1Wedad ontong te pegduyun ko te kanak pegkeotawun, meneng iling te neleges a tomaba te menge otaw kidoen. Meneng iindan ko den kenyo se menge impekità te Pengolo kanak, aw doma impetaga-taga din.
2Kedengan te sempolò teg epat den se omay se minokit, neibing a doton te langit eg-ogpaan te Timanem. Wedà ko ketegahi aw neketaking se lawa ko te pedowan ko doton. Timanem olò se netaga-taga kenyan.
3Dimateng a doton te ogpeanan dotonan te kedita te otaw egpemenal. Wedà ko ketegahi aw neketaking se lawa ko te pedowan ko doton. Timanem olò se netaga-taga kenyan.
4Se dinineg ko doton, yan se eked ko kepakay iindan.
5Pengkey mepakay aw domuyun a te kanak pegkeotawun tandà te impekità te Timanem kanak, meneng iindan ko olò se menge kelomayan ko.
6Pengkey iindan ko se kedita neokitan ko, meneng kenà a iling te wedad inenengen, so iindan ko olò se benal. Meneng eked a duyun te kanak pegkeotawun, so ibeg ko eked peg-aneng-aneng se doma otaw tepad te kèpiya ko melangkaw pa diyà te eg-inangen ko egkitaen dan, aw ipegtoladà ko egdinegen dan.
7Ibeg te Timanem, eked a pegpelangkaw-langkaw tandà te kedita te impekità din kanak. Pinebeyaan te Timanem se sebad sogounun i Satanas memegay kanak te kelimahan eked keabat, amon eked a pegpelangkaw-langkaw.
8Meketelo a pegtawal-tawal diyà te Pengolo. Nemoyò a te ebaten din se kelimahan ko.
9Meneng wedà din ebati. Timaba sikandin kanak, kagi din, “Pengkey eden se keokitan no, ontò botong se tabang ko kamno, so aw megkelomay ka, yan ontò ko ipekità te metolos a.” Yan se kagi din kanak. Yan gayed a den egkeluba te doen kelomay ko amon ketegahan te menge doma otaw te doen eneg imbegay i Cristo diyà kanak.
10So egtaking a ki Cristo, ontò a den egkeluba pengkey egkelomay a, aw tompuyusen a, aw egkelimahan a, aw egpemilangen a, aw eg-elegen a, so aw egkelomay a, yan egbegayan a te Timanem te kagsen amon meketayod a.
11Siak se iling te otaw wedad inenengen so dimuyun a te kanak pegkeotawun, meneng sikiyo se migleges kanak. Mèpiya pa peden aw sikiyo se domuyun kanak. Pengkey doen menge kelomayan ko, meneng kenà melangkaw diyà kanak se menge otaw doton kenyo eg-ikagi te sikandan se benal sogounun i Cristo.
12Peg-ogpà ko kidoen kenyo kedengan, kinità niyo te benal a sogounun i Cristo pineokit te menge inang ko. Melayat se pedowan ko kenyo, aw kinità niyo se menge pengilala ininang ko, aw menge kepelahan, aw menge inang metolos.
13Se menge ininang ko diyà te menge otaw nemenal ki Cristo doton te doma lonsod, yan se onawa te ininang ko kenyo. Sebad olò se wedà ko peg-onewai, so wedà ko kinewai se togpò lekat kenyo, meneng kininawà ko se togpò lekat kandan. Pegwedadi niyo bag se salà ko sìyan.
14Meketagad a den meglegeb kidoen kenyo te iketelo. Aw domoton a kenyo, wedad heman pemoyoen ko lekat kenyo, so kenà kwarta niyo se ibeg ko, meneng ibeg ko se kedakel te pedowan niyo kanak. Iling kaw te batà ko. Kenà mengisù se menogpò te amay aw inay dan, meneng amay aw inay se menogpò te batà.
15Meluba a memegay te kedakel te kwarta ko aw kepagod ko amon kèpiyaan kaw. Pengkey deitek se pedowan niyo kanak, meneng ontò dakel se pedowan ko kenyo.
16Pengkey benal wedad pinemoyò ko kenyo, meneng doen ekon eg-ikagi te mig-akal a kenyo aw miglegawa.
17Meneng te pegdoton te menge doma otaw insogò ko kedengan, wedad palos inabat ko kenyo pineokit kandan.
18Lekat te ibeg ko, impedoton ko kenyo si Tito aw sìyan sebad kedowa tadon insogò ko doma kandin, meneng wedad pinemoyò din diyà kenyo. Onawa se eg-inangen day si Tito, so egsebad se pedowan day.
19Eden niyo aw sikiyo se petega-tegahan te wedad salà ko pineokit te pegsolat ko seini, so ibeg ko kenà sikiyo se meluba kanak, meneng Timanem se meluba kanak, so egtaking a ki Cristo. Menge kedowa ko, simolat a te kedita nini amon tebangan kaw te pegtaking niyo te Timanem, so nedekelan ko sikiyo te pedowan.
20Netetana a aw domateng a kidoen kenyo, kitaen ko sikiyo meg-inang te kenà ko ibeg. Aw yan se inangen niyo, inangen ko heman kenyo se kenà niyo ibeg, so segdahen ko sikiyo. Netetana a aw kitaen ko sikiyo megpedindilay, aw megpeingaay, aw megpeopalay, aw megpedemetay kaw. Doen besi heman kitaen ko menge otaw egbaet-baet, aw egbelikbik, aw egpelangkaw-langkaw, aw egsamok.
21Pengkey metòlid se intoladà ko kenyo, meneng netetana a so meyàyà a diyà te Timanem aw domateng a kidoen kenyo tandà te salà niyo. Melidò a aw doen pa menge otaw nemenal kidoen kenyo wedà pegselsel te peg-inang dan te medaet kedengan, aw peglayok dan te kenà kandan esawa, aw pegkemetibayi dan.
