Aisaia 11:1-7

¹Te Jesigo hani te ni bidi dabego gelai ni tane tiwai bididuali. Tiali goli, gesi age te ni tanede ma kolibo tiwai yaibao. Awe, te ni tanedu te gesi ni tigi holama, tama nologo me deligo du walaibao.

²Te Genuai Bidigo Spirit Mobo Bidi aga dali bidagaselama, tama aga te wiegi yai homu kolesaga dabe magasaibao. Tama agai aga we bidi tonalubo homu kolesaga wiegi yai mu saibao. Tama aga bomai tuni bidi bidiyu, tama agai aga we bidi tonalubo kolesaga wiegi yai mu elaluaibao. Agai te Genuai Bidigo homu kolesaga koneaibao. Tigidali sogo aga te Genuai Bidi dologode naga bidaibao.

³Tama te kolesagago aga wiegi yai homu ilibo geninaibao. Tama agai te po tų odobode da, agai te bidi dabego po wabode naga o gedugo suali pode naga osola suyu egobeo. Menio.

⁴Te po tų odobo dolo naga agai te nai meni yai bidi dabego homu sęgę elalubo po odama, te bagenu tau saibao. Te gasa bidi dabego augwali aiyaba elaluama, augwali dolama, dwai sę yali dabede agai pode te tiabo sę yali we bidi dabe dene saibao. Tama te dwai sę ebo bidi dabe da isaibao.

⁵Te tama doloba pai kolesagago tama aga we bidi tonaluaibao. Aga bomo elama bidiyu, aga sę bugagia yaibao.

⁶Te bulu yowi de sipsip kibu gǫų si aga bugagia deliba bilaibao. Tama te lepat moni hasa dabe te meme kibu gǫų dali piyu yaibao. Te kau kibu gǫų dabe, me te laion yowi gǫų dabe dali, deli hodobo nai tudu bilaibao. Tama dwasianu wai dabego augwali tonaluaibao.

⁷Te kibu bulmakau de te bulu hasa bea aga si nai deliba tuaibao. Tama augwa wai dabe augwa hasi deliba piaibao. Tama te laion dabego te bulmakau kibugo nosai tubo tiwai yaibao.