ᤖᤥᤔᤡ 2:4-22

⁴ᤔᤧ᤺ᤱᤃᤪ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤁᤧᤍᤢᤰᤋᤡᤒᤠᤴ. ᤏᤠᤛᤡ ᤁᤧᤎ᤺ᤳᤋᤡᤒᤠᤴ ᤜᤧᤰᤁᤩᤠᤱ ᤁᤢᤛᤡᤰ ᤏ᤺ᤶᤏ᤺ᤶ ᤗ᤹ᤒᤠᤴ ᤜᤏᤧ ᤁᤧᤗᤣ᤺ᤳᤋᤢᤶᤒᤡ᥅ ᤂᤡᤏᤡ᤹ ᤗᤠᤕᤥᤗᤠᤶ ᤁᤧᤜᤡᤴᤍᤡᤖ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤁᤧᤍᤢᤰᤋᤡᤒᤠ ᤑᤠ᤹ᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤡ᥅

⁵ᤁᤖ ᤂᤡᤏᤡ᤹ ᤜᤠᤍᤡᤱ ᤁᤧᤎᤰᤐᤠ ᤏᤢ ᤗᤠᤕᤥᤗᤠᤶ ᤔᤧᤴᤏᤢ᤺ᤱᤔᤏᤠᤒᤠ ᤏᤡᤱᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ. ᤁᤢᤍᤥ᤺ᤵᤔᤠ ᤂᤠᤛᤧᤴᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤶᤍᤡᤱ ᤐᤡᤔᤠ ᤕᤧᤴ ᤌᤠᤖᤡᤰ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤁᤡᤵᤔᤠ ᤁᤧᤄᤢ᤺ᤒᤠ ᤁᤢᤛᤠᤰᤁᤧᤴᤏᤡᤴ ᤁᤧᤓᤥ᤺ᤰᤂᤢᤶᤗ ᤁᤧᤘᤕᤡ᤹ᤖᤥ॥

⁶ᤌᤣᤀᤠᤱᤓᤧᤸᤗᤧ “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤃ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤏᤢ᤺ᤒᤠ ᤏᤢ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤢᤀᤡᤛᤡ᤺ᤰᤁᤣ ᤏᤢ᤺ᤰᤋᤢ ᤐᤡᤖᤢᤛᤡ᤹ᤖᤥ॥”

⁷ᤁᤢᤓᤠ ᤔᤏᤠᤜᤠ᤹ᤖᤧ ᤆᤰᤔᤧᤸᤗ᤹ᤀᤣ ᤏᤢ᤺ᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤖ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤔᤡᤔᤡᤍᤡᤱ. ᤔᤡᤱᤛᤥ ᤀᤡᤱᤎᤠ᤺ᤱ ᤏᤢ ᤀᤠᤈᤢᤏᤡ ᤜᤡᤱᤔᤴ ᤔᤧᤃᤥ᤺ᤳᤋᤢᤖ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤐᤡᤖᤢᤛᤡ᤹ᤖᤥ॥

⁸ᤁᤖ ᤛᤧᤰᤂᤠ᤺ᤴ ᤁᤧᤏᤠ᤹ᤒᤠ. ᤀᤡᤱᤃᤠ᤹ᤖᤰ ᤆᤥᤃᤢᤱ ᤆᤠᤱ ᤁᤧᤗ᤹ᤒᤠ ᤜᤧᤰᤁᤩᤠᤱ ᤑᤧᤴ ᤐᤠ᤺ᤴᤏᤥ ᤁᤧᤒᤵᤐᤠ ᤔᤏᤠᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤡᤵᤔᤠ ᤁᤧᤄᤢ᤺ᤒᤠ ᤂᤢᤶᤍᤡᤱ ᤐᤡᤖᤢᤛᤡ᤹॥

⁹ᤜᤧᤰᤁᤩᤠᤱ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤖᤧᤰ. ᤋᤃᤡ ᤕᤜᤢᤍᤡᤜᤠ᤹ ᤜᤧᤰᤁᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤠᤱ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤠᤰᤐᤠ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤌᤠ᤺ᤛᤢᤛᤡ᤹ᤖᤥ॥

¹⁰ᤁᤖ ᤏᤢ᤺ᤒᤠ ᤐᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤔᤡᤔᤡᤍᤡᤱ. ᤔᤡᤱᤛᤥ ᤀᤡᤱᤎᤠ᤺ᤱ ᤏᤢ ᤛᤏᤠᤖᤢᤱᤅᤡᤴ ᤔᤧᤄᤥ᤺ᤛᤢ᤹–ᤋᤃᤡ ᤕᤜᤢᤍᤡᤜᤠ᤹ᤖᤧ ᤜᤧᤰᤁᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧᤀᤠᤱ ᤔᤧᤄᤥ᤺ᤛᤢ᤹ᤖᤥ॥

¹¹ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ ᤀᤣ᤺ᤰᤐᤀᤣ᤺ᤰ ᤔᤧᤈᤥᤃᤢᤴᤇᤡᤴᤗᤥ॥

¹²ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤛᤠᤶᤕᤥᤌᤡᤶ ᤔᤧᤱᤃᤳᤋᤢᤴᤇᤠᤱ ᤗᤠᤕᤥ ᤔᤧᤈᤥᤃᤢᤸᤗᤧ ᤂᤢᤶᤍᤡᤱ ᤔᤧᤄᤥ᤺ᤛᤢ᤹. ᤜᤧᤰᤁᤣᤗ᤹ᤖᤡᤰᤁᤣ ᤕᤜᤢᤍᤡᤜᤠ᤹ᤖᤧ ᤛᤠᤶᤕᤥᤌᤡᤶᤔᤡᤴ ᤔᤧᤃᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤗᤠᤕᤥ ᤔᤧᤈᤥᤃᤢᤸᤗᤧ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰᤁᤣ ᤂᤢᤶᤍᤡᤱ ᤔᤧᤄᤥ᤺ᤛᤢ᤹ᤖᤥ॥

¹³ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤔᤡᤴ ᤂᤧᤶᤔᤠᤀᤠᤱᤗᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤛᤠᤶᤕᤥᤏᤡᤒᤠ ᤀᤠᤶᤒᤥ᤺ᤱᤏᤧᤴ. ᤁᤖ ᤛᤠᤶᤕᤥᤌᤡᤶᤔᤡᤴ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤖᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤏᤡᤒᤠ ᤀᤠᤗᤣ᤺ᤳᤗᤥ॥

¹⁴(ᤜᤧᤰᤁᤣᤗ᤹ᤖᤡᤰᤁᤣ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤛᤠᤶᤕᤥᤌᤡᤶᤔᤡᤴ ᤔᤧᤱᤃᤳᤋᤢᤴ ᤁᤖ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤔᤧᤈᤥᤃᤢᤸᤗᤧ ᤀᤠᤶᤓᤠᤛᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤡᤰᤗᤢᤱᤔᤥᤗᤠᤶᤒᤠᤀᤣ ᤏᤢ᤺ᤒᤠ ᤏᤢ ᤋᤠᤵᤑᤧ᤺ᤶᤒᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ ᤁᤧᤗ᤹ᤒᤠᤴ ᤀᤥᤛᤣ᤺ᤴᤍᤠᤱ ᤐᤥ᤺ᤱᤗᤥ॥

¹⁵ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤡᤰᤗᤢᤱᤔᤥ ᤛᤠᤶᤕᤥᤌᤡᤶᤔᤡᤴ ᤛᤠᤵᤋᤧᤀᤠᤱ ᤐᤳ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤍᤠᤱ ᤔᤧᤈᤥᤃᤢ᤹ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤏᤡ᤹ ᤂᤠᤛᤡᤱᤅᤡᤸᤗᤧ ᤂᤧᤱᤜᤠ᤹ ᤁᤢᤓᤠ ᤕᤧᤶᤔᤥ ᤀᤠᤵᤋᤡᤰ ᤁᤢ᤺ᤳᤋᤢᤛᤡ᤹ ᤜᤧᤰᤁᤩᤠᤱ ᤁᤢᤓᤠ ᤕᤧᤶᤔᤥ ᤏᤠᤅᤢᤛᤡ᤹ᤖᤥ॥)

¹⁶ᤁᤴ ᤐᤠ᤺ᤴᤜᤠ᤹ᤃ ᤀᤡᤱᤃᤠ᤹ ᤀᤡᤱᤓᤥ᤺ᤛᤢᤱᤒᤠ ᤛᤢᤏᤠᤀᤡᤱ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋ ᤕᤧᤛᤢᤗᤠᤶᤒᤠ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤥᤒᤠ ᤐᤠ᤺ᤴᤜᤠ᤹ ᤂᤠᤛᤧᤴ ᤆᤥᤃᤢᤒᤠ ᤕᤧᤴᤏᤥ ᤐᤥ᤺ᤱᤗᤥ॥

¹⁷ᤁᤖ ᤀᤡᤱᤃᤠ᤹ ᤕᤜᤢᤍᤡᤀᤠᤖᤥ ᤁᤧᤒᤠ᤺ᤳᤋᤢᤀᤠᤱ ᤛᤠᤶᤕᤥᤌᤡᤶᤔᤡᤴ ᤏᤡᤱᤘᤠ᤹ ᤀᤡᤖᤧ ᤂᤥ᤺ᤵᤋᤢᤖ ᤁᤧᤈᤥᤃᤢ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤏᤡ᤺ᤳᤋᤢᤱ ᤑᤠ᤹ᤀᤠᤱ ᤀᤠᤱᤍᤡᤱ ᤁᤧᤗ᤹.

¹⁸ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ᤀᤡᤴ ᤁᤧᤏᤡ᤺ᤛᤢ᤹ᤀᤠᤱ ᤛᤠᤶᤕᤥᤌᤡᤶᤔᤡᤴ ᤁᤧᤜᤢ᤹ᤛᤡᤱᤒᤠᤸᤗᤧ ᤆᤥᤃᤢᤸᤗᤧ ᤏᤢ᤺ᤒᤠ ᤐᤠ᤺ᤴᤜᤠ᤹ ᤛᤣ᤺ᤰᤔᤠ ᤁᤧᤛᤢᤰᤋᤢ᤹.

¹⁹ᤜᤧᤰᤁᤩᤠᤱ ᤔᤡᤰᤑ᤺ᤶᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤶᤗᤥ᤺ᤒᤠ ᤏᤢ ᤂᤠᤍᤠᤶᤔᤠᤗᤢᤶᤔᤥ ᤁᤧᤘᤠ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤀᤥ᤺ᤳᤋᤡᤀᤠ ᤑᤠ᤹ᤀᤠᤱ ᤏᤡᤛ᤻ᤛᤣ ᤁᤧᤈᤥᤃᤢᤀᤠᤱ ᤁᤧᤘᤠ᤹.

²⁰ᤀᤍᤱᤜᤠ᤹ᤖᤧ ᤂᤢᤏᤡ᤹ ᤛᤢᤈᤠᤍᤠᤱᤒᤠ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤧᤸᤗᤧ᤺ᤔᤏᤠᤒᤠᤜᤠ᤹ᤖᤧ ᤂᤢᤏᤡ᤹ ᤛᤡᤰᤛᤠᤶᤒᤠᤀᤠ ᤗ᤹ᤖᤡᤰ ᤁᤧᤀᤡ᤺ᤳᤋᤢ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤛᤠᤶᤕᤥᤌᤡᤶᤔᤥ ᤁᤠᤰ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤛᤧᤰᤂᤠ ᤐᤠ᤺ᤴᤜᤠ᤹ ᤂᤥ᤺ᤛᤢᤱᤅᤠᤱ ᤘᤠ᤹ᤀᤠ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢ᤹ᤖᤥ॥

²¹ᤜᤧᤰᤁᤣᤏᤧ ᤑᤠ᤹ᤃᤪ ᤂᤧᤏᤧ᤹ ᤘᤣ᤹ᤜᤠ᤹ ᤁᤧᤜᤢ᤹ᤖᤢᤛᤡᤀᤠᤱ ᤌᤣᤀᤠᤱ ᤀᤠᤒᤠᤅᤣ ᤁᤧᤴᤜᤢ᤹ᤛᤡᤱᤅᤡᤴᤒᤣ᥅ ᤂᤢ᤺ᤶᤔᤠ ᤔᤧ᤺ᤴ ᤗ᤹ᤖᤡᤰ ᤀᤡᤱᤃᤧᤓᤥ᤺ᤛᤢᤀᤠᤱ ᤁᤧᤄᤢ᤺ᤴᤒᤡ᥅

²²ᤂᤧᤏᤧ᤹ ᤘᤣ᤹ᤜᤠ᤹ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ ᤗ᤹ᤖᤡᤰ ᤁᤧᤔᤧᤳᤋᤢᤛᤡᤀᤠᤱ ᤀᤠᤒᤠᤅᤣ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤡ᥅ ᤏᤠᤘᤠᤀᤡᤳᤗᤠᤜᤠ᤹ ᤀᤠᤛᤡᤰᤔᤧᤗᤧ᤺ᤱ ᤁᤧᤒᤠ᤺ᤳᤋᤢᤀᤠᤱ ᤏᤠᤘᤠᤀᤡᤳᤗᤠ ᤁᤧᤕᤢᤱᤒᤠ ᤔᤠᤱᤜᤡᤶᤔᤥ ᤔᤧᤍᤥ᤺ᤴᤍᤢᤒᤠ ᤕᤠᤱᤅᤡᤴ ᤁᤧᤄᤢ᤺ᤳᤋᤢ᤹ᤒᤡ᥅