Acts 9:15-39

¹⁵Wate Bada, Ananias i riwei, “Ma nae! Tau a vinei da aubaiu ina vitaunola ma wavau ina jimei, Jentail ma ai gulagulau awarii ma nanare mai Israel awarii.

¹⁶Tau ana viatataiei da aubaiu ina jima ma rau-iviapoapoe ḡaeḡaena ina nei awarina.”

¹⁷Anina ma Ananias i ḡeta au numa ma i rui. Ma urana Saul au tepana i terei ma i riwei, “Vareiu Saul, Bada Iesu, Tauna au etanai awarim i eḡa maranai weka u nenei, i paritawaneu awarim da ma inana me ma Arua Vivivireina oram ina vioai.”

¹⁸Maratagogi purapura inanana me iana wenavina au matana i peu, ma tauna, inana me. Ma i vomairi ma i babataito.

¹⁹Ma i am ma ana rewapana i vai-melei.

²⁰Ma tauna maratagogi i nae ma pari au numai i raraugugula da Iesu anina God natuna.

²¹Taui aiavoi da Saul i nonori i ba kaua ma taui ava i babani vivira i pa, “Wei ravana tagogina, rau-iviapoapoe ḡaeḡaena Iesu ana tauvitumaḡanai awarii i kaukauei au Jerusalem bo? Tauna i nei weka nolana tagogina aubaina da tauvitumaḡana ita pani ma ita naiei Pirisi babadai awarii bo.”

²²Wate Saul ana raugugula i virewapana kaua ma lamnei mai Jew au Damaskas i aramanei da Iesu anina Keriso, Vinevinena, ma lamna aubaina ana babani eḡa ita parivirevirei.

²³Ma au pom biaḡa au murina Jew babadai i viogatara da Saul ita viraḡeni.

²⁴Mai Jew marai ma waguvarai taon garina au metaetana i vipaipai da Saul ita viraḡeni. Wate Saul ai ogatara riwana i nonori.

²⁵Ma waguvarai tauvitumaḡanai ḡelaui ai bada Saul i taravaini ma iriga ḡaeḡaena au orana i poai ma gavogavo aburuna taon au garina, kampa ḡuravei i tere-ḡairei au doa ma i ruba.

²⁶Saul i ḡeta au Jerusalem ma maranai i ḡoei da tauvitumaḡanai ai au boru ita rui. Wate taui i rovoei ma eḡa ita vitumaḡanei da tauna Iesu ana tauvotaḡotaḡo.

²⁷Wate Barnabas tauna i taravaini ma i naiei Apasol awarii, ma i riwei menanare au etanai Saul, Bada i ʼnanai ma aiwai awarina i babaniei. Ma menanare au Damaskas ana tepatorana i raugugula Iesu wavanei.

²⁸Anina ma taui Saul i taravaini ma maiteni i mae ma Jerusalem i naeni ma ana tepatorai i raugugula Bada wavanei.

²⁹Ma nanare Saul mai Jew pona Greek taubabanieina maiteni i babani ma i viparipariḡai, ma taui i viogatara da tauna ita viraḡeni.

³⁰Maranai tauvitumaḡana ḡelaui wei i nonori, ma Saul i taravaina-naiei au Caesarea da i paritawanei au Tarsus.

³¹Anina ma ekalesia au Judea, Galili ma Samaria ana nuaubaii i mae. Ma Arua Vivivireina ana aguei ekalesia ai tumaḡana i vovai-virewapani, Ma ai boru i rarata, ma taui Bada i vivirana-kauei.

³²Nai maranaina Peter dobu maḡamaḡaui i naeni, ma God ana tauvitumaḡana awarii i ḡeta au Lidda.

³³Kampa oroto wavana Aeneas i nelaḡai, tauna gwaḡagwaḡana madeḡa 8 ana au aravi i matave.

³⁴Peter i riwa, “Aeneas, Iesu Keriso i vilawanim! Ma vomairi ma am aravi ma noui!” Ma maratagogi i lawana.

³⁵Anina ma rava maḡamaḡaui au Lidda ma Sharon wapuna melagaina, i mae-tavirei Bada awarina.

³⁶Au Joppa tauvitumaḡana tagogi wavana Tabitha (Greek ponanei lamna Dorkas) tauna marana patapatana kaua maḡamaḡaui aiaii i kaukauei molamokai aubaii.

³⁷Wei marana tauna i doria ma iʼraḡe ma tupuana i oḡai ma numa vatavatara au aidamo, i vimataveni.

³⁸Lidda, lamna Joppa au ḡereḡerena ma maranai tauvitumaḡana i nonori da Peter au Lidda, taui ai rava ruaḡa i paritawanei da Peter i egari i pa, “Laḡilaḡina ma nei!”

³⁹Ma Peter taui maiteni i nae da i ḡeta ma i taravaina-ruiei au numa vatavatara. Kaikaiababa maḡamaḡaui ana toutoui Peter i mairi kwaviviroi. Maranai Dorkas lawalawaina ma kwama da gara i popopoia Peter i viatataiei.