1 ታሶሎንቄ 5

1

2

3

4

5

¹ታ ኢሻቶ! ሄሲ ሃናና ዎዴዛ ጊሽ ኑ ኢንቴስ ፃፋናስ ኮሼና።

²ካይሶይ ቃማን ዪዛ ማላ ጎዳ ጋላሲካ ሄሳ ማላ ያናይሳ ኢንቴ ኢንቴ ባጋራ ሎዔꬂ ኤሬታ።

³ኣሳይ “ጋዴይ ሳሮኔ ሎዖኮ” ጊሺን ሚፃይ ቃንꬃራ ዲዛ ማጫስ ኦይኪዛ ማላ ሄሳꬆካ ኣስ ꬋይሲዛይ ቆፖንታ ኣሳ ቦላ ጋካና። ኦኒካ ኬሲ ኤኬና።

⁴ኢንቴኖ ኢሻቶ! ሄ ጋላሳይ ካይሶ ማላ ኢንቴና ዳጋንꬃናስ ኢንቴ ꬉማን ዴኬታ።

⁵ኢንቴ ዉሪካ ፖዖ ናይታ፤ ኑኒ ꬉማ ዎይኮ ቃማ ባጋ ጊዶኮ።

⁶ሂስቲኮ ኣኔ ቤጎስ፤ ኣኔ ኑርካ ኑና ሃሮስ ኣቲን ሃንኮ ꬊስኪዛ ኣሳ ማላ ኑካ ኣኔ ꬊስኮኮ።

⁷ꬊሲኪዛይቲ ቃማራ ꬊሲኬቴስ፤ ማꬆቲዛይቲካ ቃማራ ማꬆቴቴስ።

⁸ኑ ቃስ ጋላሳ ኣሳታ ጊዲዳ ጊሽ ኣማኖኔ ሲቆ፥ ቲራን ማይዒዛ ፁሩሬ ማይዖ ማላ ማይዒዲ ኣቶቴꬃ ሂዶታ ሁዔን ዎꬂዛ ቢራታ ቆቤ ማላ ሁዔን ዎꬂዲ ኣኔ ኑናቴꬃ ሃሪዲ ዴዖስ።

⁹ፆሲ ኑ ጎዳ ዬሱስ ኪርስቶሳ ባጋራ ኣቶቴꬅ ዴማና ማላ ኣቲን ኑና ሃንቆስ ፄይጊቤና።

¹⁰ኑ ሃይቂኮካ ዎይኮ ፓፃ ዲኮካ ኢዛራ ዳና ማላ ኢዚ ኑ ጊሽ ሃይቂዴስ።

¹¹ሄሳ ጊሽ ቱማፔ ኢንቴ ሃዒ ኦꬂዛይሳ ማላካ ኢሶይ ኢሳራ ሚኔቲቴኔ ሚንꬄꬂቴ።

¹²ሂስቲኮ ታ ኢሻቶ! ኢንቴ ጊዶን ሚኒ ኦꬂዛይታ ጎዳን ኢንቴፌ ቦላራ ዲዛ ሃላቃታኔ ኢንቴና ዞሪዛይታ ኢንቴ ቦንቻና ማላ ኑ ኢንቴና ዎሶስ።

¹³ኢስታ ኦሶ ጊሺካ ኢስታ ሲቆራ ሎዔꬂ ቦንቺቴ፤ ኢንቴ ኢንቴ ጊዶን ሳሮን ዲቴ።

¹⁴ታ ኢሻቶ! ኑ ኢንቴና “ኦሶ ኦꬆንታ ኣሳታ ሃንቄቲቴ፤ ባቢዛይታ ሚኒሲቴ፤ ዳቡራንቻታ ማዲቴ፤ ኣስ ኡባ ዳንዳዪቴ” ጊ ዞሮስ።

¹⁵ኦናስካ ኢታ ጊሽ ኢታ ዛሮንታ ማላ ናጌቲቴ፤ ጊዶ ኣቲን ኢንቴ ኢንቴ ጊዶን ጊዲን ሃራ ኣሳራ ጊዲን ኡባ ዎዴ ሎዖ ጊዲዛይሳ ኦꬃናስ ባፄቲቴ።

¹⁶ኡባ ዎዴ ኡፋዬቲቴ።

¹⁷ቃንፆንታ ዎሲቴ።

¹⁸ኣይ ሃኖንካ ጋላቲቴ ፆሳ ሼኔይ ኢንቴስ ዬሱስ ኪርስቶሳ ባጋራ ሄሳ።

¹⁹ፂሎ ኣያና ታማ ቶይሶፍቴ።

²⁰ቲንቢቴ ቃላ ካꬎፒቴ።

²¹ዉርሲካ ፓጪ ፄሊቴ፥ ሎዖ ጊዲዳዝ ኦይኪቴ።

²²ኢታ ጊዲዳ ኣይ ሚሻፔካ ሃኪቴ።

²³ሳሮቴꬃ ጎዳይ ኢዚ ኢንቴናቴꬃ ኤራይስ ዱማሶ፤ ኢንቴ ኣያናይ፥ ኢንቴ ሼምፖይኔ ኢንቴ ኣሾይ ጎዳ ዬሱስ ኪርስቶሲ ዪዛ ዎዴ ዎሶይ ባይንዳ ናጌቶ።

²⁴ኢንቴና ፄይጊዳይሲ ኣማኔቲዳዴ ጊዲዳ ጊሽ ኢዚ ሄሳ ኦꬃና።

²⁵ኑ ኢሻቶ! ኑ ጊሺካ ዎሲቴ።

²⁶ኣማኒዛይታ ኡባ ጌሻ ዬሬቴꬃን ሳሮኪቴ።

²⁷ሃ ኪታይ ኣማኒዛይታስ ኡባስ ናባቤታና ማላ ጎዳ ሱንꬃን ሃዳራ ጋይስ።

²⁸ኑ ጎዳ ዬሱስ ኪርስቶሳ ኣꬎ ኪያቴꬂ ኢንቴናራ ጊዶ።