ሮሜ 2:4-22

⁴ዎይኮ ፆሳ ኬሃቴꬃ፥ ጌንጫኔ ዳንዳዓ ዳሮቴꬃ ካꬋዬ? ፆሳይ ኔው ኬሂዳይ ኔና ናጋራፔ ዛራናው ጊዴይሳ ኤሪኪዬ?

⁵ሺን ሂንቴው ሹቻ ዎዛኒኔ ሲዖና ሃይꬂ ዴዔስ። ሄሳ ጊሾ፥ ፆሳ ሃንቆይኔ ፂሎ ፒርዳይ ቆንጪያ ጋላስ፥ ኔ ቦላ ፒርዳይ ዳራና ሜላ ኦꬃሳ።

⁶ፆሳይ ኢሱዋስ ኢሱዋስ ኢያ ኦሱዋ ሜላ ኢማና።

⁷ሎዖ ኦሶን ሚኒዲ፥ ጋላታ፥ ቦንቾኔ ꬋዮና ዴዑዋ ኮዬይሳታስ ፆሳይ ሜሪና ዴዑዋ ኢማና።

⁸ሺን ባንታና ሲቄይሳታ፥ ቱማ ኢፄይሳታኔ ኢታባ ኦꬃናው ኮዬይሳታ ቦላ ፆሳ ሃንቆይኔ ፒርዳይ ያና።

⁹ኢታባ ኦꬂያ ኣሳ ኡባ፥ ኮይሮቲዲ ኣይሁዴታ፥ ካሊዲ ኣይሁዴ ጊዶና ኣሳ ሜቶይኔ ዋዬይ ጋካና።

¹⁰ሺን ፆሳይ ሎዖ ኦሶ ኦꬂያ ኡባስ፥ ኮይሮቲዲ ኣይሁዴታስ፥ ካሊዲ ኣይሁዴ ጊዶናይሳታስ ጋላታ፥ ቦንቾኔ ሳሮቴꬃ ኢማና።

¹¹ፆሳይ ሶምዖ ቤዒዲ ኣሴ ሻኬና።

¹²ሂጌይ ባይና ናጋራ ኦꬂዳ ኡባይ ሂጌይ ባይና ꬋያና። ሂጌይ ዴዒሺን፥ ናጋራ ኦꬂዳ ኡባይ ሂጌን ፒርዴታና።

¹³ፆሳ ሲንꬃን ፂሌይሳቲ ሂጌ ናጌይሳታፔ ኣቲን ሂጌ ሲሳ ፃላላ ሲዔይሳታ ጊዶኮና።

¹⁴ሂጌይ ባይና ኣይሁዴ ጊዶና ኣሳይ ሜꬎን ሂጌይ ኪቴይሳ ኦꬆሶና። ኤንታው ፃፌቲዳ ሂጌይ ባይና ኢፂኮካ ኤንቲ ባንታ ዎዛናን ሂጊያ ኤሮሶና።

¹⁵ኤንታ ሃኖታይ፥ ሂጌ ኪታይ ኤንታ ዎዛናን ፃፌቲዳይሳ ቤሴስ። ቃሲ ኤንታ ካሃይ ኤንታ ቦላ ማርካቴስ። ኤንታ ቆፋይ ኢሲ ኢሲ ቶሆ ኤንታና ባላ ጌስ፤ ኢሲ ኢሲ ቶሆ ኤንታና ሊኬ ጌስ።

¹⁶ታ ታማርሲዳ ዎንጌላ ሜላ ፆሳይ ዬሱስ ኪሪስቶሳ ባጋራ ኣሳ ዎዛናን ጌሚዳ ቆፋ ፒርዲያ ዎዴ ሄሲ ኤሬታና።

¹⁷ሺን ኔ ኔና ኣይሁዴ ጋሳ፤ ሂጌን ዜምፓሳ፤ ፆሳን ጬቃሳ።

¹⁸ኔ ኦꬃና ሜላ ፆሳይ ኮያባይ ኣይቤኮ ኤራሳ። ሂጊያ ታማሪዳ ጊሾ ቱማ ጊዲያባ ዶራናው ኤራሳ።

¹⁹ኔኒ ቆቄታ ካሌꬄይሳ፥ ቃሲ ꬉማን ዴዔይሳታስ ፖዖ ጊዴይሳ ሻካ ኤራሳ።

²⁰ኔኒ ሂጊያፌ ዴሚዳ ኤራቴꬃኒኔ ቱማቴꬃን ኤያታ ኤሪሴይሳኔ ዮጋታ ታማርሴይሳ ጊዴይሳ ኤራሳ።

²¹ያቲን፥ ኔ ሃራታ ታማርሴይሲ ኔ ኔና ኣይስ ታማርሲኪ? ኔኒ፥ «ካይሶቶፓ» ጋሼ፥ ኔኒ ኔ ሁዔን ካይሶታዬ?

²²ኔኒ፥ «ላሞፋ» ጋሼ፥ ኔኒ ኔ ሁዔን ላማዬ? ኔኒ ኤቃ ኢፃሼ፥ ኤቃይ ዴዒያ ኬꬃ ቦንቃዬ?