ጋላቲያ 5

1

2

3

4

5

6

¹ኑና ኪርስቶሲ ጌሺዳይ ኑኒ ጌሻቴꬃን ዳናሳ። ሄሳ ጊሽ ሚኒ ኤቂቴ፤ ናምዓንꬆ ኣይሌቴꬃ ቃምባራን ጌሎፒቴ።

²ታ ኢንቴስ ጊዛይሳ ዎዝናን ዎꬂቴ፤ ኢንቴ ቃፃሬታና ኮይኮ ኪርስቶሲ ኢንቴና ኣይኔ ጎዔና ጋዳ ታ ጳዉሎሲ ኢንቴስ ዮታይስ።

³ቃፃሬታና ኮዪዛይቲ ዉሪ ዎጋ ዉርሲ ፖላናይሲ ዶሳ ጊዶንታይሳ ታ ኢንቴስ ኢሳስ ኢሳስ ቆንጬን ዮታይስ።

⁴ኢንቴኖ! ዎጋ ናጎን ፂላና ዋይቲዛይቶ፤ ኢንቴ ኪርስቶሳፔ ሻኬቲዴታ፤ ኢዛ ኪያቴꬃፌካ ሃኪዴታ።

⁵ኑ ቃስ ኡፋይሳ ናጌቲዛ ፂሎቴꬃ ፆሳ ኣያና ባጋራ ኣማኖን ላሞቴꬃን ናጎን ዶስ።

⁶ኣሲ ዬሱስ ኪርስቶሳን ዲኮ ቃፃሬቲን ዎይኮ ቃፃሬቶንታ ኣጊን ኣይኔ ጎዔና፤ ጎዓይ ዲዛይ ሲቆን ቆንጪዛ ኣማኖን ፃላ።

⁷ካሴ ሎዖ ዎꬅ ዎፄታ ሺን፤ ሃዒ ኢንቴስ ꬉጴ ጊዲዲ ቱማስ ኢንቴ ኣዛዜቶንታ ማላ ኢንቴና ዲጊዳይ ኦኔ?

⁸ሄሳ ማላ ባሌꬆይ ኢንቴና ፄይጊዳ ፆሳፌ ጊዴና።

⁹“ጉꬃ ኢርሾይ ሊፄ ዉርሲ ዴንꬄስ” ጌቴቲዛ ማላ።

¹⁰ኢንቴስ ሃራ ቆፋይ ዴና ጋዳ ታኒ ጎዳን ኣማኔታይስ፤ ኢንቴስ ቲኪ ጊዛዝ ኦꬂዛይ ኦና ጊዲኮኔ ኢዚ ባ ፒርዳ ኤካና።

¹¹ታ ኢሻቶ! ሃኖ ጋካናስ ታ ሳባኪዛይሲ ኣሲ ኣታናስ ቃፃሬታና ቤሴስ ጊዛዝ ጊዲዳኮ ሂስቲን ሃኖ ጋካናስ ኣዛስ ታና ጎዲዞ? ሄሳ ማላ ጊዲዳኮ ኪርስቶሳ ማስቃሌይ ኣሳስ ꬉጴ ጊዴናኮሺን።

¹²ኢንቴስ ቲኪ ጊዛዝ ኦꬂዛ ኣሳቲ ጮ ዎጋራ ቃፃሬቴꬅ ኣጊዲ ሙሌራ ቃንፂ ዬጌቶ።

¹³ታ ኢሻቶ! ኢንቴ ጌሻቴꬃስ ፄይጌቲዴታ፤ ኢንቴ ኢንቴ ጌሻቴꬃ ዛሪዲ ኢንቴስ ኣሾ ኣሞ ፖላናስ ጎዔቶፍቴ። ሄሳፌ ኢንቴ ኢንቴ ጋርሳን ሲቆን ኢሶይ ኢሳ ማዲቴ።

¹⁴ዎጋይ ዉሪ ሺቄቲዲ ኢሲ ቃላን ቃሼቴስ፤ ሄሲካ “ኔኒ ኣሴ ኔ ማላ ዶሳ!” ጊዛይሳ።

¹⁵ጊዶ ኣቲን ኢንቴ ኢሶይ ኢሳራ ሳፄቲዛይታ ጊዲኮ ኢንቴ ኢንቴ ጋርሳን ዉሮንታ ማላ ናጌቲቴ።

¹⁶ሄሳ ጊሽ ታ ኢንቴና ኣያናን ሲሜሬቲቴ፤ ቃሴካ ኣሾ ኣሞካ ፖሎፒቴ ጋይስ።

¹⁷ኣሾይ ኣያናይ ኮዮንታዝ ኣሞቴስ። ኣያናይካ ኣሾይ ኮዮንታዝ ኣሞቴስ፤ ሃይቲ ኢሶይ ኢሳራ ባ ጋርሳን ኢፄቲዛ ጊሽ ኢንቴ ኢንቴ ኮይዳ ማላ ኦꬄኬታ።

¹⁸ኢንቴ ኣያናን ዲዛይታ ጊዲኮ ዎጋስ ሃሬቲዛይታ ጊዴኬታ።

¹⁹ኣሾ ኦሶይ ቆንጬን ኤሬቴስ፤ ሄሲካ ላይማቴꬅ፥ ቱናቴꬅ፥ ላይማ ካስ፥

²⁰ኤቃስ ጎይኖ፥ ቢታ፥ ኢፄቴꬅ፥ ኦሽ፥ ቃናቴቴꬅ፥ ሃንቆ፥ ባና ፃላ ዶሶ፥ ሻኬቴꬅ፥ ዙፔቴꬅ፥

²¹ቃናቴቴꬅ፥ ማꬆቴꬅ፥ ኣላሜ ዬꬅ ዬፄꬂኔ ሄይታንታ ሚሳቲዛይታ። ታኒ ኢንቴስ ካሴ ዮቲዳ ማላ ሃዒካ ኢንቴ ናጌታና ማላ ቆፊሳይስ። ሄሳ ማላ ዱስ ዲዛይቲ ዉሪካ ፆሳ ካዎቴꬅ ላቴቴና።

²²ኣያና ኣይፌይ ጊዲኮ ሲቆ፥ ኡፋይስ፥ ሳሮቴꬅ፥ ዳንዳያ፥ ኪያቴꬅ፥ ሎዔቴꬅ፥ ኣማኔቴꬅ፥

²³ኣሽኬቴꬅ፥ ባርካ ባና ሃሮ፤ ሃይታንታ ማላ ዲጊዛ ዎጋይ ባዋ።

²⁴ዬሱስ ኪርስቶሳስ ጊዲዳይቲ ኣሾ ኢዛ ኢታ ቆፋራኔ ኢዛ ኢታ ኣሞቴꬃራ ኢሲፌ ካቂዳ።

²⁵ኑ ኣያናን ዳና ኮይኮ ኣኔ ኣያናን ሲሜሬቶስ።

²⁶ኑኒ ኢሶይ ኢሳ ኢታስ ዴንꬄꬂሼኔ ቃናቴቲሼ ጮ ሜላ ጬቄቲዛይሳ ኣኔ ኣጎስ።