Afasoro 8:14-35

¹⁴I Samaria orou Godinu wake naukaisaya moi orouma eno weisaro i Derusaremu goiro ibisa afasoro orouma nauisa. Nauisake ibake Fidaini Dionini emua we odairiekaro Samaria orofaro isare anisi. Isare ane fakike i oroubake Godibairo guriguri ukaada eno weisi, Babae Godi, Anu Imumu Irau we odaiaro yewa oroubairo isafi weisi.

¹⁷Eno weisike Fidaini Dionini emenu wanama i Samaria orou emenu iiri duboro odaada Godibairo guriguri uisiro Godima Danu Imumu Irau we odairo emenu imuka ubarenaro isari.

¹⁸Saimonima eribaie i afasoro orouma emenu wana i Samaria orounu iiri duboro odeibisaro Godinu Imumu Irau emuabairo isariro ukeibisa ibai Saimonima erike Fidaini Dionibake eno wei, oi mamiaro yanu buna ukeka na makuakiro nanu wanama emenu iiri duboro odimaro Godinu Imumu Irau emuabairo isafi wei.

²⁰Eno weiro Fidama ma owerike eno wei, a aneaneme imukaku wei? Eno weike nono wei, Godinu me makeka oima make mufaku wei? A eno imukakuba aini anu oini merama sifuwaisia wei. Fidama eno weike nono wei, anu imukekae meramawereba iyabairo Godinu waiya da ufakua wei. Eno weike ba nono wei, anu imukama Godibake imuke dakakuba iyabairo Godinu waiya da ufakua eno wei.

²²Fidama eno weike nono Saimonibake eno wei, anu imukekae meramawereya Godibairo guriguri uaro anu merama merama ukeka yaisina Godima mufike imuke medifi wei.

²³Eno weike nono wei, anu ararae meramawereba merama mane ukeifakua wei.

²⁴Fidama eno weiro Saimonima ma owerike eno wei, na arara me nanu merama ukeka wei. Eno weike nono wei, i merama ukekabake yama nabake Godibairo guriguri uawaro na ma wirofari wei.

²⁵Fidaini Dionini emuama Yesu imukeibisi wakeini Yesunu wakeini eno we me sikike owekike Samaria orofa udi goi goiro anisi. Anisike Godinu wake we eneebe iroma Derusaremu goiro owere ane faki.

²⁶Godinu aneruma Firifubairo isare aarike eno wei, isare aniake yeka Derusaremu goiroma Geisa daabaro isare ania wei. Eno weike nono wei, yeka daabae obi isare me daaba, eno weiro nauike i daabaro ani.

²⁷Ane faribaie moi dai Idiofia orofa goi mi, kuini Kadasinu oi yawokeibi mi idua fari. Dawae Derusaremu dai sosiro anike guriguri uike nono owerike idua fari.

²⁸Danu osi abuma ma youreka seboro yaure ibaada Godinu buka ibiye Isaiya kakure aare idua fari.

²⁹Idua faribaie Godinu Imumu Irauma Firifubake eno wei, i mibairo ania wei.

³⁰Eno weiro Firifu durame ani. Ane fariro i mima Godinu buka ibiye Isaiya kakuriro nauike Firifuma eno wei, anu kakuraku i wake danu ubi imukakuba me wei?

³¹Eno weiro i mima ma owerike eno wei, nanu mane kakumau ide aneaneme i wakenu ubi imumauke iwoka simau weike nono wei, moi mima na we ma iwoka ufarakuie i wakenu ubi iwoka simaua wei. Eno weike Firifubake nono wei, nabairo osi abuma ma youreka seboro amuake yaua weiro amuke yauri.

³²I mima kakuri wakenu ubiye eno, Emema mamoe abu ma feafisane mune anifeisaie mamoe abu arua we dakaku. O mamoenakunu idi kuuraisaie arua we dakaku enaenari emema Dawa ma feafisane mune anisaie i ari enoba Dawaini arua we daui.

³³Dawa arua we daui ibake moi mima Dawa medaia we daui. Dawa fearike urero amuke anike iro ibinu. Ibake abo mima yewa orounu merama ukeka we ma boroo yafeku, i mima i wake eno kakuri.

³⁴Eno kakurike i Idiofia mima Firifubake eno wei, i Godinu we bou ukeka mima ainabake weaku? Danu onamibakeba moi mibake weaku?

³⁵Eno weibaie Firifuma i wakeroma Yesubake irau wake yaisina we ma iwoka ukeibi.