Kalan Kunum 28:20-27

²⁰Nakalem sang be bokoyemomin beem mongom ete ne yulo gaayemii, yu teliwi, ne yulo kame kukuyembi te. Nakunum kumel yutaka! Isalael kawtiw alik alik nu Sunbin-Got em ‘Alik alik yulo dokoyemin kunum Mesaya ete dabalalii, e toloka!’, angse weng beem kaneloke ding dim fenbuluw te. Alik alik num fenbuluw beem mongom ete i nem teing e sok so ge konemiwi, ne ka bi te.”, yangse te.

²¹Yangei, i yan weng bokolewomeliw: “Sudia aneng fian kasel i kom kaneselew eisneng beem dulum elo fut mak boko, nulo weng kal bokoyeminba kesiliw te. Beemdiw, Sudia aneng fian koleweko, kale telese kunum mak akati ibik weng mak nulo bokoyeminba kese te.

²²Kate, nu kililuwete: Aneng aneng angom kasel i deiw kikis beem dulum elote weng on ete kuw ganbin kelewkabiliw kasike kame, kukalem ete num ibolow fukunin be kilele dolon keyema!”, dangsiliw te.

²³Dangiwi, iso, Fol eso, alik alik i weng kitokoko, “Kaem ding dim iti wensanuma!”, angsiliw te. Keko beli, kitokosiliw ding em kutim akal, kuinbele akal, diwkuw diwkuw kabalak e, Fol e akalem am matem telesiliw kawtiw banban biilo Sunbin-Got em gawman ding dim em sang be kilele mongom so bokoyemse te. Bokoyemeko, “Moses em kukuyemse weng akal, Sunbin-Got em bontem dim bakamin kunum im weng akal, alik alik biim weng be nulo kilele kukuyemete: Mesaya angsiliw kunum be Yesus ete kuw te.”, yangse te.

²⁴Yangeko, mali Fol em weng kilisiliw kunum waneng bi em weng elo “Fein te!”, dangsiliw kate, mali kawtiw i “Babo! Weng be fein weng bate!”, dangsiliw kasike,

²⁵i weng on ete kuw kesomi, amen kuw amen kuw kesiliw te. Kesomeliwi, im Fol elo iti kolew unsiliw ding dim bakate, Fol e weng mak bokoyemomele: “Sua kel akate, Sunbin-Finik e yom kawalik kumel ilo bokoyemomin weng mak Sunbin-Got em bontem dim bakamin kunum Aisaya elo bokolewomele:

²⁶‘Aisaya, ku uneko, kawtiw biilo weng kale bokoyemomelew: ‘Yu tiak ding kilikabiliw kate, weng beem mongom e yu kilele dolon kuw kelinba kesomi, akokow kelewkabiliw te. Yu weng be fein atemokoliw kate, beem mongom e yu kal kelinba kekabiliw te.

²⁷Nimtew angom? Kawtiw biim ibolow fukunin e atin kuw kou keyembe kasike. I weng be kilele wosulinba kekabiliw kawtiw kesomi, kiin akati gal kuw kesomi, akalbin kawtiw ite te. Mesik esik im kiin be atemsomeliwi, i weng kiliko, ‘Ibolow fukunin ken kuw kulubuluw kai!’, angomi, biim sili sili kukuw be koleweko, nem dim elo teliwi, ne ilo kilelyemoki kasike.’, yangolewka!’, dangse kale.