Alibolepino Osiyodilole Tanalo 2:5-42

⁵Ebema꞉ buka ka꞉la꞉mioledawa, a꞉ma꞉ numa꞉, ebe Pentekose Soliyomu egela pea꞉no dopamo Yu epo epetapi ega꞉walo Yua꞉pi epo epetapi Godoko damamatenamiya, ibi bilibilinomate ibino iyaiya mulu opone Yelusalema kawo duliyomolamo pelamoliya ebe soliyomu kapimiya ka꞉posiyodiloma꞉.

⁶Ebene Godote ebeno Uliyana Ya꞉sukono nanitabokobi midipiatamo kawo diyamago dapalibiya, iyaiya opone soliyomuma꞉ da꞉pelamiya ebe epo epetapi bilibilinomate ebe diyamo olowite ebe tanalo kuima꞉ ebo paladabutiya. Ebema꞉ iba꞉te kawonomamo anoanoutiya mabu nanitabokobi midipiate Yu epono tabamo kegelitiya꞉ wiyasiya iyaiya tabamo gelitiya, ma kunu olowiopino taneba magumulo idawate ebeno tabonomo olowinaki, idawate atumu ebeno tabonomo ako-olowinaki, ibi bilibilinomate eba kunu wagelitiya.

⁷Ebene iba꞉te la꞉wa꞉ote eba anoanolo negeliya, “Me tabo degelita, me epo aimano opo epoa꞉, ibi Ga꞉lili opo epola,

⁸ebema꞉ keba kunula꞉ka꞉ iba꞉te aimano iyaiya tabonomamo degelita a nolowiutama꞉?

⁹Eiye, a bilibilinomate mulu opone pelamolima꞉! Iyo, a epetapi Patiya opo epola, epetapi Midiya opo epola, epetapi Ilama opo epola, ega꞉walo epetapi Mesopotemiya epola, ega꞉walo a epetapi Yudiya epola, epetapi Ka꞉padosiya epola, epetapi Pontase epola, ega꞉walo epetapi A꞉isiya epola.

¹⁰Ega꞉walo a epetapi Piligiya epola, epetapi Pa꞉mapiliya epola, ega꞉walo epetapi Isipiti epola, nanitabola, a epetapi Sailiniya duliyomolono Libiya opone pelaima꞉, ega꞉walo a epetapi Loma kawo duliyomolone da꞉pelaima꞉ ebe epola.

¹¹Numa꞉la꞉, a magumulo epetapi Yu eponomola, ega꞉walo a epetapi Yu epoa꞉ wiyasiya ale iba꞉godone nani Godo amamate tanalo lawiyama꞉, iyo, a epetapi Kuliti opo epola ega꞉walo epetapi Ala꞉biya opo epola, ebema꞉ me epate Godokono kawokawo osiyodilole tanaloma꞉ degelita, ale aimano iyaiya tabonomamo beda꞉ma꞉ kolowiutama꞉?”

¹²Ebe mabuma꞉ ibi bilibilinomate anoanolo woki bilibilima꞉ eba eda꞉olo, idite iditamo genaki, idite iditamo genaki, eba kunu wagelitiya, “Eiye! Me tanalono magumu keba kunula꞉ka꞉?”

¹³Wiyasiya epetapiate Ya꞉sukono alibolepi dubu eba kalakalatelelo negeliya, “Me dubate elawo da꞉imi obo niote da꞉ugulamole, ebema꞉ daedaleuta!”

¹⁴Ebene Pitate 11 alibolepi dubu epetapiago maigate ebeno tabo madodo unamo eba adipatelo epo bilibilinomatamo ma kunu kiyawaiya, “Naimano Yu namutupiala꞉, ega꞉walo la꞉ epetapi Yelusalemamo da꞉pelamola꞉ima la꞉ bilibilinomo atumu, nale me tanalono magumu la꞉tamo kawokalimamo, ebema꞉ modobola la꞉ naimano tabo wadenomamo nolowiala꞉.

¹⁵Me dubu la꞉le elawo da꞉imi obo nioma꞉ degelawitama, ebe tabo nanitaboa꞉. Iba꞉te elawo da꞉imi obo ka꞉niaka꞉, mabu nanitabola, dubate elawo da꞉imi obo duiyalo ka꞉nionakoa꞉. Numa꞉la꞉, egela ka꞉ma꞉ podoluta!

¹⁶Wiyasiya me tanalo ebe Godokono woki awokalimidawa Yowelate dopamo da꞉kiyawaiya, ebe tabola.

¹⁷Iyo, Godote Yowelado tabo ma kunu giya, ‘Me opono uwomu tetelo na Godote naimano Uliyana epo bilibilinomono unamo kadipanamamo. Ebe tetelo la꞉imano koikoila buwelemelela, iba꞉te naimano woki nanitabolo kawokalima꞉na꞉, ega꞉walo la꞉imano oli ape dubuno balidite iyama꞉ eda꞉olamete kawokawo tanalo kulamolema꞉na꞉, ega꞉walo la꞉imano kadelekadela꞉te atumu iyolo naimano iyaiya tanalo kiyatawaoma꞉na꞉.

¹⁸Iyo, nanitabola, ebe egelalo naimano wiya꞉ wokopi dubula kamiyalela, nale ibi unamo naimano Uliyana dadipanamo, iba꞉te naimano woki nanitabonomolo ebo kawokalilaema꞉na꞉.

¹⁹Ebene nale tobolo unulo kawokawo anoano tanalo kosiyodilolemamo, ega꞉walo me opolo nale atumu weweda꞉ tanalo eba posiyodilolelo, epate kalima ka꞉ka꞉liya tanalo ega꞉walo ela ega꞉walo ela tema kulaema꞉na꞉.

²⁰Ebe tetelo egelate kidokomene, ega꞉walo saganate kalimakalimanomoma꞉ keda꞉mene, ebene Kawodawano Kawo Egelate kawo alonomago ka꞉pemaigamene.

²¹Ebema꞉ nanitabola, piyate Kawodawano mailo deka꞉ima꞉na꞉ Godote ibino igilo ebo ka꞉mula꞉lelaemene.’”

²²Ebene Pitate tabo moga꞉melo walo na꞉kegiya, “La꞉ Isalaela epala꞉, la꞉ me tabo wadenomamo nolowiala꞉. La꞉ iyatawanomolata, me Nasalete duliyomolodawa Ya꞉suko Godote me opamo palibiya, mabu Godote ebedo kawokawo anoano tanalo ega꞉walo weweda꞉ tanalo la꞉godolo eba posiyodilolelo ebeno elawo apawokalimi.

²³Nanitabola, me opo kawonomolo tanalo idite pemaiga꞉no Godote ebe tanalo dopamo kiyatawamene. Ebema꞉ ebeno mulo iyatawa tanalodo ebete nopo ma kunu iyatiya, ebete Ya꞉suko la꞉imano kotamo iyatite, ebene kuba osiyodilolepiate la꞉ eba walubililo la꞉le ebe lawa꞉wete kewa olotowamo tupuguima꞉wete ikoko ebo anagilamoleimata, iyo, la꞉le ebe me gabodo anakapuimata.

²⁴Wiyasiya Godote Ya꞉sukono a꞉e temeteme palamilimite ebe a꞉e magumune ebo adipati, mabu a꞉ete ebe laema꞉ elawo puliyala.

²⁵Ebe mabuma꞉ Da꞉ibidite Godokono elawamo Ya꞉sukono tanaloma꞉ tabo ma kunu akuloliya, ‘Na Kelisote naimano Kawodawa Godoko na niyakabonomolo uminamo, iyo, ebete naimano tumudi apulo utina nale alegaokapoma꞉.

²⁶Ebema꞉ naimano tepo magumute eba maenalo, nale kawo kalakalago kiyawaonakomo, iyo, nale Godoko nanitabokobi midi magumulo eba okolinalo, naimano apeno a꞉e tanaloma꞉ nale woki bilibilima꞉ a꞉keda꞉mo.

²⁷Mabu, Godo, a꞉ma꞉le naimano ape a꞉elaopino opolo akatepaemene, iyo, a꞉imano Talena Gudute da꞉emene, a꞉ma꞉le ebeno abale tanalo odiyobawete ebe igilamo walo kakadipatema꞉ta.

²⁸Nanitabola, a꞉ma꞉le na igilo gabo iyalo iyatunamiyata, ebene nale a꞉imano ololo apuamo da꞉pemaigamo, a꞉ma꞉le natamo kawo kalakala kikanaema꞉ta.’”

²⁹Ebene Pitate tabo moga꞉melo walo na꞉kegiya, “Ekakiala꞉, na ilipoa꞉no aimano ewono Da꞉ibidikono tanalo awokalima꞉ la꞉tamo ka꞉kiyawaomamo. Ebete me tabo Godokono Bukamo dakuloliya ebeno tanaloma꞉ kakuloliya꞉, mabu numa꞉la꞉, ebete da꞉iya iba꞉te ebe bobamo iyatiya, ebene ka꞉lo ebeno bobote agodolo bitamena.

³⁰Da꞉ibidiko ebe Godokono woki awokalimidawa idila. Ebe mabuma꞉ Godote ebeno mailamo nani tabonomo Da꞉ibiditamo degiya, ebete ebo iyatawiya Godote ebeno walone gudi magumulo idi kapiya lawete ebeno Kawo Elawodubuno okoli baiamo kadipimene.

³¹Ega꞉walo Kelisote walone tetelo a꞉e magumune demaigamene, ebe tanalo pemaiga꞉no dopamo Da꞉ibidite Godokono elawamo dumiya, ebe tanalono tabo ebema꞉ ebeno Bukamo ma kunu akuloliya, ‘Godote ebe a꞉elaopino opolo akatepamene, ega꞉walo ebe bobo magumulo akabalemene.’

³²Nanitabola, Da꞉ibidite me tabo Kelisokono tanaloma꞉ akuloliya, iyo, me Kelisoko ebe Ya꞉sutela, Godote ebe a꞉e magumune dadipati ale aimano balidinomamo ebe ebo uima꞉,

³³ega꞉walo me Ya꞉suko Godote ununomamo adipatete ebeno tumudi apuamo gito owodimi. Ebema꞉ numa꞉la꞉, Nabiwi Godote a nanitabokobi midipiatamo ikaeaema꞉ nanitabolo degiya, ebe kalakala tanalote ka꞉lo a꞉pemaiga. Nanitabola, ebete Ya꞉sutamo Talena Uliyana iyalo ikami, ebema꞉ ebete ka꞉lo a unamo ebeno elawo adipana, iyo, la꞉imano galamo dolowiawitama ega꞉walo la꞉imano balida꞉mo duma꞉witama me ebe tanalola.

³⁴“Ebema꞉ la꞉ me tanalo wadenomamo nemalagidilala꞉, Ya꞉sute Godokono Unu Duliyomolamo keba kunu ka꞉nodolile, Da꞉ibidite eba kunu kanodoliya꞉. Ebe mabuma꞉ Da꞉ibidite Ya꞉sukono tanaloma꞉ Godokono Bukamo tabo idi walo ma kunu kakuloliya, ‘Kawodawa Godote naimano Kawodawa Kelisotamo nege, ‘A꞉ma꞉ naimano tumudi apuamo na꞉pokoliya,

³⁵ebene a꞉ma꞉go gowelaopi nale ibi a꞉imano agowa puti baima꞉ ka꞉midilimamo.’ ’

³⁶Ebema꞉ la꞉ Isalaela epo bilibilinomala꞉, modobola la꞉ iyatawanomo niyatawala꞉, la꞉le me Ya꞉suko kewa olotolowamo da꞉tupuguima꞉ima, Godote ebe kapiya lawete aimano Kawodawama꞉ ega꞉walo aimano Kelisoma꞉ a꞉midi!”

³⁷Ebene tabo olowiopiate Pitakono tabono tanaloma꞉ kawo tepo temeteme eba lawitalo, ebe ega꞉walo alibolepi epetapi dubatamo negeliya, “Naniala꞉, a beda꞉ tanalo na꞉kosiyodiloma꞉?”

³⁸Pitate wiyasiya negiya, “Modobola la꞉ la꞉imano tepo magumuno woki iyakobi midila꞉wete la꞉imano kuba osiyodilole magumune nolobila꞉la꞉, ebema꞉ ale la꞉ Ya꞉su Kelisokono mailamo obamo kowaduba꞉midaolema꞉ta. Ebene Kawodawa Godote la꞉imano kuba egebolelametate eba dodolomatililamelo, ebete ebeno Uliyana nilakapolo la꞉tamo gito kapalibomene. Iyo, la꞉ ega꞉walo la꞉imano gudi ega꞉walo iyaiya mulu opolo dilukuliona ebe epo atumu, la꞉ bilibilinomo magumulo ebete kebe epo ebetamo pelaema꞉ deka꞉la꞉mina ebete iba꞉tamo ebeno Uliyanano elawo kikalaemene, dopamo nanitabolo keba kunu kegiyale eba kunu.”

⁴⁰Ebene Pitate makomako tabo epetapi bilibilinomo eba kiyawaolamelo ibi kawiya ma kunu analiya, “Me opolo kuba osiyodilole magumulo dowapata꞉lamena, la꞉le ebe epono taneba magumune nemaimiala꞉ la꞉imano igilo mula꞉ tanalo kelawa꞉ema꞉!”

⁴¹Ebe tetelo piyate ebeno tabo dolowiya ibi epetapi bilibilinomate nanitabokobi midite, ebene Ya꞉sukono alibolepi dubate ibi obamo ebo waduba꞉midaoliya. Nanitabola, ebe egela kapiyalo 3,000 epate nanitabokobi midi magumulo iba꞉go kapiyama꞉ eda꞉iya.

⁴²Ebene egela epetapi bilibilinomolo nanitabokobi midipiate ibino aladabuti tanalo katepanakia꞉, iyo, iba꞉te kapimiya alibolepi dubuno iyatulame tanalo olowionakiya ega꞉walo Ya꞉suko malagidilo bae naonakiya ega꞉walo Godotamo towetowe tabo akogelanakiya.