Yɛbəc 9:15-39

¹⁵Mba kɔ Wəbɛ oloku Ananiyas: «Məkɔ! Bawo fum wəkakɔ paka pɔ mpɛ inayɛk-yɛk kəkɔtɛnɛ tewe tem nnɔ abɛ a tɔf ya doru kɔ aka Yisrayel fɔr kiriŋ mɔ.

¹⁶Ina yati in’ endementər Sol pəcuy fəp pɔkɔ pəmar pədecepərɛnɛ teta tewe tem mɔ.»

¹⁷Kɔ Ananiyas ɔŋkɔ. Ntɛ ɛmbəp kəlɔ kaŋkɔ mɔ, k’ɛmbɛrɛ, k’endeŋər Sol waca. K’oloku: «Sol Wɛŋc im, Wəbɛ Yesu, nwɛ ɛnawurər əm nde dɔpɔ ndɛ mənasolnɛ məc-der Damas mɔ, osom im ntɛ tɔŋsɔŋ’ am sɔ kənəŋk, a məlarɛ sɔ Amera Ŋecempi ŋa Kanu mɔ.»

¹⁸Gbəŋcana babɔkɔ, kɔ ca yoŋkoŋɛ kɔ dəfɔr pəmɔ wokwok, kɔ fɔr yɔn yɛntam sɔ kəc-nəŋk. Kɔ Sol ɛyɛfɛ, k’ɔsɔtɔ kəgbət dəromun teta Kanu.

¹⁹Ntɛ elip kədi yeri mɔ, k’ɔsɔtɔ sɔ fənɔntər. Kɔ Sol eŋcepərɛnɛ mataka mɔlɔma kɔ acɛpsɛ a Wəbɛ Yesu akɔ ŋanayi dare da Damas mɔ.

²⁰K’ɛyɛfɛ kəcam katina dəwɔlɔ wa dəkətola Kanu da aSuyif, pəc-loku a Yesu Wan ka Kanu ɔyɔnɛ.

²¹Kɔ pəŋciyanɛ afum fəp aŋɛ ŋaŋc-ne polok-loku pa Sol mɔ, kɔ ŋayif: «Bafɔ nkɔn nde Yerusalɛm ɛŋc-faŋ kəmələk aŋɛ ŋaŋc-boŋc tewe tantɛ mɔ ba? Bafɔ kəsumpər kəŋan k’ɛnaderɛnɛ nnɔ, pəkekərɛ ŋa nde aloŋnɛ apɔŋ ŋayi mɔ ba?»

²²Mba Sol pəc-yɔ kəyɔ dəm kətam pəc-sɔŋɛ aSuyif aŋɛ ŋanayi dare da Damas mɔ kəciyanɛ, kəc-mentər a Yesu ɔyɔnɛ Krist, wəbɛ wəyɛk-yɛk wəka Kanu.

²³Ntɛ mataka mɔlɔma meŋcepər mɔ, aSuyif aŋɛ ŋanayi Damas mɔ ŋantəŋnɛ kənim ka Sol.

²⁴Kɔ Sol ende pəcərɛ tɛtəŋnɛ taŋan. ASuyif ŋaŋc-bum daŋ kɔ pibi dəkəwur da dare ntɛ tɔŋsɔŋɛ ŋatam kənim kɔ mɔ.

²⁵Mba pibi papɔkɔ kɔ acɛpsɛ a Wəbɛ Yesu darəŋ ŋambɛr kɔ dəkəsaksaka, kɔ ŋayokɛnɛ kɔ damba da saŋka sa dare darəŋ.

²⁶Ntɛ Sol ɛmbɛrɛ Yerusalɛm mɔ, k’ɛŋsɛp kənɔŋkəlɛnɛ acɛpsɛ a Wəbɛ Yesu darəŋ. Mba fəp fəŋc-nesɛ kɔ, ta ŋalaŋ a nkɔn sɔ ɔyɔnɛ wəcɛpsɛ wəka Yesu darəŋ-ɛ.

²⁷Mba kɔ Barnabas ɛlɛk kɔ, kɔ ŋaŋkɔ nde asom a Yesu ŋayi mɔ. Kɔ Barnabas ɔlɔmər ŋa ntɛ Sol ɛnanəŋk Wəbɛ Yesu dɔpɔ, a kɔ Yesu olok-lokər kɔ mɔ, kɔ ntɛ tewe ta Yesu kənasɔŋɛ kɔ kəbaŋsɛ mɔ.

²⁸Sol ɔŋc-kɔ pəc-der kɔ ŋa dəndo Yerusalɛm pəc-lok-lokɛ kəlaŋ disrɛ tewe ta Wəbɛ Yesu.

²⁹Sol pəc-lok-loku, pəc-gbɛkəlɛnɛ kɔ afum aKresi, mba, ŋa sɔ, ŋac-tɛn kənim kɔ.

³⁰Ntɛ awɛŋc alaŋ ŋaŋcərɛ ti mɔ, kɔ ŋasɔŋɛ Sol kətor Sesari, k’ɛlɛk dɔpɔ k’ɔŋkɔ dare da Tarəs.

³¹Kəloŋkanɛ ka alaŋ Yesu a atɔf ŋa Yude, atɔf ŋa Kalile kɔ atɔf ŋa Samari, ŋa fəp ŋanayi pəforu disrɛ. Alaŋ Yesu ŋaŋcəpəsɛnɛ bəkəc, ŋayinɛ kənesɛ ka Wəbɛ Kanu disrɛ. Amera Ŋecempi ŋa Kanu ŋɛŋc-marəs kəloŋkanɛ ka alaŋ Yesu, ti disrɛ ŋaŋc-la kəla dəm.

³²Piyɛr nwɛ ɛŋc-cepər sədare sasɔkɔ fəp mɔ, ɛnader pətor sɔ ndena afum acempi aŋɛ ŋanandɛ dare da Lida mɔ.

³³K’ɔŋkɔ pəbəp di fum nwɛ aŋc-we Eney mɔ, ta ɔŋkɔt-ɛ, pəfəntərɛ debik meren camət-maas disrɛ.

³⁴Kɔ Piyɛr oloku kɔ: «Eney, Yesu Krist ɛntaməs əm! Məyɛfɛ məna wəsərka mənɛp abik ŋam!» Gbəŋcana babɔkɔ k’ɛyɛfɛ, k’ɛŋcəmɛ.

³⁵Ntɛ aka Lida kɔ aka Sarɔŋ fəp ŋanəŋk kɔ mɔ, kɔ ŋaŋkafəli mera yaŋan nnɔ Wəbɛ Yesu eyi mɔ.

³⁶Wəran wəcɛpsɛ ka Wəbɛ Yesu darəŋ wəlɔma ɛnayi dare da Yope, pac-we kɔ Tabita. Kusu kəŋan disrɛ aŋc-we kɔ sɔ Dorkas, ti tɔyɔnɛ «were». Wəran wəkakɔ ɔŋc-yɔ mes mɔtɔt mɛlarəm, kɔ kəmar.

³⁷Mata mamɔkɔ disrɛ, k’ɛfəntərɛ docu, k’efi. K’ambikɛ kəbel kɔn, k’ampɛnɛ ki nde dukulɔ da kəlɔ dareŋc.

³⁸Ntɛ acɛpsɛ a Wəbɛ Yesu darəŋ ŋane a Piyɛr eyi Lida ndɛ dɔlɔtərnɛ dare da Yope mɔ, kɔ ŋasom arkun mɛrəŋ kəkɔ-lɛtsɛnɛ kɔ: «Ta məwon kəcepər nde ndorosu.»

³⁹Kɔ Piyɛr ɛyɛfɛ kɔ ŋaŋkɔ kɔ asom aŋɛ mɛrəŋ. Ntɛ ŋambɛrɛ mɔ, k’ampɛnɛ kɔ nde dukulɔ da kəlɔ dareŋc. K’acəbokəra fəp ŋander ŋabəp kɔ ŋac-bok, ŋac-mentər kɔ səbrumus kɔ yamos nyɛ Dorkas ɛnalompəs ntɛ ɛnayi kɔ ŋa mɔ.