Roma 2:4-22

⁴Manetualain natudu dale susuen neu o ena. Ma Ndia dalen loan seli laꞌe-neu o tatao-nonoꞌim. Tehuu tao hata de o ta hosek neu sana? Fama te o ta bubuluk mae, Ana natudu dale susuen neu o, mita fo o laꞌo ela o sala-singgom mara fo fali muni Ndia muu.

⁵Tehuu o ia, langga batuk ma ta nau nenene! Ma o ta nau laꞌo ela o sala-singgom faa boe na! Dadi o tao mala o huku-dokim tamba nambera bali. Neu ko mete ma dae-bafok fai mateꞌen ena, na, Manetualain nae timba-tai basa hatahorir leleo-lalaꞌon nara. Neu ko basa hatahorir bubuluk rae, Manetualain naketu hatahorir dedeꞌan no ndoos. Faik naa, Ana hukun berak neu o, nahuu Ana ta simbok o tatao-nonoꞌin nara.

⁶O leleo-lalaꞌom talo bee, na, neu ko Manetualain bala tungga hata fo o taok.

⁷Hatahorir fo mana tao hata fo neulauk nakandoo, neu ko Ana fee sara masodak tetebes ta mana ketuk. Ara hambu hada-horomatak, nade malole, ma rasoda rakandoo ro Ndia.

⁸Tehuu Manetualain ta simbok hatahori fo mana tao manggarauk. Ana namanasa sara tebe-tebe, huu ara ralela kada laban a mesan. Ara ta tao tungga hata fo ndoos, huu ara kada tao tungga hata fo manggarauk a mesan.

⁹Basa hatahorir fo mana tao manggarauk kara, neu ko hambu susa-sonak ma sosoek. Leo mae hatahori Yahudi do, hatahori ta Yahudi, laꞌe basa sara.

¹⁰Tehuu basa hatahorir fo mana tao hata fo neulauk, neu ko Manetualain nakadedemak kasa, ma fee sara hada-horomatak fo ara leo-laꞌo no lino-lendek ma mole-damek. Leo mae hatahori Yahudi do, hatahori ta Yahudi, basa sara hambu.

¹¹Te Manetualain ta memete matak na!

¹²Manetualain Hohoro-lalanen naa, tuda laꞌe basa hatahorir. Mete ma hambu hatahori ta mana bubuluk Hohoro-lalanek naa, fo tao salak, neu ko ana lenggo feꞌe numa Manetualain mai. Mete ma hambu hatahorir bubuluk Hohoro-lalanek naa ena, tehuu ana tao salak, neu ko Manetualain pake Hohoro-lalanek naa bali, fo naketu-naladi ndia huku-dokin. Neu ko ara oo lenggo feꞌe numa Manetualain mai boe, nahuu ara lena-langga Ndia Hororo-lalanen ena.

¹³Mete ma nau malole mia Manetualain, ta dai no kada nenene Ndia Hohoro-lalanen mesa kana. Hatahorir oo muste tao tungga Ndia Hohoro-lalanen boe, dei fo Ana nau simbok kasa. Boso kada mamanene a!

¹⁴Leo mae hatahori ta Yahudir, ta bubuluk Manetualain Hohoro-lalanen isin, tehuu hambu ketuk numa sira mai tao tungga Hohoro-lalanek naa. Huu dalen nara ndia rafada sara, bee ndia ndaa, ma bee ndia sala.

¹⁵No dalak naa, ara ratudu rae, Manetualain Hohoro-lalanen neni surak nai sira dalen dale, nok bali abas fo Manetualain tenu-lolon nai sira dalen. Sira dale heli-helin dale ndia timba-tai hata fo sira taok kara. Boe ma sira duduꞌan nara mesa kasa ndia rakasasaꞌek salak, mete ma sira tao salak, ma rafada mete ma sira tao ndoos.

¹⁶De neu ko mete ma Manetualain soꞌuk nala Yesus Karistus dadi neu Mana Maketu-maladi Dedeꞌak ena, Ana nau parisa no lutu-lelon basa dedeꞌa nemeninok kara fo bei nefunik nai hatahorir dalen dale. Au fee nenorik talo naa, nandaa no manai Lamatuak Hara Lii Malolen.

¹⁷Dadi ei hatahori Yahudir, talo bee? Ei hii soꞌuk aom mara mae, ei mesa ngga ndia toꞌu Manetualain Hohoro-lalanen fo Ana nakondan tungga baꞌi Musa, hetu? Ei oo soa mabafa loa laꞌe-neu ei nekeesam mia Manetualain boe.

¹⁸Tebe! Ei bubuluk Manetualain hihii-nanaun ena. Ei bubuluk bee ndia neulaun lenak ena. Ei bubuluk basa dedeꞌak kara iar ena, nahuu meser asa ranori ei numa Manetualain Hohoro-lalanen mai ena.

¹⁹Ei mamahere aom mara mae, ei bisa matudu dalak soa-neu hatahorir ta mana bubuluk rae bee reu. Ei tao aom mara nok bali manggaledok fo nasaꞌa soa-neu basa hatahorir fo mana leo-laꞌo nai makiuk dale.

²⁰Huu ei toꞌu Manetualain Hohoro-lalanen, ei duꞌa mae ei bubuluk basa-basan, ma toꞌu mala basa hata fo ndoos, hetu? Huu naa de ei duꞌa mae, ei bisa manori hatahori nggoa bebek ma kakana kadiꞌi anak kara fo ta mana ralela hata-hata.

²¹Dadi au ae atane talo ia: ei hii manori hatahori laen nara, tehuu tao hata de ei mesa ngga ta nau manori hata-hata?! Ei hii hene mimbar fo parenda mae, “Boso mamanaꞌo.” Tehuu tao hata de ei mesa ngga mamanaꞌo?!

²²Ei fee nenorik mae, “Boso hohongge-lelena mia hatahori fo ta sao toum do ta sao inam.” Tehuu tao hata de ei mesa ngga hohongge-lelena?! Ei mburuk malan seli mia bua sosonggok kara, tehuu tao hata de ei mesa ngga panake mala buas ruma uma sosonggok mai?!