1Paulo no Anuture micte, Kristo Jesuzi juju bâfuawec irec biŋedâŋ muiŋnepemurâ Kristo Jesure aposolo epozi
2Timoteo motec biaŋ‐nane gore papia ʒi qâreŋkekopac. Anutu Mamac â Wofuŋ‐nâŋec Kristo Jesu eraonec aki anonoc, uruc jauŋ â wama gorao fotâcnerâ fozejec.
3Mamac ŋosafâc‐nane jaŋe maŋfâsâc juhuc tuczi tuc Anuture kiŋaŋ qawarekupie ɋâric‐jeŋic noni iŋuc jaha eekopaczi daŋge âzâcnehuc nunumuo ʒuʒuhuc ŋafe furec manasucguhuc juekopac.
4Nore ki busâqoc emeŋ, irec manasurâ honecguhuc bubiaŋ sâko manapemurâ enareekac.
5Erâ mamanasiŋ fârine fogarekac, irec wâc manasuekopac, mamanasiŋ i hâcne mimige Loisi â neŋgocge Eunike jaherao foweczi gorao wâc fotâcnewec fokac i manakopac.
6Eme no irec hâcne manasu‐gararâ mupe: No menane qizecgao râepe Anutuzi jambuŋ tahacguwec i hehâroŋketec ʒocne fuazejec.
7Ehuc ʒiŋuc manasuzemec: Anutu e hâbi‐nâŋec goroŋkeocte mâro mi nârewec, tâpirihec â maŋjauŋhec â maŋsowahec enaŋte nârewec.
8Irec go Wofuŋ‐nâŋecte biŋe mutaniŋkecmurâ mimi gaŋgaŋ mi ezemec, erâ kâpâcwâru ŋicticne nore dâŋ mucmurâ acmeruŋ wâc mi ezemec. Go Anutuzi tâpiri gareme sâc no qâsuecnurâ Biŋebiaŋte erâ ʒârâ hâriŋ faio juzemec.
9Eki hâcne bâpiaŋ‐nâporâ tiridâŋ‐ticnezi hefârec‐nâpowec. I biaŋ‐nâŋecte mâcne, e jahac maname fowecte aki anonoc‐ticnere erâ iŋuc enârewec. I mârâc jaha jâmbâŋ Kristo Jesure erâ biŋe qanârekicne.
10Eme fârine fufua ine dameŋ ʒi bâbâpiaŋ‐nâŋec Kristo Jesu wahame fua tâcnewec. Eki hâcne hâmoc qâmizierâ juju â wiac fofo sanaŋ Biŋebiaŋko bajaŋgeŋke‐nârewec.
11Eme no irec biŋe mumu â aposolo â qaqazu jupemurâ munarekicne.
12No irec hâcne ʒârâ hâriŋ faio juekopac, ehuc mi mimieekopac. No manasiŋkeekopac ere maŋjahec mi eekopac, aricne, no ʒiŋuc manapaŋkeekopac, e tâpiriheczi ʒeŋaŋ‐nane sâcne soŋaŋke‐narehame dameŋ sâko maickezokac.
13Dâŋ fârine irec biri‐ticne qazu‐garepo ijaha bâjâpezemec, i Kristo Jesu manasiŋkehuc â maŋzi jauŋkehuc iŋuc ezemec.
14Tiri Mâro maŋnâŋecko juekac eki neŋgoc ŋegarehame miti kâdoc qârârie‐garekicne, i aimuŋ soŋaŋketec fogarezejec.
15Asia mâreŋko behecnu‐fârembiŋ i manameŋ, Figelo â Hemogene jahe mâmâc.
16Wofuŋ e Onesiforo ere wiacfâc maŋuruc qajarezejec. Mamac‐jeŋiczi kâpâcwâru ŋic nore mi takickeha bubiaŋ hati qanarehuc juwec.
17E Roma haeo fisirâ ʒoɋac basacnuku bâfuacnuwec.
18Wofuŋzi manaha dameŋ sâko Wofuŋtao uruc jauŋ bâfuazejec. E Efesoo wâc kiŋaŋ qaqa gie wemo afecne bawec i go gahac hone manac emeŋ.
