APOSETOLO EDIA KARA 19:10-21

¹⁰Laḡani rua unu e kara tomava; taunabunai Asia tanona ai e nohova taudia, Iuda taudia bona Helene taudia, iboudiai ese Lohiabada ena hereva e kamonaiva.

¹¹Siahu karadia hereadia danu Dirava ese Paulo imana amo e karava;

¹²taunabunai muko bona rami Paulo tauna ena amo e laohai, gorere taudia dekediai, bena edia gorere vada e doko bona lauma dikadia ese e rakatanidia.

¹³A Iuda taudia haida, vaia lauma dikadia ilulu-ohodia karadia e loalaiva taudia, ese Iesu ladana e hatoa matama, lauma dikadia ese e bolodia taudia latadiai, eto, Paulo ese e harorolaia tauna Iesu ladana ai a haḡanimuimu.

¹⁴Skeva, Iuda tauna bona hahelaḡa tauna ta, natuna mamaruanedia hahituosi unu e kara tomava.

¹⁵Bena lauma dikana ese e haere henidia, eto, Iesu na mai dibagu, Paulo danu dibagu, a umui be daidia?

¹⁶Bena hari lauma dikana ese e boloa tauna na idia latadiai e roho kau, e hadareredia bona e dadabadia, ela bona idia na una ruma amo e heau lasi, asi dabuadia bona mai berodia ida.

¹⁷Iuda taudia bona Helene taudia Efeso ai e nohova ese harina e kamonai, bena gari ese iboudiai e butudia tao. Iboudiai ese danu Lohiabada Iesu ladana e imodaia.

¹⁸Bona kamonai taudia hutuma danu ema, edia kara e gwaurai hedinarai;

¹⁹bona babalau taudia dia gagadoi edia buka e habou, taunimanima iboudiai vairadiai e gabu. Buka davadia e hagau, davadia silver monidia gerebu ima.

²⁰Taunabunai, Lohiabada ena hereva vada e vara rohorohova bona e kwalimuva.

²¹Una murinai Paulo lalona e hadaia, Makedonia bona Akaia tanodia amo baine raka hanai, bena Ierusalem bainela. Eto, Unu bainala guna, gabeamo Roma baina ha itaia.