1 ታሶሎንቄ 4

1

2

3

4

5

¹ሃዒ ዉርሴꬃን ታ ኢሻቶ! ኢንቴ ፆሳ ኡፋይሳናስ ኢንቴ ዋኒ ዋኒ ዳና ቤሲዛኮኔ ኑ ኢንቴና ታማርሲዶስ። ቱማፔካ ኑ ታማርሲዳ ማላ ዴታ፤ ሄሳ ጊሽ ጎዳ ዬሱስ ኪርስቶሳን ኑ ኢንቴና ዎሲዛይኔ ዞሪዛይ ሃይሳፌካ ኣꬊዛ ሃኖራ ኢንቴ ሲንꬄ ጉጃና ማላ።

²ጎዳ ዬሱስ ኪርስቶሳ ዎልቃን ኑ ኢንቴስ ኣይ ኣዛዞ ኢሚዳኮኔ ኢንቴ ኤሬታ።

³ፆሳ ሼኔይ ኢንቴ ላይማፔ ሃኪዲ ዱማታናሳ።

⁴ቃሴ ኢሲ ኢሲ ኣሳይ ባ ማቾ ጌሻቴꬃኒኔ ቦንቾን ኣይሶ ቤሲዛይሳ ሻኪ ኤሮ።

⁵ሄሲካ ፆሴ ኣማኖንታ ኣይዛቤታ ማላ ላይማ ቃቄቴꬃን ጊዶፖ።

⁶ሄሳ ማላን ኦኒካ ባሌቲዲ ባ ኢሻ ባሌꬆፎ፤ ጋሶይካ ሃይሳፌ ካሴ ኑ ኢንቴስ ዮቲዳ ማላኔ ናጌታናስ ኣኬኪሲዳ ማላ ጎዳይ ሄይታንታ ማላ ናጋራ ኦꬂዛ ኡባታ ቦላ ባ ሃንቆ ኤሃና።

⁷ፆሲ ኑና ጌሻቴꬃስ ፄይጊዴስ ኣቲን ቱናቴꬃስ ፄይጊቤና።

⁸ሄሳ ጊሽ ሃይሳ ሃ ዞሬዛ ካꬊዲ ኤኮንታዴይ ፂሎ ኣያና ኢዛስ ኢሚዳ ፆሳ ካꬌስ ኣቲን ኣስ ካꬊዛዴ ጊዴና።

⁹ኢሻታ ሲቆቴꬃ ጊሽ ኢንቴስ ኦኒካ ፃፋናስ ኮሼና፤ ጋሶይካ ኢንቴ ኢንቴ ጊዶን ሲቄታና ማላ ኢንቴ ኢንቴ ባጋራ ፆሳፌ ታማሪዴታ።

¹⁰ኩሜꬃ ማቂዶኒያን ዲዛ ኣማኒዛ ኣሳ ኢንቴ ዉርሲ ሲቂዛይስ ኤሬቲዳይሳ። ጊዶ ኣቲን ኑ ኢሻቶ! ሲንꬃ ባጋን ኢንቴ ሃይሳፌ ኣꬂ ሲቄታና ማላ ኑ ኢንቴና ዞሮስ።

¹¹ኑ ሃይሳፌ ካሴ ኢንቴና ኣዛዚዳ ማላ ኢንቴ ኢንቴ ኩሼራ ኦꬂቴ፤ ዎፑ ጊ ዲቴ፤ ኢንቴስ ጊዲዛይሳ ሎዔꬂ ፄሊቴ።

¹²ሄሲካ ጋላስ ጋላስ ኢንቴ ዱሳይ ሃንኮ ኣማኖንታ ኣሳ ኣቻን ኢንቴና ቦንቺሳና ማላኔ ኢንቴ ኣይ ኣሳስካ ቶሆ ጊዶንታ ማላ።

¹³ታ ኢሻቶ! ኢንቴ ኣሾን ሃይቂዳይታ ጊሽ ኤሮንታ ኣታና ማላ ኑ ኮዮኮ። ቃሴካ ሂዶታይ ባይንዳ ሃራ ኣሳታ ማላ ኢንቴ ካዮታና ማላ ኑ ኮዮኮ።

¹⁴ዬሱሲ ሃይቂዲ ዴንዲዳይሳ ኑ ኣማኒዛ ጊዲኮ ዬሱሳ ኣማኒዳይታ ፆሲ ዬሱሳራ ሄሳꬆካ ዛሪ ሃ ዬዳና።

¹⁵ኑ ጎዳ ቃላን ኢንቴስ ጊዛይ ሃይሳ። ኑኒ ሃይቆንታ ፓፃ ዲዛይቲኔ ጎዳይ ያና ጋካናስ ጋምዓናይቲ ካሴ ሃይቂዳይታፔ ሲንꬃቶኮ።

¹⁶ጎዳይ ባ ሁዔራ ጊታ ኣዛዞን ኪታንቻታ ሃላቃ ጊሪሳራ ፆሳ ፁሩምባ ጊሪሳን ሳሎፔ ዎꬋና። ካሴ ኪርስቶሳ ኣማኒዲ ሃይቂዳይቲ ኢስቲ ካሴቲ ዴንዳና።

¹⁷ሄሳፌ ጉዬ ኑ ቃሴ ፓፃ ዲዛይቲ ጎዳ ጫርኮ ቦላ ጋጋናስ ኢስታራ ኢሲፌ ሻራራ ዴንዳና፤ ሄሳꬆካ ኑ ሜርናስ ጎዳራ ዳና።

¹⁸ሄሳ ጊሽ ሃይሳ ቃላን ኢሶይ ኢሳራ ሚኔቲቴ።