Aposole 22:2-9

²Baame Iputu pii lao lamaiyamo doko sepala endakali kateamino dupame pii kukipi mende naleami-pyaa.

³Dokopa Polome lao pituu, “Namba Juta daape. Nambanya endangimi namba yuu Silisia dokonya taono Tasasa lenge dokonya mandea. Namba taono Jetusaleme dakenya katao akali jio. Akali Gamaliele lenge dokome naimanya yumbange dupanya mana makandepi dupa pitaka namba langyokondape pyoo langiamopa mana nyio. Dopa petala nambame mana setapae dupa minao Gote watao nyakama paelyamino dopaka pyoo paelyona lao masoo payo.

⁴Enda akalipi Jisasanya pii manapi watao miniamino dupa wamba nambame kumina lao minao etete koyasio. Nambame dokaita anjetala anjingi andaka pyandewaka.

⁵Pitisa mupa dokopi isingi akali dupanya kanjole dupa pitakapimi kalai pio doko kandeamino kapa pao lapenge. Damasakosa yuu dokonya katenge Juta dupa maipi lao pepa pyao namba ditiaminopa Jisasanya pii manapi watao miningi endakali Damasakosa kateamino dupame Jetusaleme dakenya ipupala tanda nyina lao anjoo nyala peo.

⁶“Nambame Damasakosa yuu dokonya paanya tengesa joo peopa kotakale pupae lao tii pipae andake mende kaiti-kisa tae ipupala namba-kisa tii piyoko lea.

⁷Dopa piamopa namba lombapae soo pituu siopa pii mende leamo dokome, ‘Solo, Solo, embame aipuma namba watao pilipi?’ lea.

⁸Dopa leamopa nambame lao pituu, ‘Kamongo, emba apipi?’ lao pisio. Dokopa baame namba langyoo, ‘Namba Jisasa Nasatete tange embame watao pyao kalyeno dokona,’ lea.

⁹Akali namba-pipa awapa peamano dupame tii pipae doko kandeami. Dopaka doko, pii mende namba langiamo doko dupame nasiami.