1Navong meatin keil iles asa koa hekistal en meatin toumien onen Iahova, keil ihiteni min keil eris ihit, “?Munak meatin tai vit usil longlongien enek mulamu, isei hekur anatin eni? ?Isei kilea valei kilea hen Iahova en sakien keil koa kistal ekek?
2Vi rendemien onen Iahova enges keke meatin toumien onen hemoul hesuval liai koa viteh en atan tames. Tounah tovuol en veinan vuo en aven koa vasakin meatin keil avandem usili vuo avousili. Anatin, tounah tovuol varei eni koa valeh meten meatin keil.
3Meatin keil amundem maeni ka aseseini. Kei vi meatin koa kilea revi sakvisien keil ka mahien keil emun. Kei vi meatin koa meatin sav keil amundem heisav eni ka e rovattei availea kei.
4“Anatin eli, kei lah lat mesaien keil orer, ka kur mahien keil orer en aven. Ir romundemi keke Ahi varei san sakvisien ka mahien keil mini. Anatin, romundemi keke amutah purun aven ven tisaen onen enges.
5Ka asal vini ven tisaen keil orer. Anatin, amuti kareni ven sakien tisa keil koa ir enges romumoni. Amutah puruni keke ir rokilea rovato en tomat vatal min Ahi. Ka out koa lovlovu en aven, sakin aver maluv ran mesaien keil.
6Ir vasi rosuval sipsip keil koa alei ras sise one ka avuol. Anatin, ir vasi romusil retai en sise keil orer. Ka mahien koa mal keke Ahi hesani min ir ven tisaen keil orer, kei sani suk min meatin toumien onen.
7“Avaseini meatin keil amum tisa houlu va kati, rendemien onen mules netan, ro raeng enges. Kei suval titi sipsip tai koa amulamuni vaha avouasi vamat, roviten etai selusien. Anatin, romumontei verien suval sipsip tai navong asoui lin hilin.
8Navong ales usite onen en kot, armumontei vamal eni. Keil amulamuni va vamat, ka meatin keil amundem heisav eni enges. Asan rendemien keke moulien onen vavus ran out netan, ven tisaen keil orer.
9Avaseini e vati avatahin teiai onen vesesal ven koakeil amum tisa, navong mat, arahini en out koa arahin koakeil tounah one houlu amul ien. Keil avit umoni mini mukonek, avaseini kei romumontei rea vuo roluvostei meatin sav keil.”
10Ka en Aesea, Iahova selus eris usil meatin toumien onen vit, “Inau etin, namumon rendemien onak keke kei hekur mahien hesuval amuti kokoa. Inau nisakin moulien onen hemai hehi sanien votut tai koa voutut moulien onen meatin keil. Ka katau, hemoul eris ran matien ka heles titan keil. Anatin, hemoul heto hetaveah ka heles koakeil emun ikistal ika en keil. Ka en meatin toumien onak, rendemien keil koa naling kati hemai hekur heite.
11Katau en mahien onen, kei heles ris sien en moulien onen. Kei heilea suk keke rokur heisav entei mahien onen. Meatin toumien onak, moulien onen mal revi ka houmon moulien onen meatin keil houlu hemai hemal en metok. Helah lat tisaen keil one ran keil keke num ris methos onak hetal min keil.
12Hesakini, inau nisan eis ten hetetamenien mini ka hetondan hetal min hetetamen sav keil ka hetal min koakeil akur keihoen. Numoni hemukonek veni kei mae koteh moulien onen vamat, ka maen kei enges keke avasak puruni vatal min meatin tisa keil. Ka kei lah lat tisaen keil ran meatin keil houlu, ka vis Ahi voumon ris methos onen min keil.”
