1Pues nen xeꞌ Pabloen jax inteꞌ apóstol tuaꞌ e Cristo Jesús umen que bꞌan ucꞌani e Dios xeꞌ ixin uyajcꞌon e cuxtar tama e Cristo Jesús xeꞌ machi tuaꞌ acꞌapa bꞌan cocha cay uyareon ixnix.
2War intzꞌijbꞌa e carta era tabꞌa, Timoteo xeꞌ inchoj oit nimener y xeꞌ bꞌanet cocha inteꞌ nisitz. Pues achꞌamic e tacarsiaj taca e cꞌunersiaj y e jiriar tuaꞌ Catata Dios y tuaꞌ Cawinquirar Jesucristo.
3Pues conda incꞌajbꞌuet inxin intattzꞌi ucꞌabꞌa Cadiosir xeꞌ war unjtzꞌi ut taca inteꞌ bꞌijnusiaj xeꞌ imbꞌutz bꞌan cocha cay uchiobꞌ tunor nitata viejobꞌirobꞌ, y tamar era war incꞌajti taca e Dios tamaret tama e día y acbꞌar ubꞌan.
4Y acꞌajpa taca nimener conda cay uqꞌuiet conda locꞌoyen, y coner war incꞌani tuaꞌ inwiret otronyajr tuaꞌ erer intzayjres nibꞌa tacaret.
5Y cꞌar nimener que ayan acꞌupesiaj xeꞌ erach tama e Dios bꞌan cocha ayan tama anoya xeꞌ ucꞌabꞌa Loida y bꞌan cocha ayan tama atuꞌ xeꞌ ucꞌabꞌa Eunice xeꞌ cay cꞌupseyanobꞌ tama e Dios bꞌajxan. Y tamar era war innata que lar acꞌupesiaj tabꞌa tama e Dios ubꞌan.
6Y tamar era cꞌani inwaret que ira awacta atajpa acꞌampibꞌir lo que ajcꞌunet umen e Dios conda cay incatbꞌu nicꞌabꞌ tamaret conda incꞌajti taca e Dios tamaret.
7Porque Cadiosir uyajcꞌon ucꞌotorer majax tuaꞌ caxin cabꞌacta sino que uyajcꞌon ucꞌotorer tuaꞌ uqꞌuecꞌojsion, y tuaꞌ aquetpa incꞌun cawirnar, y tuaꞌ uyubꞌion cacojco cabꞌa tuaꞌ machi cache e mabꞌambꞌanir.
8Y ira isubꞌajra tuaꞌ achecsu uyojroner e Dios tamar Cawinquirar tut e gente axin, y ira isubꞌajra tamaren umen que turen tara tama e cárcel. Pero natan que watar lo que ucꞌani tuaꞌ anumse abꞌa tamar umen que war achecsu uyojroner e Dios axin, pero Cadiosir axin uyajqꞌuet ucꞌotorer tuaꞌ uyubꞌiet anumse tunor era.
9Porque jax Cadiosir xeꞌ ixin ucorpeson y xeꞌ ixin usicbꞌon tuaꞌ caxin cache lo que erach tut. Y ixin usicbꞌon umen que bꞌan war ucꞌani y majax umen lo que cay cache xeꞌ imbꞌutz tut, sino que usicbꞌon umen que cꞌani uyajcꞌon utacarsiaj tama e Cristo Jesús, y bꞌan cay uche conda ne mato uche or e rum era.
10Pero coner chectesna ticoit que Cadiosir cꞌani uyajcꞌon utacarsiaj tamar lo que uche conda checta Cawajcorpesiaj xeꞌ jax e Cristo Jesús. Porque jax e Jesús era xeꞌ ixin utijres tunor ucꞌotorer e chamer, y xeꞌ tamar uchamer era ixin uchectes ticoit que erer cachꞌami e cuxtar xeꞌ machi tuaꞌ acꞌapa.
11Pues jax e ojroner era que Cadiosir usicbꞌen tuaꞌ inchecsu tut e gente axin, y usicbꞌen tuaꞌ inquetpa inteꞌ apóstol y tuaꞌ inquetpa inteꞌ ajcanseyaj tuaꞌ inxin incanse tunor era tut e gente axin.
12Y umen que cay inchecsu uyojroner e Dios tama e corpesiaj era war innumse nibꞌa coner, pero nen machi insubꞌajra tamar era porque war innata chi tamar war incꞌupseyan. Y cꞌapa inturbꞌa nibꞌa tama e Dios y innata ixto yaꞌ que ayan ucꞌotorer tuaꞌ ucojcuen este que acꞌotoy e día conda asutpa watar jaxir otronyajr.
13Pues entonces cojcon e canseyaj lo que cay oybꞌi inche y cansen net bꞌan taca cocha era ubꞌan. Pero ucꞌani tuaꞌ icꞌupseyan tama e Cristo Jesús tuaꞌ utacret, y ucꞌani tuaꞌ ayajta ut tunor e gente bꞌan cocha ucꞌani e Cristo ubꞌan.
14Cojcon tunor e canseyaj xeꞌ erach xeꞌ ajcꞌubꞌiret tacar utacarsiaj Unawalir e Dios xeꞌ war aturuan tama cawalma.
15Pues warix anata que tunor tin e war acꞌupseyanobꞌ tama Cawinquirar tama e departamento Asia uyactenobꞌix. Y tujam tin e cay uyactenobꞌ aquetpobꞌ e Figelo y e Hermógenes.
16Pero que Cawinquirar uwirsic meyra ucꞌunersiaj tut e Onesíforo taca tunor tin e turobꞌ tama uyotot, porque jaxir cay yopa taniut tuaꞌ utzayjresen y machi subꞌajra ut tamaren motor que cacharen tara tama e cárcel.
17Porque conda yopa tama e chinam Roma cay usicbꞌen tuaꞌ unata tiaꞌ turen, y machi utajwien wacchetaca pero machi uyacta tuaꞌ usicbꞌen este que utajwien.
18Que Cawinquirar axin utacre e Onesíforo era tuaꞌ utajwi meyra ucꞌunersiaj e Dios conda acꞌotoy e día tuaꞌ achena juzgar tunor e gente. Pues net warix anata que jaxir cay utacrion meyra conda turonto tama e chinam Éfeso.
