1 Reye 18:5-21

⁵Acaboba Abdíaa nãwã jarasia: –Dadji druad̶e do zaqueza idjab̶a baido ʌ̃taa bogadrʌ b̶eaza wãnia. Chiruada ununisicada dadji cawayoba, mula bid̶a cod̶amãrẽã. Mãwã dadji animarãra jũma quininaẽ́a.–

⁶Ãdjiza jarasid̶aa sãma wãnida. Acabora o ab̶aare wãsia. Abdíara dewara óare wãsia.

⁷Od̶e nĩne Abdíara Elía ume quĩrãdjusid̶aa. Abdíaba Elíada jãwã b̶ʌda cawasid̶e idji quĩrãpita chĩrãborod̶e b̶arru cob̶eped̶a nãwã jarasia: –Mʌ̃ boro Elía, ¿bʌda jãwã b̶ʌca?

⁸Elíaba panusia: –Mãẽ, mʌ̃da jãwã b̶ʌa. Bʌ boro Acaboa jarad̶e wãdua mʌ̃ra nama b̶ʌda.–

⁹Maʌ̃ne Abdíaba panusia: –¿Mʌ̃a cãrẽ cadjiruada od̶a bẽrã bʌa Acaboa mãwã jarad̶e wãbi b̶ʌ? Mãwã jarad̶e wãibʌrʌ idjia mʌ̃ra beaya.

¹⁰Bʌ Ãcõrẽ zocai b̶ʌ quĩrãpita mʌ̃a wãrãneba jaraya: mʌ̃ boro Acaboba druaza bʌra jʌrʌbibadjia. Baribʌrʌ jũmarãba jarabadjid̶aa bʌra ãdjirã druad̶e neẽ́da. Maʌ̃ne Acaboba ãdjirãa wãrãneba jarabibadjia bʌra wãrãda ãdjirã druad̶e neẽ́da.

¹¹Maʌ̃da ¿bʌ nama b̶ʌda mʌ̃ boro Acaboa jarad̶e wãbi b̶ʌca?

¹²Mʌ̃ wãnacarea Ãcõrẽ Jaureba bʌra mʌ̃a adua b̶ʌmaa edeisicada. Bʌ nama b̶ʌda Acaboa jarasira maʌ̃ne idjia bʌda unune zeẽ́bʌrʌ, mʌ̃ra beaya. Quĩrãnebadua warra ed̶aʌba mʌ̃a Ãcõrẽra bio waya b̶ʌda.

¹³¿Mʌ̃a od̶ara bʌ́a jarad̶aẽ́ panʌca? Acabo quima Jezabelba Ãcõrẽneba bed̶eabadarã quenabisid̶e mʌ̃a eya uria umé panʌne ãdjirãnebemada cien mĩrũbicuasia. Uriaza cincuenta mĩrũbicuaped̶a baidoda, cod̶i sid̶a ãdjirãa diasia.

¹⁴Maʌ̃da ¿bʌ nama b̶ʌda mʌ̃ boro Acaboa jarad̶e wãbi b̶ʌca? Mãwã jarad̶e wãibʌrʌ, idjia mʌ̃ra beaya.–

¹⁵Baribʌrʌ Elíaba panusia: –Mʌ̃ra Ãcõrẽ jũma poya b̶ʌ nezocaa. Idji quĩrãpita wãrãneba jaraya: id̶i mʌ̃ra Acabo ume bed̶eaya.–

¹⁶Ara maʌ̃da Abdíaba Acabora jʌrʌd̶e wãsia. Acabo unuped̶a jarasia Elíara sãma unuida b̶ʌda. Ara maʌ̃da Acaboba Elíara acʌd̶e wãsia.

¹⁷Acaboba Elía unusid̶e nãwã jarasia: –Israelerã mĩgabibari, ¿bʌra nama b̶ʌca?–

¹⁸Elíaba panusia: –Mʌ̃a israelerãra mĩgabiẽ́ b̶ʌa. Ãtebʌrʌ bʌabʌrʌ, bʌ ẽberãrã bid̶a israelerãra bia mĩgabi panʌa. Ãcõrẽba obi jarad̶ara bãrãba igarad̶aped̶a Baalda ẽpẽ panʌa.

¹⁹Jãʌ̃be israelerãra jũma trʌ̃bidua Carmelo eyad̶e ãbaa dji jʌred̶i carea. Idjab̶a Baald̶eba bed̶eabadarã 450 panʌda trʌ̃bidua. Ãdjirã awara Aserád̶eba bed̶eabadarã 400 panʌ sid̶a trʌ̃bidua. Bʌ quima Jezabelba jũma ãdjirãra ne cobibaria.–

²⁰Maʌ̃be Acaboba israelerãra Carmelo eyad̶aa jũma trʌ̃bicuasia. Baald̶eba bed̶eabadarã sid̶a mama ãbaa dji jʌresid̶aa.

²¹Maʌ̃ne Elíara jũmarã quĩrãpita piradrʌped̶a nãwã jarasia: –¿Ab̶a sãʌ̃be crĩcha umé eropanani? Baalda wãrã Ãcõrẽ baibʌrʌ, idjidrʌ ẽpẽnadua. Baribʌrʌ Ãcõrẽda dji wãrã araa baibʌrʌ, idjidrʌ ẽpẽnadua.– Baribʌrʌ ẽberãrãba ni cãrẽ sid̶a jarad̶aẽ́ basía.