1 Baṉara 9:6-26

⁶Ba pude agoi babe sari na tumu si kekere taluarae koa Rau meke lopu luli i sari na Qua ginarunu na tinarae sapu ele vatu ni Rau, meke taloa mia tu pude la nabulu mia meke vahesi gamu sari kaiqa votiki tamasa,

⁷si kaqu va ilolae pania Rau sa butubutu Izireli koasa popoa sapu ele poni nia Rau koa rini, meke kaqu kilu pania tugo Rau sa Zelepade sapu ele va madia Rau pude vasina sapu kaqu ta vahesi sa Pozaqu. Meke Izireli si kaqu ta evaṉae na vina sisireina tadi na votiki butubutu meke na dia ṉoṉovalana.

⁸Kamahire si hinokara tolavaena hola sa Zelepade hie, ba pa totosona asa si kote magasa nia ri doduru tie pu ene hola meke kote va sisire meke kote zama, ‘Na vegua ke tavete guni nia tu e Zihova sa popoa hie meke sa Zelepade hie?’

⁹Meke kote olaṉa sari na tinoni, ‘Ura na luara pania rini se Zihova sa dia Tamasa sapu turaṉa vura ni sari tiatamadia pa popoa Izipi, meke ele raṉei rini sari votiki tamasa meke vahesi na nabulu ni, gua asa ke va kamo ni tinahuara e Zihova si arini,’ kote gua.”

¹⁰Kamo koasa vina hiokona puta vuaheni si ele beto sa tinavete te Solomone pude kuria sa Zelepade meke sa vetu baṉara,

¹¹si variponi ni e Solomone si ka hiokona puta vasileana pa korapana sa popoa Qaleli koe Hiramu sa baṉara pa popoa Taea. Na e Hiramu vala ni koasa sari doduru huda sida na huda paeni, meke na qolo pu hiva ni sa.

¹²Ba totoso la dogori Hiramu sari na vasileana arini, si lopu qetu ni sa.

¹³Ke nanasa la koe Solomone se Hiramu, “Tasiqu, na vasileana veguguadi si poni nau goi hire?” Meke poza ni Na Popoa Kabulu sa sari vasidi arini, asa si ta poza ni rini kamo pa rane ṉinoroi.

¹⁴Ura sa qolo sapu vala ni e Hiramu koe Solomone si hola nia ka made tina kilo mamatana.

¹⁵Hierana vivineina sa puku tie pu zukuru ni tinavete ṉiṉiradi sa baṉara Solomone pude kuria sa Zelepade te Zihova, sa nana vetu baṉara, sa vasina tava siṉi la pepeso sage pa kali toqere sapu pa kali gasa rimata Zerusalema, meke sa goba vari likohaena sa vasileana Zerusalema. Arini tugo kuri sari na vasileana pa Hazo, Meqido, meke Qeza.

¹⁶La sa baṉara pa popoa Izipi meke la raza ia sa vasileana pa Qeza meke vagia nana. Meke na sulua tu sa sa vasileana lavata asa. Va mate betoi sa sari tie Kenani saripu koadi vasina, meke variponi nia sa, guana nana vinariponi vinarihaba, la koasa tuna vineki sipu haba ia sa se Solomone.

¹⁷Meke la kuri pulea e Solomone sa vasileana pa Qeza. Sari na tie pu zukuru ni tinavete ṉiṉiradi e Solomone, na kuri i si pa Beti Horoni Panapeka,

¹⁸Balati, Tamara pa soloso qega pa popoa Ziuda,

¹⁹meke gua tugo sari na vasileana lavata vasina ta kopue sari na ginani na likakalae, meke sari na vasileana pu ta kopue sari na hose na totopili varipera. Tavete va gorevura betoi sa sari doduru kinurikuri pu hiva taveti sa pa Zerusalema, Lebanoni, meke pa doduruna sa voloso popoa pu koa baṉara ni sa.

²⁰Sari na tie pu koa hola koari na butubutu Amoraiti, Hitaiti, Perizaiti, Hivaiti, meke Zebusaiti, sari na tie arini si lopu na tie Izireli. Arini si va pinausu i e Solomone meke zukuru ni tinavete ṉiṉiradi sa kamoa pa rane ṉinoroi. Tutidia rini sari na tie pu lopu boka va mate i ri na butubutu Izireli tatasana, meke koa hola dia pa pepeso.

²²Ba sari na tie Izireli si lopu va pinausu i e Solomone; ba arini sari nana tie varipera sa. Na palabatu koari na tuturuana pa nana qeto minate, na koimata tadi na totopili varipera meke ari na tie pu koi koari na hose si arini.

²³Arini tugo sari na ṉati palabatu pu koimata ni sari na kinurikuri te Solomone; lima gogoto lima ṉavulu puta palabatu si kopudi sari na tie pu va tanadi sari na tinavete.

²⁴Mudina sapu sage sa tuna vineki sa baṉara pa Izipi, koana pa vasileana lavata te Devita meke la koa pa nana vetu sapu kuri ponia e Solomone, si va siṉi nia pepeso e Solomone si pa kali gasa rimatana sa vasileana lavata.

²⁵Ka ṉeta totoso pa vuaheni si taveti e Solomone sari na vina vukivukihi va uququ meke sari na vina vukivukihi binaere koasa hope sapu tavete ponia sa se Zihova. Tavete lani tugo sa sari na vina uququ humaṉa lea koe Zihova. Pa hahanana gua asa si va tabea sa sa tinarae pa vinahesi koasa Zelepade.

²⁶Taveti tugo sa baṉara Solomone sari na vaka pa Ezioqeba, tata pa vasileana Elati koasa raratana pa koqu lavata pa Aqaba, pa popoa Edomu.