1Tumen gondoľinen pal amende avke, sar pal o služobňika le Kristoskere the sar pal o spravci, savende hin le Devleskere garude čačipena.
2Le spravcendar pes užarel, hoj te aven pačivale peskere rajenge.
3Mange na džal pal oda, či man sudzinen tumen abo o manušeskero sudos. Ale aňi korkoro man na sudzinav,
4bo hin man žužo svedomje, ale oleha na kamav te phenel, hoj som bi e chiba. Se oda, ko man sudzinel, hin o Raj.
5Vašoda ma sudzinen ňič anglal, medik na avela o Raj a anela pro svetlos oda, so hin garudo andro kaľipen, a sikavela, so peske gondoľinenas o manuša andro jile. Paľis chudela sako le Devlestar peskero lašariben.
6Phralale, kada phenďom prekal tumende a sikaďom pre ma the pro Apollo, hoj amendar te sikľon, oda so hin phendo: “Ma džan dureder sar oda, so hin pisimen.” Hoj pes ňiko te na lašarel varekaha a avres te na dikhel tele.
7Bo ko tutar kerel barederes avrestar? A so tut hin, so na chudľal? A te oda chudľal, soske tut lašares, sar te oda na chudľalas?
8Hin tumen imar sa, so tumenge kampel? Imar barvaľiľan? Imar kraľinen, choc bijal amende? No kamľomas, hoj čačes te aven kraľa, hoj amen jekhetane tumenca te kraľinas!
9Bo avke pes mange dičhol, sar te amen, le apoštolen, diňahas o Del oda nekostatneder than: Sar olen, save hine odsudzimen pro meriben. Bo sam sar o ďivadlos cale svetoske, le aňjelenge the le manušenge.
10Amen sam diline vaš o Kristus a tumen san goďaver andro Kristus; amen slaba a tumen zorale; amen tele dikhen a tumen lašaren.
11Dži akana sam bokhale, smedne a lange; sam marde a phiras than thanestar.
12Keras phares buči peskere vastenca; rakinen amenge, amen žehňinas; džan pre amende, amen zľidžas;
13sar amen košen, amen lenge odphenas šukar lavenca. Ačhiľam sar o šmeci le svetoskere; sam odčhide savorendar dži akana.
14Me na pisinav kada vaš oda, hoj tumen te anav andre ladž, ale hoj tumenge te dovakerav sar mire čhavenge, saven kamav.
15Choc te tumen uľahas deš ezera (10 000) manuša, save tumen sikadehas pal o pačaben andro Kristus, no našťi tumen avel but dada, bo me tumen anďom pro svetos andro Ježiš Kristus prekal o evaňjelium.
16Mangav tumen: Keren avke sar me.
17Vašoda tumenge bičhaďom le Timoteus, mire čhas, saves kamav a savo hino pačivalo andro Raj. Ov tumenge leperela, sar me dživav andro Ježiš Kristus – oda, so sikavav všadzik andre dojekh zboros.
18Varesave džene tumendar ačhile barikane, bo peske gondoľinen, hoj na avava ke tumende.
19Te oda o Raj kamela, avava ke tumende sig a paľis sprindžarava e zor ole barikane manušengeri, a na ča lengere lava.
20Bo o kraľišagos le Devleskero nane andro lava, ale andre zor.
21So kamen? Kamen, hoj te avav ke tumende la pacaha, vaj le kamibnaha a kovle duchoha?
