Waiwia 9:18-41

¹⁸A madan likamata un en mam akai, me pupedi jan ni maj a, i ari kilanadar waja o udar paptaijelar.

¹⁹I lao manaer, ap kelailadar, ap mimieta ren tounpadak en Damajkuj akan ran akai.

²⁰A madan padapadak nan jinakoke kan duen Iejuj, me i japwilim en Kot.

²¹A karoj, me roneron i, puriamui kila indada: Kaidin i, me kin kaokaoe ir, me kin likwir on mar wet nan Ierujalem o kodo waja et, pwen jali ir edi, kalua ren jamero lapalap akan?

²²A Jauluj me manaman kokoda o kapinada Juj oko, me kaujon Damajkuj ni a kawewedar, me i me Krijtuj.

²³Kadekadeo murin ran toto Juj oko kapun pena en kamela i.

²⁴A Jauluj roner, me re majamajan i; irail pil majamajan wanim akan ni ran o ni pon, pwen kamela i.

²⁵A tounpadak kan ale i ni pon apiekidi kopou eu jan pon kel o.

²⁶A Jauluj lao pwara don Ierujalem a jojon waroki on tounpadak kan, irail karoj majak i, pwe irail jota kamelele, me i tounpadak amen.

²⁷A Parnapaj ale i o kare don i ren wanporon akan, o katiti on irail, duen a kilanadar Kaun o nani al o, o me a kotin majani on i, o duen a jo majak padapadaki ni mar en Iejuj nan Damajkuj.

²⁸I ari ian irail er kotin pedepedoi jan o pedepedelon on nan Ierujalem o padaki aima ni mar en Kaun o.

²⁹I o men Krik kai majan o akamai pena, a re jon kamela i.

³⁰Jaulan kan lao ajaer, ap ian i kolan Jäjarea, ap kadaralan i Tarij.

³¹A momodijou kan ap popol o pwaidar nan Iudäa, o Kaliläa, o Jamaria, o re weweid ni majak en Kaun o, o toto kilar popol en Nen jaraui.

³²A Petruj lao kakan jili nan jap akan, a pil kotila ren me jaraui kan, me kaukaujon Lida.

³³A diaradar aramaj amen waja o, me ad a Äneaj, me wonon par walu, pwe me kokon danidan.

³⁴Petruj ari majani on i: Äneaj. Iejuj Krijtuj kakel uk ada. Paurida, pein lim pena ki om! I ari paurida madan.

³⁵A karoj me kaukaujon Lida o Jaron, kilanada i, re ap wuki on Kaun o.

³⁶A tounpadak li amen mi Ioppe, me ad a Tapea (iet wewe: Torkaj), i me dir en wiawia mau kan o kijakij wei.

³⁷A kadekadeo ni ran oko a jomaudar o melar. Irail lao duper i, ap nekidala nan pera poa.

³⁸A Lida me koren ion Iope. Tounpadak kan lao roner, me Petruj kotikot waja o, rap kadarala ol riamen re a, poekipoeki: Kom der peikajal, koti don kit!

³⁹Petruj ari kotida ian ir ala. I lao pwarado, re ap ukadala i pera poa, o li odi karoj u impa, janejan o kapwareda jakit o likau kan, me Torkaj wiadar ni a mimi re ’rail.

⁴⁰A Petruj kiiei jan ir karoj, ap kelepuki kapakap, ap jaupei on kalep o majani: Tapea, paurida! I ari pad pajan, kilanada Petruj, ap modadar.

⁴¹I ari koledi pa a, kauada i. A lao eker pena me jaraui o li odi kan, ap kajale on irail i a maureda.