, emba Jisasa Kataisame auu pisilyamo. Emba sakatatala embanya palenge toko doko lakao yaki pii,” lea-pyaa. Dopa lalu piamopa baa sakatea-pyaa.

³⁵Lita tangepi Setone tangepi dupa pitakame akali doko kandeami-pyaa. Kandatala Kamongo lao mona kapilyetala masoo miniami-pyaa.

³⁶Jopa yuu taono dokonya masoo miningi enda Tapita lenge mende petea-pyaa. Gitiki pii lengeli pyoo baa kenge Dokasa lengema-pyaa. Baa-kisa mana epeme tumbilyamopa baame endakali daa jingi dupa oapi maiyoo petenge-pyaa.

³⁷Yuu mende baa yaina nyepala kumia-pyaa. Endakali dupame baa wasawasa pyapala anda namba pyoo petae palo kisa mendenya seteami-pyaa.

³⁸Jopa yuu doko Lita yuu dokonya tengesale joo siamosa masoo miningi endakali dupame Pita baa Lita yuu dokonya kalyamo lapae sepala akali lapomame Pita pii kyoto joo lamaiya pena lao lao pituu, “‘Embame malisala nayao naimanya yuu dakenya yapa ipupi,’ lena,” leami-pyaa.

³⁹Pita sakatatala dolapo-pipa awapa peami-pyaa. Pao yuu dokonya pyakaneaminopa dupame baa nyakamanya anda namba pyoo petae palo kisa dokonya laminao kolandeami-pyaa. Dokopa enda walyakae pitakame ee lao pituu lapalapapi kolosapi dupa enda Dokasa lenge dokome nyakama-pipa pituu wasakamaiyamo dupa Pita kandena lao minao malandao kakopeami-pyaa.

⁴⁰Kakopeaminopa Pitame dupa pitaka kamaka pena latala lumame pitipala loma sia-pyaa. Loma setala kapilyetala enda kumapae siamo doko lamaiyoo, “Tapita, emba sakata,” lea-pyaa. Dopa leamopa enda doko lenge tea-pyaa. Baame Pita kandatala sakatao petea-pyaa.

⁴¹Pitame kinginya minao toya katasetala Gotenya endakali dupapi enda walyakae dupapi dupa epena latala enda sakateamo doko dupame kandena lao laitaka pia-pyaa.