1Na, pineokit te keido te Timanem kanak, insogò a din megtoladà aw yan eked a lengà.
2Ontò ko pig-ekedan se medaet inang, sìyan megbolon aw mekeyàyà. Wedà a peglegawa te doma otaw. Meneng ontò ko binangal se pegtoladà te kagi te Timanem. Netegahan te Timanem te kebenalan se intoladà ko, aw netegahan iyan te kedita te otaw.
3Meneng se Mèpiya Indan tepad ki Cristo intoladà ko, wedà iyan kelebeti te menge otaw egpesalo doton te pelumun,
4so se menge otaw wedà pemenal, impekagsen i Satanas se olo dan amon eked dan kelebeti se Mèpiya Indan tepad te kelangkaw i Jesu Cristo, so egkitaen se keanyag te Timanem diyà te bawa i Cristo.
5Sikandin se Pengolo eglowan aw yan se gayed ko ipegtoladà. Kenà ibeg ko iduyun se kanak pegkeotawun, meneng neketabang a kenyo pineokit te pegtoladà aw tandà te kedakel te pedowan ko ki Cristo.
6Peg-inang te Timanem te keneyonan, mengitngit aw penga niyan ininang din se kelowahan. Iling kenyan se ininang din kanak, so kedengan, iling te doen kengitngit diyà te pedowan ko, so wedà a kilala ki Jesu Cristo. Meneng linowa din den se pedowan ko amon ipekità din kanak se kelangkaw te Timanem diyà te bawa i Cristo.
7Iling a te koden wedad keelagà sinolan te bolawan meelagà, so pengkey wedad keelagà ko, meneng insalig te Timanem kanak se pegtoladà te kebenalan tepad ki Cristo amon ketegahan te menge otaw te sikandin se eglekatan te tolos. Kenà iyan lekat kanak.
8Pengkey medita se egsamok kanak, meneng wedad mekebelabag kanak. Pengkey egkebulung a, meneng kenà a eglengà.
9Gayed a egpemilangen te doma otaw, meneng eked a tenani te Timanem. Pineeleg a te doma otaw, meneng wedà a kematay.
10Melikit a agpet matay iling te neokitan i Jesus kedengan, meneng gayed a din ipegpelowà amon ketegahan te doma otaw te benal neantay si Jesus.
11Melikit a agpet eg-imetayan tandà te pegtaking ko ki Jesus, amon te eked a pa kematay, onà kitaen te menge otaw se keentayan i Jesus diyà te lawa ko.
12Pengkey doen kelimahan neokitan ko tandà te pegtoladà ko, meneng kunù doen ontong te pedowan niyo.
13Doen insolat diyà te kagi te Timanem, “Iindan ko se pinemenalan ko.” Iling heman kenyan se kanak pegpemenal, so pengkey nelimahan a, meneng iindan ko pa se pinemenalan ko.
14Netegahan ko den te Timanem se mig-antay ki Jesus lekat te nematay, aw yan entayen a din heman, so doen pegsebad te pedowan ko diyà ki Jesus. Ibingen te Timanem se kedita tadon egpemenal doton te dapag din.
15Pengkey egpemilangen a tandà te pegtoladà ko, meneng ibeg ko doen kèpiyaan niyo, amon pineokit te pegladlad te tabang te Timanem diyà te medita otaw, doen heman labi pa medita otaw megpesiontong kandin amon sikandin se iduyun.
16Yan se doun te wedà a lengà. Pengkey melomay se lawa ko, meneng se pedowan ko gayed egkagsen.
17Pegpemilang kanak, aneng-aneng ko meketayod a, so doen temanan niyan. Aw meketayod a te pegpemilang kanak, ontò mèpiya se ibegay te Timanem kanak doton te langit. Ontò mèpiya se ontong wedad temanan.
18Kenà ontong dini te keneyonan se ehaen ko, so megkewedad iyan te eked kenamay. Meneng gayed ko egpelimanan se benal ontong eked kitai te mata dini te keneyonan, so wedad temanan niyan.
