Isaiah 11:1-7

¹Bare Jesse ko gue tutugur tam Miri bo supurok, ale tarigiruk, kower bitiruk ale nunguning kaparukko.

²Se Yawe ko Bur nu kumik ago lilimaruk ale ikia sinar se kitigot ningo tuokko; ale kiti guruga ningo se sokel lilim mu tuokko; ale ikia ningo se kua Yawe bowa ningi la bagara ko munan ago tuokko.

³Bore te se, nu kua Yawe bowa ningi bagara ko munan mu ko kua tui se lagarukko. Noko tuetera kam te mel bo guang ko, motam te arigiso agi due te, mu te me ira sanamaruk ale noko tuetera bitirukko.

⁴Nu kariimet kituwura guat ali imi te bagasan mu noko munan ningo diram te nunga nungok burangarukko. Nu kuring te ali imi lilim memek arigokko; se kariimet memek alo mu nu balso uwutata memek tamonko.

⁵Noko ningo diram ko munan mu guang iwita laulan te kaola la anirukko, ale ko den diram la karo tua ko munan umu guang te kaola ko mayang iwita te tagi kaola la gek kam anirukko.

⁶Kausik diwang memek mu, sipsip ilak nunumi me gisan, bare kam mu te mu bagara suanta bagamonko; se leopard mu goat gotek ilak nunumi me gisan tala, bare kam mu te mu arerem la taga animonko; se koma suanta tala bulmakau gotek se lion ko gotek mu wete la no nungia se kuriang gotektek nongorak nunumi gimonko.

⁷Bulmakau mu bear nongorak ningo la namon gimon, se nunga gotek alo mu yawarakala la nunumi ago taga animonko; se lion mu bulmakau sirsir naso iwitatala sirsir naukko.