2 KING TAUDIA 10:8-19

⁸Hereva mailaia tauna be Iehu dekenai ia ginidae, ia gwau, “Ahaba ena natuna tau edia kwarana ibounai idia mailaia vadaeni.” Vadaeni Iehu ese oda ia gwauraia, ia gwau, “Unai kwaradia ibounai be senu rua dekenai hanua ena magu iduara raka vareai gabuna dekenai do umui haboua, bona unuseni do idia noho ela bona dabai.”

⁹Daba neganai, Iehu be magu iduara gabu dekenai ia lao, ia gini, bona taunimanima dekenai ia hereva, ia gwau, “Momokani lau ese king Iorama hadikaia dalana lau tahua, bona lau alaia mase, umui be mai emui kerere ta lasi. To inai iena natuna ibounai be daika ese idia alaia mase?

¹⁰Unai dainai do umui diba momokani, Lohiabada ena hereva ibounai Ahaba ena bese totona gaudia be do idia vara momokani. Lohiabada ese iena hesiai tauna Elia ena uduna dekenai ia gwauraia hereva ena kara be ia karaia vadaeni.”

¹¹Vadaeni Iehu ese Ahaba ena famili taudia oredia Ieserele dekenai ia alaia mase. Ahaba ena opesa taudia ibounai, bona iena turana momokani taudia, bona iena hahelagaia taudia, be Iehu ese ia alaia ore, ta ia mauri noho lasi.

¹²Iehu be Ieserele dekena amo ia toreisi, Samaria dekenai ia lao gwauraia. Dala dekenai, Betekede dekenai ia ginidae. Unai be mamoe naria taudia edia gabu ta.

¹³Unuseni king Ahasaia ena bese taudia be Iehu ese ia davaria, ia nanadaia, ia gwau, “Umui be daika taudia?” Idia haere, idia gwau, “Ai be Ahasaia ena varavara taudia, bona ai be Ahaba ena bese taudia bona Iesebele ena natuna do ai vadivadi henia totona ai mai.”

¹⁴Iehu ese iena tuari taudia ia oda henia, ia gwau, “Idia ibounai do umui dogoatao!” Vadaeni ibounai idia dogoatao, bona Betekede ena ranu guri ena badinai idia alaia mase. Mase taudia be 42. Ta ia mauri noho lasi.

¹⁵Iehu ese ma ia toreisi, bona dala dekenai Iehonadaba Rekaba danu idia hedavari. Vadaeni Iehu ese Iehonadaba ia hanamoa, ia gwau, “Oi ese lauegu kara oi ura henia momokani noho, lau ese oiemu kara lau ura henia momokani hegeregerena, a?” Iehonadaba ese ia haere, ia gwau, “Io.” Iehu ia gwau, “Bema unai bamona, oiemu imana lau dekenai oi henia.” Vadaeni Iehu, ese iena kariota dekenai Iehonadaba ia abia daekau.

¹⁶Iehu ma ia gwau, “Oi mai, ita lao, bona do oi itaia dahaka siahu karadia Lohiabada dainai lau karaia noho.” Vadaeni idia ruaosi be kariota dekenai Samaria dekenai idia lao.

¹⁷Samaria dekenai idia ginidae neganai, Iehu ese Ahaba ena bese taudia, do noho taudia, ia alaia mase, ela bona ibounai ia haorea, Lohiabada ese Elia ia hamaoroa hegeregerena.

¹⁸Vadaeni Iehu ese Samaria hanua taudia ibounai ia haboua, idia dekenai ia hereva, ia gwau, “Ahaba ese Bala ena hesiai gaukara ia karaia sisina, to lau Iehu ese Bala ena hesiai gaukara do lau karaia bada.

¹⁹Unai dainai Bala ena peroveta taudia, bona Bala dekenai idia tomadiho henia taudia, bona Bala ena hahelagaia taudia ibounai do umui boiria, idia mai, ta ese iena ruma dekenai do ia noho lasi, badina be boubou karana badana ta do lau karaia, Bala ena. Bema tau ta ia hedinaraia lasi, unai tau be do lau alaia mase.” To Iehu ese idia ia koia, ia ese Bala dekenai idia tomadiho taudia ibounai do ia alaia ore gwauraia.