عِسِرَيِلَ مَنفّيٍ ١ 9:6-26

⁶كْنْ شَ وٌ وٌ كٌبٍ رَتٌمَ، وٌ قَ فبِلٍن ﭑ مَ سّرِيّ نُن ﭑ مَ يَامَرِيٍ قْشْ رَ، شَ وٌ سَ تُوبِ عَلَ فبّتّ بّ،

⁷ﭑ وٌ تَلَمَ نّ ﭑ مَ بْشِ مَ، ﭑ نَشَن قِشِ وٌ مَ، ﭑ يِ بَنشِ رَكَسَنحّ، ﭑ نَشَن قِندِشِ ﭑ شِلِ قَلَدٍ رَ. نَ تّمُي سِ بِرِن قَمَ نّ يٍلٍدٍ عِسِرَيِلَ شَ قٍ مَ، عٍ يٌ وٌ مَ.

⁸نَ تّمُي مِشِ نّ دَنفِمَ يِ بَنشِ رَ، نَشَن بَرَ شِلِ قَنيِ سْتْ، عٍ دّ عِشَرَ مَ نّ، عٍ عَ قَلَ، ‹مُنقٍ رَ عَلَتَلَ يِ بْشِ نُن يِ بَنشِ شَ قٍ شُن نَكَنَشِ يِ كِ؟›

⁹عٍ عَ يَابِمَ نّ، ‹عَلَ يِ بِرِن نِيَشِ عٍ رَ نّ بَرِ مَ عٍ بَرَ فبِلٍن عٍ بَبَيٍ مَرِفِ عَلَتَلَ قْشْ رَ، نَشَن عٍ رَ مِنِ مِسِرَ بْشِ رَ. عٍ بَرَ عٍ تَفِ عِشِرِ عَلَ فبّتّيٍ رَ، عٍ عٍ بَتُ، عٍ تُوبِ عٍ بّ. عٍ يِ تْورّ سْتْشِ نَ نَن مَ.›»

¹⁰مَنفّ سُلٍمَنِ نُ بَرَ عَلَتَلَ شَ بَنشِ نُن عَ يّتّ شَ بَنشِ تِ حّ مْشْحّن بُن مَ.

¹¹تِرٍ مَنفّ شِرَ مِ تٌ بَرَ نُ سّدِرِ نُن سِثِرّ وُرِيٍ، نُن شّيمَ سٌ سُلٍمَنِ يِ رَ، عَ نُ وَ مَ نَشَن شَسَبِ شْن، عَ نَشَ تَا مْشْحّن قِ شِرَ مِ مَ فَلِلٍ بْشِ مَ.

¹²شِرَ مِ تٌ مِنِ نَ تَايٍ مَتٌدٍ، نٍيٍ مُ رَقَن عَ مَ.

¹³عَ نَشَ عَ قَلَ سُلٍمَنِ بّ، «ﭑ نفَشَكٍرٍنيِ، عِ تَا مْولِ مُندُن قِشِ ﭑ مَ يِ كِ؟» شِرَ مِ نَشَ نَ تَايٍ شِلِ سَ «تَا قُقَقُ.» نَ شِلِ نَن نَ عٍ شُن مَ هَن تٌ.

¹⁴كْنْ شِرَ مِ نَشَ شّيمَ كِلٌ وُلُ نَانِ رَ سَنبَ مَنفّ سُلٍمَنِ مَ.

¹⁵مَنفّ سُلٍمَنِ نُ بَرَ تٍكُ وَلِ رَكٍلِ بَنشِيٍ نُن تَايٍ تِقٍ رَ، عَلْ عَلَتَلَ شَ بَنشِ، مَنفّ سُلٍمَنِ شَ بَنشِ، مِلٌ تَا، دَرِ سَلَمُ تّتّ، شَسٌرِ تَا، مٍفِدٌ تَا، نُن فٍسٍرِ تَا.

¹⁶قِرَوُنَ، مِسِرَ مَنفّ، دُ سُ نّ فٍسٍرِ تَا شُن نَ، عَ تّ سٌ نَ رَ، نَ كَنَانكَيٍ بِرِن قَشَ. نَ دَنفِ شَنبِ عَ نَ قِ عَ شَ دِ فِنّ مَ، نَشَن دْشْ مَنفّ سُلٍمَنِ شْن مَ.

¹⁷مَنفّ سُلٍمَنِ يِ تَا بِرِن تِ نّ؛ فٍسٍرِ تَا، بٍتِ شٌرٌن لَبٍ،

¹⁸بَالَتِ نُن تَمَرِ نَشٍيٍ نُ نَ فبٍنفبٍرٍنيِ مَ،

¹⁹نُن تَا فبّتّ سْورِ رَفِسٍيٍ نُن سٌييٍ نُ رَفَتَمَ دّننَشّ. سُلٍمَنِ نُ بَرَ بَنشِ نُن تَا فبٍفبٍ تِ دَرِ سَلَمُ، لِبَن بْشِ، نُن عَ شَ بْشِ بِرِن مَ، عَلْ عَ نُ وَ مَ عَ شْن مَ كِ نَشّ.

²⁰شِتِكَيٍ، عَمٌرِكَيٍ، ثٍرٍ سِكَيٍ، هِوِكَيٍ، نُن يٍبُسُكَيٍ نَشٍيٍ لُ عِسِرَيِلَ بْشِ مَ، كْنْ عٍ مُ قِندِ عِسِرَيِلَكَيٍ رَ.

²¹عٍ بَبَيٍ مُ قَشَ عِسِرَيِلَ شَ سَنتِدّفّمَ سَابُي رَ عِسِرَيِلَكَيٍ سٌ تّمُي. نَ كُي سُلٍمَنِ نَ مِشِيٍ قِندِ نّ كٌنيِيٍ رَ. هَن تٌ عٍ نَ كٌنيِيَ كُي.

²²كْنْ سُلٍمَنِ مُ تِن عِسِرَيِلَ دِ يٌ شَ قِندِ كٌنيِ رَ. عِسِرَيِلَكَيٍ نُ قِندِشِ عَ شَ سْورِيٍ، سّبّلِتِيٍ، سْورِ شُنيِيٍ، نُن سٌي رَفِ شُنيِيٍ نَن نَ.

²³مَنفّ سُلٍمَنِ مِشِ كّمّ سُولِ مِشِ تٌنفٌ سُولِ نَن تِ شُنيِيٍ رَ كٌنيِيٍ شُن مَ نَشٍيٍ نُ عَ شَ وَلِ رَبَمَ.

²⁴سُلٍمَنِ قِرَوُنَ شَ دِ فِنّ تٌنفٌ نّ دَوُدَ شَ تَا كُي، عَ عَ رَتُنُ بَنشِ فبّتّ كُي، عَ نَشَن تِ عَ بّ. نَ تّمُي قَ عَ نَشَ مِلٌ تَا تِ.

²⁵مَنفّ سُلٍمَنِ نُ سّرّشّ فَن دَاشِيٍ نُن شَنُنتٍيَ سّرّشّيٍ بَمَ سَنيَ سَشَن حّ يٌ حّ سّرّشّبَدٍ قَرِ، عَ نَشَن يَءِلَن عَلَتَلَ بّ. عَ نُ سُرَيِ بَمَ سّرّشّ رَ سّرّشّبَدٍ ندٍ قَرِ نَشَن نُ نَ عَلَتَلَ يَ عِ. عَ عَلَتَلَ شَ هْرْ مْبَنشِ رَحْن.

²⁶مَنفّ سُلٍمَنِ كُنكُييٍ يَءِلَن نّ عٍسِيٌن فٍبٍرِ، عٍلَتَ قّ مَ، بَا دّ رَ نَشَن نُ نَ عٍدٌن بْشِ مَ.