Jesos Odanodaganan Odijitcige8ini8an 28:20-27

²⁰Midac 8edji 8i 8abaminagogiban acitc 8edji 8i aiamiinagogiban. Nimag8apinigo pi8abiko sagapizoneabin osa egi mikomag aa8e kakina Israel a8iagon ka piigodjin.”

²¹Midac ka niganizi8adj Coda8innig ogi nak8e8ajia8an Ponan: “Ka8in nidodji odisigosinan ojibiigan Coda (Judée) akig kidji odjimagag kin kidji mikomigo8an. Ka8in iaga pejig ki8idji anicinabeminan iima odji pi odosesi kidji pi nda tibadjimodj kegoni kek8an kidji madji ainik.

²²Misa8adj dac ni8i ndotananan adi enendaman. Nikikendananan mega mizi8ena e paba madji mikodjigadeg ii ka iji teb8etaman.”

²³Pon acitc Coda8innig ki onendamog mina8adj kidji ma8adjiidi8adj. Ii dac apitc e kijiganig, na8adj mane Coda8innig ogi nda 8abama8an Ponan ka iji tajikendjin. Kabe kijik Pon ogi aiamian ini Coda8innin. Ogi mikodan Kije Manidon Odogima8i8ini. Ogi k8ag8e cagozoman kidji teb8eta8andjin Jesosan, e abadjitodjin Moisan odinakonige8inan acitc niganadjimo8innin omazinaigani8an kidji 8abadai8emaganig adi eji teb8edj.

²⁴Nandam ogi teb8eta8a8an adi ekidondjin Ponan, kodagiag dac ka8in ododji teb8eta8asi8a8an.

²⁵Midac pepakan ka iji inendamo8adj Coda8innig. Ki ani madja8ag dac, ka ick8a ikidondjin Ponan: “Teb8esagotc ii kagi inagobanen Mino Manido 8eckadj kikitci anicinabemi8abanig, egi abadjiagobanen niganadjimo8inni Isaian.

²⁶Ogi inagoban dac Isaian oo8eni: ‘Nda 8abamik Coda8innig acitc ijik oo8eni: Kiga kitci paietetana8a, ka8in dac kiga nisidotasina8a! 8e8enda kiga kijigabadana8a, ka8in dac kiga nisida8inasina8a, kiga inag.

²⁷Ani kitci cibictig8ane8ag mega igi a8iagog, ki kibota8agendizo8ag, acitc ki pazag8abi8ag. Ka8in ockijigo8an o8i abadjitosina8an kidji 8abi8adj, acitc ka8in ota8aga8an o8i abadjitosina8an kidji nodamo8adj, acitc ka8in omidonendjigani8a o8i abadjitosina8a kidji nisidotamo8adj. Ka8in ninikag 8i inasamigaba8isi8ag. Ka8in dac nikackiasi8ag kidji kigeag8a.’ Mi ka mazinadenig niganadjimo8inni Isaia omazinaiganikag.”