Mantá Tanla 13:1-21

¹Junni Antioquíabi Jesucrístochi tsachila tala Bernabé, Simón, Lucio, Manaén, Saulo mantá tan jominlanue. Aman Simonca tensaato mumun Pabacán timin jominlanue; Lucio, ya Cirene tobi nechi tsachi jominue. Manaenni miya Heródechi aco cuwenta jominue. Inlari weyanla micarimin, weyanla Diosichi mantate pamin jominlanue.

²Junni yala ano fitunca ito, Miya Diosichi cale telenhinaminlanue. Junni tsanlainasa Diosichi Tenca yalabe itsantinue: —La Bernabebe Sáulobeca wenteto mantaca joyoe tinue yape lachi tenchi ticatiya quito nenalarasa. Junni nulanan yalaca mantalaquede! tinue.

³Junni yalari ano fitunca ito, Diosibe rocailainue. Junsi Bernabebe Sáulobeca tedechi tale quito, yalachi tenchi Diosibe rocaito erelaquinue.

⁴Junni Bernabebe Sáulobe Diosichi Tenca ereca jun jito, casale Seleucia puebloca jilainue. Junbi nechi Chipre tinun pisaca barcochi jilainue.

⁵Juan Márconan pejinue yalabe peayudaichun. Aman Chipre tobi féto, Salamina pueblobi barcobi nechi patilainue. Junbi israelítala tala Diosichi fiqui miinun ya cura micarilaquinue. Junbi Jesucrístoca paca fiquica micarilaquinue.

⁶Aman Chipre tobi micaride nenato, Pafos pueblo fecári jilainue. Junbi israelita ponebe tulailainue Barjesús mumun. Yachi manca mumun Elimas jominue. Yari nene pato, Diosichi mantate pamin joyoe timin jominue. Aman ya poneri jun pisaca mantamin miyabe pechuminue. Ya miyari Sergio Paulo tinun jominue. Junni ya miyari tenca tan tsachi joto, Bernabebe Sáulobeca jasa tinue Diosichi fiquica meráchun. Junni Sáulola micarilaquinasanan, ya poneri duque seitonque pánaminue yape Sergio Páulori Jesucrístobe cayaitusa.

⁹Junni Pablo itsantinue. (Aman Sáuloca tensaato mumun pato, Pablo tinun jominue.) Junni Pablo Diosichi Tencabe jera mantaito, ya poneca cacabi quirato, itsantinue:

¹⁰—Nuri ti quira seiton encanamin tsachi joe tinue. Nu yucanbe penenamin joto, jera sen jonuncatiya paimin joe. ¿Ti quichun Miya Diosichi sen minuca jera pala suwachique tenfenayun? tinue.

¹¹Junni Miya Diosiri nuca casticaquichunae tinue. Wan fecári ticanantiya quirano podeituchunae tinue. Nin yocatiya quirano podeituchunae tinue. Junni Pablo tsantinunsi, Barjesús quirano podeiton iniinue. Junni quirano pode itoto, tsachilaca neyanue yape yaca tedele nasi cato tanjilaisa.

¹²Junni Chipre to miyari junca jera quirato, Miya Jesuca paca fiquica duque wepanato, Jesucrístobe cayainue.

¹³Junsi Páblola Pafos pueblobi nechi loto, Panfilia toca barcochi jilainue. Panfilia toca jito, Perge pueblobi felainue. Juan Marco mantimini yalaca purato, Jerusalenca manjinue.

¹⁴Junni Pérgebi nechi jito, manca Antioquía tinun puebloca jilainue ya Pisidia tobi. Junto jasaino mate israelítala tala Diosichi fiqui miinun yabi wito chudilainue.

¹⁵Junni jun yabi mantaminla Diosichi Pila quiratobi, Páblolachi fiqui ereto itsanlatinue: —Acola, chiquilachi tenchi titiya cuenta quino munaratori, panilaquede! latinue.

¹⁶Junni Pablo wiruito, tedechi nosasailaide! quito itsantinue: —Israelítala, laca meralaquede! Aman inte weyanla israelita itotonan, Diosica tenca tanla joe. Nulanan laca meralaquede! tinue.

¹⁷Diosi chiquilachi matu to tatalaca wentenue tinue yape yachi tsachila jolajosa. Yala Egipto tobi cachularasanan, yalaca duque serawonue yape wa bolon ito seque chularasa. Junsi sonbaito, yalaca Egíptobi nechi manlarinue tinue.

¹⁸Junni yalari Egíptobi nechi loto, junpalu chunca wata fecári niyanlanantiya chutunun tobi nenato, seiton quito nenaminlanue. Diosi tsanhinaminlaca wantaito,

¹⁹yalaca Canaán tobi manchutenue. Canaán tobi nechi siete bolon tsachilaca jera sularinue yape chiquilachi matu to tatala junbi chularasa.

²⁰Junni junpalu patsa mante chunca wata fecári Diosi tsachila mancaca mancaca wentenue tinue yape israelítalaca mantasa. Samuel sonnano fecári israelítala ya wenteca junlabe mantaito chuminlanue tinue. Aman Samuel Diosichi mantate pamin tsachi jominue.

²¹Junni Samuel israelítalaca mantanasanan, tsa miyaca munaralarayoe tilatinue tinue. Junnan Diosi yalaca meráto tsachi mancaca mantaponue yape miya josa. Yari Saúl mumun jominue. Yachi apa, Cis tinun, ya Benjaminchi bolon israelita jominue tinue. Junni Saúl junpalu chunca wata fecári mantanasanan,