1Vahe'mo'za kaza osu'za havige anumza zmazanteti tro hunte'ne'za, kresramna vunte'naza ne'zanku krenami'naza zanku tmasami'za hue. Tagra antahi'none ana mikamota antahizana eri'none. Antahi'zamo'a tavufa erisaga hianagi, avesinte'zamo'a zmazeri hanavenetie.
2Mago'a vahe'mo'zama hakare'zana antahi vgare'none hu'za antahigahazanagi, zahufa zamagrama antahiga avamentera ontahi'naze.
3Hu'neanagi iza'o Anumzamofonku avesinentemofona, Anumzamo'a agrira antahino keno hu'ne.
4E'ina hu'negu vahe'mo'za kaza' osu havige anumza zmazanteti tro hunte'ne'za, kresramna vunentaza ne'za ne'zamofonkura, tagra antahi'none, ama mopafi havi anumzana amnezane. Hagi mago anumzana omani'neanagi, mona mopa tro hu'nea Anumzana, Agra magoke mani'ne.
5Na'ankure rama'a zanku monafine mopafinena anumzane hu'za nehazanagi, tamage hakare'a anumzane, hakare'a ra mani'neanagi,
6tagrira magoke Anumzana Nerfakino hakare'zana Agri konkompa fore higeta, tagra Agrite manunkeno, Agra magoke Rantia Jisas Kraisi mani'ne. Agripinti mikazana Anumzamo'a tro higeta, tagranena Agripinti tasimura e'nerune.
7Hu'neanagi ama ana antahi'zana ana mika'mo'za ontahi'naze. Na'ankure mago'amo'za, havi anumzankura tamage'zane hu'za nentahi'za, antahintahimo'a meninena me'negenokino, nezama kresramna hunte'naza ne'zana nenaze. Zamagra zmagesama antahizana tamage huta Anumzamofo mono hunentone nehu'za, ne'zana nenageno zamagu zmagesamo'a savri nehie.
8Hu'neanagi ne'zamo hinketa Anumzamofontera uravao osugahune. Ne'za onesunazamo'a, tazeri haviza osuge, ne'za nesunazamo'a tazeri knare osuge hugahie.
9Tamagra antahi oza hutma hanaza zamo, zmentintifi hanave oti'naza vahera zmagigo zami havegna huzankura kva hiho.
10Na'ankure antahintahi zmimo hanave oti'nesaza vahe'mokizmi zamufi knare antahintahine vahe'mota havi anumzamofo mono nompi ne'za nenesanke'za, ru zmagu'afi me'nea zmagu zmagesa eri hankavetisanke'za, kaza osu havige anumzante kresramana vu'nesaza ne'za nenaze hu'za hugahaze.
11Ana hu'negu mreri antahi'zanka'amo hanave'a omne'nesia antahi'zane mono naga, Kraisi zamagriku huno fri'nesia naga zmazeri haviza hugahie.
12E'ina higu ama ana kazigati hanave'a omne negafuno, negasaroma kumipi avrente'sanana, agu'agesa azeri haviza hu'nanankinka, kagra Kraisintera kumi hu'nane.
13E'ina hu'negu, ne'zamo'ma nenefuno nensaroma kumipi avarenentesige'na, nagra mago'ane kresramna vu'nesia afu'mofo ame'a onesuazamo'a, mago'mofona kumipina avreontegosue.
