Aposel 13:1-21

¹Udu bolo iri lau atehei budon tiri handru in ta Kindrei badu Antiyok badeh, iri propet rayah, ma hawe iri lau ta leheya rayah ale ado aliy. Nyara oro badeh, Banabas, Simiyon iri aloh iy Nijer, Lusiyus badu Sairini, hawe Mana-en iy mene asahan kawas ta kabin Herot na len iy atondrok kon, ma hawe Sol.

²Ya eme oro atudun Laban hawe abeles oro ta nyamon ili badeh, ma Malawin Ndrabun anya, “Ado katehei Banabas uru Sol badeh, kare len ta amekes lahou tek mene jo aloh uru kamekes.”

³Ya oro abeles oro ta nyamon ma salom ano, oro adeu lim i la-u uru, ano suni uru ma la-uh au.

⁴Eme Malawin Ndrabun suni uru lau ma la-uh doh au ala andri ala kon Selusiya, akohok ndron, ma alakak au ala busu Saipres.

⁵Uru ala asos kon Salamis badeh, oro asehek sahou ta nyala Kindrei udu ndrahu tukum tiri Juwis. Ya Jon udu hawe uru, buku ta aseben uru.

⁶Oro badeh, adek awudi busu udu ranah ili taku ranah, ma oro asos kon iri aloh Papos. Eme udu loboho doh badeh, oro ndruni ndramak ari badu Juwis, iy tan balik udu aliy, ma iy wasai iri lau anya, iy propet, nyaran Bajises. I boho Grik badeh, iri aloh iy Elimas, moson, iy ndramak ta balahak. Iy badeh, kawas ta Sejiyus Polus ndramak ta atondrok busu doh. Ma Sejiyus badeh, tanan tan ili labai. Eme iy tiye Banabas uru Sol ame, tasah iy anya kanuhun sahou ta Kindrei. Arile, Elimas badeh, tebelese hawe Sol uru Banabas, tasah iy anya kamekes Sejiyus satehei budon tan handru sala ta Jises.

⁹Arile, nyara Sol ari ja badeh, Pol, iy idih na boto-on ta Malawin Ndrabun, anyolom boto-on i ta Elimas, ma iy tiye i tan anya,

¹⁰“Ou badeh, nadu balik amwenen, ma ou badeh, baseken kandriyen mwasin mari bwe! Ou adah labai na kandriyen ta wasai ta balik. Ya, ma saba len kameh ou aruwe ta tobolowe sahou handru ta Laban kasahan wasai?

¹¹Na le dah kameh, boto-on ta Laban kameh edeu maha-an ewek la-um, ya idah kameh, ou winiyan banyolom kon bwe, winiya le len ta aliy barasahan.” Eme na le liliy badeh, Elimas atona lakou bokodon eme tubuluhi madan ilik, ma iy sokorokar lau ta sariye iy na lim.

¹²Eme ndramak ta atondrok busu anyolom badeh, ma bohon asak ta leheya turu ta nyala Jises, ma iy atehei budon tan handru i ta Laban.

¹³Eme Pol hawe uru lau badu hawen ruwani Papos, ya oro alakak au ala kon Pega. Pega doh udu bolo kon munyak tinan Pampiliya. Udu doh badeh, Jon ruwani uru ma iy iu i hamon ili Jerusalem.

¹⁴Ano Banabas uru Sol ado Pega ala Antiyok, kon udu loboho Pisidiya. Eme na len ta amunyau, uru ala ndrahu atukum tiri Juwis, ma uru manyah ado aliy.

¹⁵Udu hamon ta iri anuhun sahou aloh badu bolo batanau malen, hawe boho iri propet ano badeh, iri lau ta atondrok ndrahu atukum, suni sahou i turu anya, “Nadu tine ahi, i buku none ah sahou ta batanau ahi badeh, ah kasehek ai.”

¹⁶Eme Pol ales udu loken edeu minen i loken amunum le ma anya, “Ado lau badu Isra-el, hawe ado lau badu leheleh, ado ta atudun Kindrei, ado kanuhun bohok!

¹⁷Kindrei tiri lau badu Isra-el badeh, tiye tama taha iri ma mesekei iri asahan tinan labai, udu bolo len mene iri manyah ado Ijip, ano na le boto-on ta Kindrei, iy andrei iri ado bolo kon Ijip ame len.

¹⁸Ma na bolo jaha hanoh (40) badeh, iy bwese maha-an ta kandriyen tiri ado kon lomale an.

¹⁹Kindrei badeh, tikahei oro kon tinan ma ndro taloh ado munyak Kenan au, ma iy atehei munyak toro i tiri lau tan amwenen.

²⁰Iri lakou doh asahan udu bolo jaha ma hanek lomonoh (450). “Ano udu hamon ta idoh badeh, Kindrei atehei tiri, iri batun ta atondrok iri eme eme taku, ta Samuwel asahan propet tiri.

²¹Ano iri aseken tiri ari kabin, ya eme iy atehei Sol asahan kabin tiri. Iy badeh, nadu Kis, asahan ta lundriye Benjamin. Iy atondrok kon badeh, jaha ma hanoh (40).