Timoteuj II 1

1

2

3

4

¹PAULUJ, wanporon en Iejuj Krijtuj pan kupur en Kot, duen inau en maur ren Krijtuj Iejuj.

²On Timoteuj nai jeri kompoke pai: Mak o kapunlol, o popol jan ren Kot Jam, o Krijtuj Iejuj atail Kaun en mi re om.

³I danke Kot, me i kin papaki injen ai min jan ren jam ai ko maj due i kin poden lamelame uk ni ai kapakap akan ni pon o nin ran.

⁴O inon ion kilan uk ni ai tamatamanta duen om janejan, pwe i en direki peren.

⁵O ni ai tamanda pojon melel, me mi re om, me mi maj ren in om liakalap Loij o in om Oinike o i aja, me a pil mi lol om.

⁶Ari, i me i men kataman kin uk, koe en kamakamaur pai en Kot, me mi lol om ki pwil pa i kat po om,

⁷Pwe Kot jota kotiki on kitail nen en majak, a en manaman, o limpok o lelapok.

⁸Koe ari der namenokki om kadedeki atail Kaun, de nai japwilim a jalidi men, a koe en ian ia kamekameki ronamau duen manaman en Kot.

⁹Me kotin kamaur kitail da o worone kin kitail woron jaraui, kaidin iran atail wiawia kan, a pweki pein a kupur o mak me a kotin kupura on kitail ren Krijtuj Iejuj mon tapin kaua.

¹⁰A majan wet a janjaleda ni en atail Jaunkamaur Iejuj Krijtuj, me kotin kapuiala mana en mela, ap kapwareda maur o jo mor pajan ki ronamau.

¹¹I me i kajapwiladan, pwen jaunkair o wanporon, o jaunpadak en men liki kan.

¹²I me i pil kin kalokolok ki. A i jota kin namenok kila, pwe i aja me i kin kamelele; o i aja, me a kak nekinekid ai pai, me i aleer, lao lei ran o.

¹³Dadaurata jon en padak en kamaur, me koe ron jan ia er, o pojon o limpok ren Krijtuj Iejuj.

¹⁴Pai mau o me pwilidier re om, pera ki Nen jaraui, me kotikot lol atail.

¹⁵Koe aja, me irail karoj, me mi Ajien, wuki jan ia; kijan ir Pikeluj o Ermokenej.

¹⁶Kaun o en kotin maki on toun im en Onejiporuj, pwe pan pak toto a kadek on ia, o a jota namenok ki ai jal mata.

¹⁷Pwe ni a mi Rom, a nantion rapa kin ia, ap diar ia da.

¹⁸Kaun o en kotin kupura on i kalanan en Kaun o ni ran kokodo. A koe aja mau, duen a papa nan Epijuj.