Acts 13:1-21

¹Kerisiana au Antiok au orai peroveta ma taugiu wavai wenanare, Barnabas, Simeon (e ḡoreḡorei Gawara), Lusias Sairiniei, Manaen (Tauna gulau Herod Antipas maiteni i rata tagogi), ma Saul.

²Mara tagogi maranai taui i ujiuji ma Bada i vovoepaepai ma Arua Vivivireina i riwa i pa, “Tau, Barnabas ma Saul a vinei, ona tereriei au nola aubaina.”

³Anina ma uji ma pari au murina taui urai Barnabas ma Saul au tepai i terei ma God ruaḡai i viaiaini ma i paritawanei.

⁴Ma Arua Vivivireina Barnabas ma Saul i paritawanei da i ḡaira au Selusia ma kampa i amkuka damana au bonabona Saipras.

⁵Ma au Salamis i ḡota ma i nae mai Jew ai au boru numana ma God riwana i raugugulei. John-Mark taui maiteni i nae da ai tauagu.

⁶Taui bonabonana i kwaviviroi da au Paphos taon i ḡeta. Weka Jew ei barabaravuna ma peroveta morumoruna i nebelei wavana Bariesu. Tauna bonabonana ana gavena Segius Paulus i vituranei, Segius Paulus rava nualaulaunana ma i ḡoei da God ana babani ita nonori ma lamna aubaina Barnabas ma Saul i rauḡoreiai.

⁸Wate barabaravuna Bariesu (Greek ponanei lamna Elimas) Saul ma Barnabas i viḡaviei da gavena ana tumaḡana ita viapoapoeni.

⁹Saul wavana ḡelauna Paul, Arua Vivivireina orana i oai ma barabaravuna matana i ʼnana-tunutunui.

¹⁰Ma i pa “Tam Satan natuna ma kaua aiaii ma jijimani tauviapoapoenina! Tam morumoru kaukauam ma gwalagwalamerum. Ma amapo da Bada ana kaua ma voviravirai da moru.

¹¹Ma marina Bada urana ina kovoḡim da matam ina apoapoe mara aburuna ma eḡa madeḡa lalalaina ma inanai.” Maratagogi matana i vinawanawa ma i gimtona ma nare da were i voladaḡa-nae da rava au urana ita vojijina.

¹²Maranai gavena i ʼnanai aiwai i tupua ma i vitumaḡana, aubaina tauna Bada ana viararamana i bana-kauei.

¹³Paul ana rava maiteni Paphos i voterei ma i amkuka damana au Perga taon au Pamphilia provins, Ma weka John-Mark taui i voterei ma i naeme au Jerusalem.

¹⁴Perga i voterei ma i rui da au Antiok taon au Pisidia provins. Ma au Sabate i rui au boru-numana ma i kiala.

¹⁵Ma rava ḡelaui, Moses ana tarawatu bukana ma peroveta ḡelaui ai buka i ʼavi, ma babada riwa i paritawanei Paul ma Barnabas awari i pa, “Varevareiu! Mepa da awarimi nota aiwai da ota voaguiai lamna marina ona ḡei da ona babaniei.”

¹⁶Paul i vomairi ma urana i voepai da rava i genuana ma babani i vikarei i pa: Mai Israel ma taumi eḡa mai Jew ai God tauviborumeina, ona rautaniḡaneu!

¹⁷Mai Israel ai God noinoita i vinei, ma i vimaurai ai au mae au Egypt, ma ana rewapana ḡaeḡaenei dobunei i taravaina-opunei.

¹⁸Madeḡa 40 au mutulua ami kaua apoapoei ami beura ma ami gunura anatapui am-iauei.

¹⁹Dam ḡaeḡaei 7 i vipupui au Canaan ma dobuna mai Israel i verei da i viḡariana-nonoei.

²⁰Wei anatapuna madeḡa 450 au orana i tupua. Wei au murina God taurauetara i terei da taui i vibadei da peroveta Samuel ana mara.

²¹Anina ma rava God i vibaḡai da gulau ita verei. Ma God Saul, Kish natuna Benjamin ana damei i terei; ai gulau da madeḡa 40 i kwa.