1Na, menge kedowa ko, ibeg ko ipetaga-taga kenyo se ininang te menge otaw egpemenal ki Cristo kidoen te Masidonya, so pineokit te tabang te Timanem, mèpiya se ininang dan.
2Pengkey ontò dan nelimahan so pinemilang dan, meneng labi dan pa neluba, aw bowasag dan te pegpemegay dan te bowang, pengkey ontò dan sagkep,
3so lekat te keagka te pedowan dan, imbowang dan se nebatog dan imbegay. Netegahan ko te doen ibeg dan memegay te labi pa dakel,
4so ontò dan nemoyò diyà kanak aw mepakay dan memegay te bowang diyà te menge doma sakop te Timanem nelimahan.
5Aneng-aneng ko, kenà dakel se ibegay dan, meneng ontò kedì dakel se imbegay dan. Meneng labi pa mèpiya, so onà dan imbegay diyà te Pengolo se pegkeotawun dan. Penga niyan, migtelaban dan kanak, so yan se ibeg te Timanem kandan.
6Na, ontò den neluba se pedowan ko, so dakel se imbowang te menge otaw kidoen te Masidonya. Yan se doun te somogò a ki Tito te lomikò doton kenyo, amon entagen din se pedowan niyo, amon tomanen niyo se pegtipon te bowang, so sikandin se migtebò mig-antag te pedowan niyo kedengan.
7Ontò kaw den nedengeg, so ontò kaw egpemenal te Mèpiya Indan, aw magsen kaw migtoladà, aw netaga-taga kaw te kebenalan, aw measeb kaw egtolò te Timanem, aw dakel se pedowan niyo kanak. Ibeg ko, medengeg kaw heman pineokit te pegtabang niyo diyà te doma otaw nelimahan.
8Eked ko sikiyo sogoi memegay. Meneng ibeg ko ipetaga-taga olò kenyo se keaseb te doma otaw nemegay, amon ketegahan ko aw benal doen dakel pedowan niyo.
9Ikà niyo egkelibel te tabang te Pengolo tadon si Jesu Cristo, so peg-ogpà din doton te langit, sikandin se tig-apò te kedita, meneng tinenanan din se kedita niyan, aw migpekeotaw amon tebangan kaw din, amon lekat kenyan meketig-apò kaw te mèpiya doton te langit.
10Na, pengkey eked ko sikiyo sogoi, meneng seini se aneng-aneng ko. Te monà omay, lekat te ibeg niyo se migtebò kaw migtipon te kwarta ibowang. Mèpiya aw tomanen niyo den se pegtipon kenyan.
11Kedengan te pegtebò niyo te pegtipon, ontò meagka se pedowan niyo. Mèpiya aw eked kaw lokas te pegtoman kenyan taman te mebatog niyo ibegay.
12Aw meagka se pedowan niyo, mèpiya aw ibegay niyo se taman te mebatog niyo, so eked kaw legesi memegay te labi pa dakel kenyan.
13Eked a keibeg aw megkeyaman se doma otaw pineokit te pegpemegay niyo kandan, aw penga niyan kelimahan kaw heman.
14Meneng ibeg ko megpetebangay kaw. Aw doen tabang ibegay niyo doton te otaw nelimahan, doen heman kwani aldaw tomabang dan kenyo aw simpana sikiyo se kelimahan. Yan se pegpetebangay niyo.
15Doen insolat diyà te kagi te Timanem tepad te pegpetebangay te menge Judiyo nengimon te kànen imbegay te Timanem kandan lekat te langit. Seini se kagi insolat, “Se menge otaw nengimon te dakel kànen, wedad lampas. Aw se menge doma otaw nengimon te deitek kànen, wedad kolang. Nebesog se kedita dan.”
16Migpesiontong a diyà te Timanem, so lekat kandin se kedakel te pedowan i Tito kenyo, iling te kedakel te pedowan ko kenyo.
17Ontò neluba si Tito te pegdineg din te ibeg ko lomikò sikandin doton kenyo. Meagka se pedowan din domoton kenyo.
18Ipetaking ko ki Tito se sebad kedowa tadon egpemenal. Nedengeg sikandin diyà te kedita te otaw nemenal ki Cristo, so biyasa sikandin egtoladà te Mèpiya Indan tepad ki Cristo.
19Kenà olò nedengeg, meneng pinemallì heman sikandin te kedita te otaw nemenal ki Cristo amon tomaking kanak mengibing te bowang niyo diyà te menge otaw egpemenal nelimahan. Ibingen ko iyan doton kandan amon iduyun se Pengolo, aw amon ketebangan ko se menge otaw nelimahan doton.
20Ibeg ko, ontò imendayan se pegpengibing day te dakel bowang sìyan, amon wedad otaw mekesila kenami.
21Yan ipetaking ko sìyan sebad otaw egkeseligan amon ketegahan te kedita te otaw aw Pengolo te metòlid se eg-inangen day, so yan se ibeg ko.
22Na, doen heman sebad kedowa tadon isogò ko doma i Tito komidoen kenyo. Se otaw seini, melikit ko egkitaen se menge inang din aw ontò measeb. Labi pa meagka se pedowan din komidoen kenyo so egseligan kaw din.
23Na, si Tito, sikandin se doma ko megtoladà kenyo. Sìyan didowa otaw domoma kandin, yan se insogò te menge doma tadon nemenal ki Cristo. Iduyun tadon si Cristo pineokit te inang dan.
24Yan mèpiya aw ipekità niyo te dakel se pedowan niyo kandan, amon metaga-taga se menge doma otaw egpemenal ki Cristo doton te teg sebad-sebad lonsod te benal se inikagi ko te mèpiya se inang niyo.
