2 Kronicles 19:5-11

⁵Ra reb fapi binaw nu Judah ni kan yororiy nib gel ni fan ko mael me duwgiliy e pi’in ni ngar manged tapuf oloboch riy

⁶me yog ngorad ni ga’ar: “Ngu’um tiyan’med ko tin gimed be rin’, ya gimed be puf oloboch ni gathi gelngin e girdi’ e gimed be maruwel ngay, machane gelngin SOMOL, ma bay romed ko ngiyal’ i n’en ni gimed be duwgiliy e n’en ni wenegan e kireb rok be’.

⁷Ere ngi i par madgun SOMOL u lanin’med mi gimed tiyan’med ko tin gimed be rin’, ya SOMOL ni Got rodad e dar ma kadan’ ko n’en nib sasaliyab ma darma lanyan’ ara fanay pulwon e kireb.”

⁸Mu lan yu Jerusalem e ki mel’eg Jehoshafat e pi Levite, nge prist, nge ku boch e pi’in ma gagiyeg ni ngar manged pi tapuf oloboch ko pi yu pa’ i oloboch nib l’ag rogon nga reb e Motochiyel rok SOMOL ni kan th’ab fa ba pa’ i oloboch u thilin e girdi’ nu lan fare binaw.

⁹Ma ba’aray e pin’en ni yog ngorad ni ngu’ur rin’ed: ‘Thingar um rin’ed e pi maruwel romed ni bay madgun SOMOL u wun’med, mu yul’yul’gad ngu’um folgad rok u gubin e tin gimed be rin’.

¹⁰Re ngiyal’ nra yibnag reb e girdi’ romed ni be’ u reb e pi binaw ney ba pa’ i oloboch ngomed ni murung’agen e mathang pogofan ara reb e pi motochiyel ni kan th’ab, ma thingar mogned ngorad rogon e n’en ni ngu’ur rin’ed ko ngiyal’ ni yi be pithig fare pa’ i oloboch, ya nge dabi buch e rorad ni fan e yad be denen nib togopluw ngak SOMOL. Fa’anra dab mu rin’ed ni aray rogon, me gimed nge girdi’ romed e gimed ra thamiy gelngin e damumuw rok SOMOL. Ma fa’an gimed ra rin’ e maruwel romed ma dabi buch e romed.

¹¹Amariah ni Prist ni Th’abi Ga’ e ir e bay mat’wun nra yog e bug ni tomur e thin u gubin e yupa’ i oloboch nib l’ag rogon ko motochiyel rok SOMOL, me Zebadiah nib mo’on ni fak Ishmael ni governor nu Judah e ir e bay mat’wun ni nge yog e bug ni tomur e thin u gubin e yupa’ i oloboch. Pi Levite e maruwel rorad ni ngar guyed rogon ni tin kan turguy u tagil’ e puf oloboch e yira rin’ ni aram rogon. Mu athamgilgad ngam rin’ed e pin’ey ni aray rogon, mang e yigi par SOMOL u ba’ rok e en nib mat’aw!”