1 ታሶሎንቄ 2

1

2

3

4

5

¹ኑ ኢሻቶ! ኑ ኢንቴኮን ጋምዒዳ ጋምዖይ ጮ ሜላ ጊዶንታይሳ ኢንቴካ ኤሬታ።

²ኢንቴካ ኤሪዛይሳ ማላ ሃይሳፌ ካሴ ፒሊጲሲዮሴን ኑ ዋዬኔ ሜቶ ቤይዶሲኔ ጫዬቲዶስ፤ ጊዶ ኣቲን ኣይኔ ሚኖ ዋዬይ ኑና ጋኪኮካ ፆሳ ሚሺራቾ ቃላ ኢንቴስ ዮታናስ ኑ ጎዳፔ ፃላቴꬅ ዴሚዶስ።

³ኑ ኢንቴና ዞሪዳ ዞሬይ ኢታ ቆፋራ ዎይኮ ኢንቴና ባሌꬃናስ ኮይዲ ጊዴና።

⁴ጊዶ ኣቲን ኑ ሚሺራቾ ቃላ ሃዳራ ኤካናስ ዳንዳዪዛ ኣሳታ ማላ ፆሲ ኑና ቆዲዳ ጊሽ ኑ ሃሳዮስ፤ ሄሳካ ኑ ኦꬂዛይ ኑ ዎዝና ፓጪ ኤሪዛ ፆሳ ኡፋይሳናስ ኣቲን ኣስ ኡፋይሳናስ ጊዲ ጊዴና።

⁵ኑ ሙሌካ ባሌꬆ ቃላ ዮቲቤኮ ዎይኮ ኑ ኡዜቴꬅ ካማናስ ጊዲ ባሌꬆ ሃኖ ኑ ሃኖታይሳ ኢንቴ ኤሬታ። ሃይሳስካ ኑ ማርካይ ፆሳ።

⁶ኢንቴፌ ጊዲን ዎይኮ ሃራታፔ ኦናፔካ ኣሳፔ ኢሜቲዛ ቦንቾ ኑ ኮይቤኮ።

⁷ኑ ኪርስቶሲ ኪቲዳይታ ጊዲዳ ጊሽ ኢንቴስ ቶሆ ጊዳናስ ዳንዳዮስ፤ ጊዶ ኣቲን ኣያ ባ ናይታ ዲቺዛ ማላ ኑካ ኢንቴ ጊዶን ኣሽኬቴꬃን ሲሜሬቲዶስ።

⁸ፆሳ ቃላ ፃላ ጊዶንታ ዲሺን ኑ ሼምፖካ ኢንቴ ጊሽ ኡፋይሳን ኢማና ጋካናስ ኢንቴና ሲቂዶስ። ጋሶይካ ኑ ኢንቴና ዳሮ ሲቂዳ ጊሻሳ።

⁹ኑ ኢሻቶ! ኑ ዳፌቴꬃኔ ኑ ዳቡራ ኢንቴ ኤሬታ፤ ኦናስካ ቶሆ ጊዶንታ ማላ ቃማኔ ጋላስ ኑስ ኦꬂሼ ሚሺራቾ ቃላ ኢንቴስ ዮቲዶስ።

¹⁰ኑ ኢንቴናራ ኣማኒዛይታራ ዲዛ ዎዴ ፂሎቴꬃኒኔ ጌሻቴꬃን ቃሴካ ዎሶይ ባይንዳ ኑ ዋኒ ዴዒዳኮኔ ኢንቴካ ፆሲካ ኑስ ማርካ።

¹¹ኣዋይ ባ ናይታስ ሃኒዛ ማላ ኑካ ኢንቴስ ኢሳስ ኢሳስ ኣይ ሃኒዳኮኔ ኢንቴ ኤሬታ።

¹²ኢንቴ ኢንቴና ባ ካዎቴꬃሲኔ ባ ቦንቾስ ፄይጊዳ ፆሳስ ቤሲዛ ማላ ኢንቴ ዳና ማላ ኑ ኢንቴና ሚንꬂዶስ፤ ሎዔꬂ ዞሪዶሲኔ ሃዳራ ጊዶስ።

¹³ኢንቴ ኑፔ ሲዪዳ ፆሳ ቃላ ኤኪዳ ዎዴ ኣማኒዛ ኢንቴ ኣቻን ቱሙ ኦꬂዛ ፆሳ ቃላ ማላ ኤኪዴታ ኣቲን ጮ ኣሳ ቃላ ማላ ኢንቴ ኤኮንታ ኣጊዳ ጊሽ ኑ ፆሳ ቃንፆይ ባይንዳ ጋላቶስ።

¹⁴ኑ ኢሻቶ! ዩሁዳ ቢታን ዬሱስ ኪርስቶሳ ኣማኒዛ ፆሳ ዎሳ ኬꬃታ ሚሳቲዴታ፤ ኢስቲ ኣይሁዳታፔ ሜቶኔ ዋዬ ኤኪዳ ማላ ኢንቴካ ኢንቴ ኣሳፔ ዋዬ ኤኪዴታ።

¹⁵ኢስቲ ጎዳ ዬሱሳኔ ካሴ ናቤታካ ዎꬊዳ፤ ኑናካ ጎዲዳ፤ ፆሳካ ኡፋይሲቤቴና፤ ኣሳ ኡባራ ኤቄቲዛይታ ጊዲዳ።

¹⁶ሄሲካ ኣይዛቤቲ ሲይዲ ኣታና ቃላ ኑ ኢስታስ ዮቶንታ ማላ ዲጋናሳ። ሄሳ ማላ ኦሶን ባ ናጋራ ኡባ ዎዴ ባ ቦላ ዉርሴꬅ ጋካናስ ጉጂ ጉጂ ቤቴስ፤ ፆሳ ሃንቆይካ ኢስታ ቦላ ዎꬊዴስ።

¹⁷ጊዲኮካ ኑ ኢሻቶ! ኑ ጉꬃ ዎዴስ ኢንቴፌ ኣያናን ጊዶንታ ኣሾን ሻኬቲኮካ ኢንቴ ላሞታይ ኑና ዎꬊዛ ጊሽ ኢንቴ ኣይፌሶ ቤያናስ ዳሮ ዳፌቴꬃን ዶስ።

¹⁸ኑ ኢንቴኮ ባናስ ዳሮ ላሞቲዶስ ሺን ሃራፔካ ታ ጳዉሎሲ ዳሮ ዎዴ ዳፌታዲስ ሺን ፃላዔይ ኑና ዲጊዴስ።

¹⁹ጎዳ ዬሱሲ ሃ ዪዛ ዎዴ ኢዛ ሲንꬃን ኑ ኣሞይ ዎይኮ ኑ ኡፋይሲ ዎይኮ ኑ ዛዉዴይ ኑስ ኢንቴፌ ሃራይ ኦኔ?

²⁰ቱማፔካ ኑ ኡፋይሲኔ ኑ ቦንቾይ ኢንቴና።