Acts 28:20-27

²⁰Matan hinau atu natu, mo vaiau na opoia vara a hite kamim ale a retireti isamim. Matan enau na lo toho hin jen nike matan na lo tau na noku rasua hin r̃omtoho atu nona tavtavuin Israel matan Tamlohi Jujuri.”

²¹La r̃aramia lara, “Kama sopo lo lavi te leta Judea matam, teni te vorai atu mo sopo lo sinai nike vara i vere te hina sasati matam.

²²Pani kama opoia vara kama rongo na r̃omim hin rasua nike sei tamlohi na jara tari la lo verelejlejia.”

²³La tau na rani matea vara la pa matavuhi peresia. Ale la mai na jara mo lo toho ea, enira vao tavera, mo tapulo na ralavuho mo tikeli na ravravi mo lo vere mamahunia, ale mo vereuli mauri atu God mo aulu hinia, ale mo vaihitea vara la tau na nora rasua hin Iesu hin na leu non Moses peresi na pr̃ovet.

²⁴Tatuara la rasu na sava mo lo verea, pani hai la r̃ohu vara la rasua.

²⁵Ale la tapulo malmalue, matan r̃omira mo sopo matea. Hitahuna, Paul mo sile na isoiso reti isara mara, “Tanume Tapu mo verea mo tataholo mata nomim pua na sava sei pr̃ovet Isaiah mo verea mara:

²⁶‘O vano isan la tamlohi nike, ale o verea vara, Ha pa rongoa vavano, pani ha sopo er̃i rongovosahia, ale ha pa lo kilaua vavano, pani ha sopo er̃i hitevosahia.

²⁷Matan mapun la tamlohi nike la mate, ale perora la sopo rongo, ale la pelati na matara moiso, matan vara la pa sopo kilau, ale perora la pa sopo rongo, ale mapura la pa sopo rongovosahi, vara i vono la pa posi ale a pa vai mamahunira.’