1Avesinte'zamofo kana, nevaririnka Avamu'mofo musezantaminkura tusiza hunka kavesinto. Hianagi Avamumofo musezanpintira, kasnampa ke huama huzanku kavesinto.
2Na'ankure mago'mo ru ageru araniana vahetega norie. Hagi Anumzamofontega ru agerura nerie. Na'ankure mago'mo'a ana agerura antahi ama nosianagi, agra'a avamupi frakino oku me'nea ageru nerie.
3Hu'neanagi iza'o kasnampa ke nehimo'a, vahe zmazeri hankavenetino, zmazahuke nezmasamino, zamarimpa zmazeri so'e huke zmasamigahie.
4Iza'o ru ageru nerimo'a, agra'a azeri hanavenetie. Hu'neanagi iza'o kasnampa ke nehimo'a, mono kevumofo zmazeri hanavenetie.
5Nagri'ma navemanesiana, maka'mota ru tamageru'ma aranazegu navenesie. Hu'neanagi ra navesi'zana, maka'motma kasnampa ke hiho nehue. Hagi iza'o kasnampa ke nehimo'a, ru ageru nerimofona azeri agatere'ne. Hu'neanagi ru agerutamima nerimo'ma, ana ageru'mofo agu'agesa eri ama hanigeno'a, mono kevua zmazeri hanavetigahie.
6Menina nenfugatane nasareheheta, tamagrite ne-ena ru agerutmima ranuana, inankna huta tmaza hu'zana erigahaze? Hagi nagra eriama nehu'na, antahintahi nerami'na, kasnampa kene nehu'na, rempi hunerami'na, eriama hu'na tmasamisugenoke, antahi amara hugahaze.
7E'i asimu omne zantamimo, konkemo'ene zavenamo'ene ageru neriankna huno, ageru ru so'ema osaniana nankna hu'za ana konkene zavenamokea znageru'ma arana'ana antahi amara hugahaze?
8Hagi ufemo'ma krafa hu so'ema osnigeno'a, iza ha'ma hanigura retro hugahie?
9Tamagranena e'i anahukna hugahaze. Vahe'mo'za nentahisaza zmageru'ma aranageno'a knare hugahie. Ru zmageru'ma aranage'za, nankna hu'za vahe'mo'za ana ketmia antahi amara hugahaze? Ana keka'amo'a amne'zankna hugahie.
10Mopafina hakare'a ruzahu ruzahu zmageru me'ne, anamokizmi zmageru'mofona agafa'a me'ne.
11Hagi ru ageru arania kemofo agafa'ama antahi ama'ma osnuana, nagra agritera ru vahe kna hunentesnugeno, agranena nagritera ru vahekna hunantegahie.
12Kagri'enena e'inahukna hugahie. Kagra avamu'mofo musezantminkura tusi'a antahintahi hanunka, Anumzamofo antahigegeno maka mono kevuma zmaza hania Ruotge Avamu'mofo muse'zana tamino.
13E'ina hu'negu, iza'o ru ageru aranimo'a, ana kema agra'a rekrehe hu'zankura, nunamu huno Anumzamofo antahigeno.
14Na'ankure nagrama ru agerupinti nunamu hanuana, avamu ni'amo nunamuna nehie. Hianagi antahintahi ni'afina nena'a nomane.
15Hu'negu nagra na'a hugahue? Antahintahi'nireti nunamuna nehu'na, Avamu'niareti ene nunamuna hugahue. Avamu'niareti zgamera nehu'na, antahintahi'niareti enena zgamera hugahue.
16Ana hu'negu kagrama avamupintike Anumzamofo agima erisaga nehnakeno'a, inankna hu'za ana ageru'ma nornamo'za antahiamara hu'za, kagrama hanana kerera tamage hugahaze? Na'ankure kagrama agima erisaga hanana kea antahi ama nosaze.
17Na'ankure kagra knare zantfa hunka Anumzamofo musenke huntegahane. Hu'neanagi rumofona aza hunka azeri hankve otigahane.
18Nagrama mika'motma tamagetere'na rama'a ru agerupinti'ma neruazankura, Anumzamofona susu huntoe.
19Hu'neanagi nagri'ma navemanesiana mono kevufima, antahi ama huga 5fu'a kema hanugeno, ruga'amokizmima knare antahintahi zami'zamo'a, ru agerupinti'ma (10 tauseni'a) kema hanuana agatere'ne.
20Nenafugatane nasarehetma, osi mofavregna huta antahintahia osiho, havi avu'ava huzankura aminte mofavre'gna hiho. Hagi antahintahi tamifina ra vahe kna huta maniho.
21Nagri'ni'a vahepina ontahi'naza agerupinti kea hunezami'na, ru vahe zamagipi huvazi'na hugahuanagi, ontahigosaze, huno avontafepina hu'ne. (Aisa 28:11-12)
22Hu'negu ru ageru'ma ru'zana e'i avame'zane, zamentinti hu'naza vahe'mokizmi avame zanompage, zamentinti osu vahe'mokizmi avame'zane. Hu'neanagi kasnampa kema hu'zana, zamentinti osu vahe'mokizmi zmaza hu'zankurompage, zamentinti hu'naza vahe'mokizmi zmaza hugahie.
23E'ina hu'negu maka mono kevumo'zama eme atru nehu'zama ana maka'mozama ru ageru tmima nernage'zama, ana ageru'ma noranamo'zo, zmentinti nosnamo'za efresu'za, tamagra neginagi nehaze hu'za hugahaze.
24Hu'neanagi maka'motma kasnampa kema nehanageno, zmentinti nosnamo'zo, kasanampa kema nosnamo'zama efresu'za, ana maka'mota hanaza kemo eriama hinkeno, kumi'a agra negeno, nagra kumi vahe mani'noe huno refko hugahie.
25Ana hanigeno agu'afima oku me'ne'nia agu'agesamo'a efore hanigeno, agra avugosaregati arena reno umaseno, Anumzamofona mono hunenteno, hu'ama huno tamage Anumzamo'a tamagrane amu'nontamifi mani'ne huno hugahie.
26E'ina hu'negu nenfugatane nasareheheta na'a efore hugahie? Eme atru hanaza zupa, mago'mo mono zgamera nehinkeno, mago'mo rempi huneraminkeno, mago'mo ksefa'za Anumzamo averi haniaza huama nehinkeno, mago'mo ru ageru nerinkeno, mago'mo rekrehe hugahie. Hagi e'i ana maka'zama hanaza zamo'a, knare huno mono kevua zamaza huno, Ramofompina zmazeri hankavetigahie.
27Iza'o ru ageru'ma aranuno'a, taremoke ana znagerura ri'o. Hagi tagufa agetere'amo'za oriho. Mago'mo ru agerura nerina, mago'mo rekrehe hunete'na hiho.
28Hu'neanagi rekrehe hu vahe'ma omni'nena, ru ageru ru vahe'mo'a akoheno taganeno mono kevufina mani'neno, agra'agu'ene Anumzamofontega agerura akoheno rugahie.
29Zametrenke'za tareo tagufa kasnampa vahe'mo'za kasnampa ke'a nehanage'za ruga'amo'za ana nanekea refko hu'za antahiho.
30Hianagi Anumzamo mopafi mani'nesimofonte'ma ksefa'za averi nehina, kotama kema nehanimo'a, kea osu taganeno mani'nenkeno, kea huama hugahie.
31Hagi tamagra maka'mota amne kasnampa kea magoke magoke'mota hutehute nehnageno, maka'mofona antahintahia nezamino, zamazeri hankavetigahie.
32Kasnampa kema hu avamu'mofo agorga'a mani'ne'za, kasnampa vahe'mo'za knazmima esige'za, kasnampa kea hutere hugahaze.
33Na'ankure Anumzamo'a ke'onke'za eri savrisavra osu Anumzana omani'ne, hagi rimpa fru Anumzane. Maka Anumzamofo mono kevu naga zmazeri ruotge hu'neakna hiho.
34Mono kevuma eritru hanafina, a'nemo'za akohe'za vene'nemofo zmagorga maniho. Na'ankure kema hu'zankura hu izo huozmante'naze. Tra kemo'ma hu'nea kante ante'za venenemofo zmagorga'a maniho.
35A'nemo'za mago'a zanku antahisunema hanu'za, nontega nezmave antahigeho, na'ankure a'mo mono kevufi ke hu'zamo'a knarera osu'ne.
36Tamagrama antahi'zana Anumzamofo kema antahizamo'a, tamagripinti agafa huno, tamagripinke vgaregahie hutma Korinti vahe'mota nehazafi? I'o, tamagra havige nehaze.
37Mago'mo'ma huno kasnampa vahe mani'noe huge, avamupi antahi'zane vahe mani'noe huno hanimofona, atrenkeno anamo'a amama kreramua avona, Ramo huo huno hunte'nea kasege huno agra'a antahi'ama hino.
38Hagi ama avoma keno antahino osanimofona, agrira ke'za antahi'za osugahaze.
39Ana hu'negu nafu nagnaheta kasnampa ke hu'zankura tusiza huno tamenesinketa, ru agerupinti'ma ru'zana aseovaziho.
40Hianagi maka zama hanaza zamo'a, fatgo huno knare kante hiho.
