ጋላቲያ 4

1

2

3

4

5

6

¹ታ ጊዛይ ዬሌቲዳ ናይ ላታይ ኢዛስ ጊዲኮካ ኢዚ ቢዲ ላታና ጋካናስ ኣይሌፌ ዱማ ጊዴና።

²ኢዛ ኣዋይ ጊዳ ዎዴይ ጋካናስ ኢዚ ባና ዲቺዛይታ፥ ታማርሲዛይታ ኩሼን ጋምዔስ።

³ኑካ ካሴ ኣያና ዮዖስ ጉꬃ ና ማላ ዲዛ ዎዴ ሃይሳ ሃ ኣላሜዛ ዎጋ ጋርሳን ሃሬቲ ዴዒዶስ።

⁴ጊዶ ኣቲን ካሴ ባ ቆፒ ዎꬂዳ ዎዴይ ጋኪን ፆሳይ ማጫሳፔ ዬሌቲዲ ዎጋ ናጊዳ ባ ናዛ ኑስ ዬዲዴስ።

⁵ሄሲካ ኑኒ ኢዛ ናይታ ጊዳና ማላኔ ዎጋ ጋርሳን ዲዛይታ ዎዛና ማላ ሃኒዴስ።

⁶ኢንቴ ኢዛ ናይታ ጊዲዳ ጊሽ ፆሳ “ኣቦ” ጊዲ ፄይጊዛ ባ ናዛ ኣያና ኑ ዎዝናን ዬዲዴስ።

⁷ሄሳ ጊሽ ሃይሳፌ ጉዬ ኔ ናፔ ኣቲን ኣይሌ ጊዳካ። ኔኒ ና ጊዲዳ ጊሽ ፆሲ ኔና ባይሳ ላቲዛዴ ሂስቲዴስ።

⁸ኢንቴ ፆሴ ኤራናፔ ካሴ ፆሴ ጊዶንታ ኤቃታስ ኣይሌታ።

⁹ሃዒ ጊዲኮ ፆሴ ኤሪዴታ፤ ቃሴካ ፆሳን ኤሬቲዴታ። ሂስቲን ቃሴካ ጉዬ ሲሚዲ ጌዴ ጎዓይ ባይንዳ ጮ ዳቡሪሲዛ ቲሚርቴኮ ዋኒዲ ሲሚዴቲ? ሲሚዲ ቃሴካ ኣይሌቴꬃ ቃምባራን ዋፄታና ኮዬቲ?

¹⁰ዱማ ጋላሳታ፥ ኣጊናታ፥ ዎዴታኔ ላይꬃታ ኢንቴ ቦንቼታ።

¹¹ታ ኢንቴናራ ዳቡሪዳይሲ ጮ ሜላ ጊዳንዴ ጋዳ ባባይስ።

¹²ታ ኢሻቶ! ታ ኢንቴና ሚሳቲዳ ማላ ኢንቴካ ታና ሚሳታና ማላ ታ ኢንቴና ዎሳይስ። ኢንቴ ታና ኣይኮካ ቆሂቤይኬታ።

¹³ኢንቴ ኤሪዛ ማላ ታ ኢንቴስ ኮይሮ ሚሺራቾ ቃላ ሳባኪዳይ ሳኮ ጋሶና።

¹⁴ታ ሳኮይ ኢንቴስ ሜቶ ጊዲንካ ታና ሳሌቲቤይኬታ ዎይኮ ታና ሃራሴቲቤይኬታ፤ ጊዶ ኣቲን ኢንቴ ታና ፆሳ ኪታንቻ ማላኔ ሄሳፌካ ቦላራ ዬሱስ ኪርስቶሳ ማላ ሞኪ ኤኪዴታ።

¹⁵ሂስቲን ሃዒ ሄ ኢንቴ ኡፋይሳይ ኣዋ ቢዴ? ኢንቴስ ሃኒዛዝ ጊዲዳኮ ኢንቴ ኢንቴ ኣይፌ ታስ ኬሲ ኢማናስ ጉዬ ጎንታይሳ ታ ኢንቴስ ማርካታይስ።

¹⁶ታኒ ቱማ ኢንቴስ ኬሳ ዮቲዳ ጊሽ ኢንቴስ ሞርኬ ጊዳዲናሻ?

¹⁷ሄይቲ ኣሳቲ ኢንቴና ባኮ ኤካናስ ዳቡሬቴስ ኣቲን ሎዖስ ዳቡሬቴና። ኢስቲ ኮዪዛይ ኢንቴና ኑፔ ሻኪዲ ባ ኣስ ሂስታናሳኮ!

¹⁸ሎዖስ ሚንዳቴꬂ ሎዖ፤ ሄሲካ ሃናናስ ቤሲዛይ ኡባ ዎዴ ጊዲኮፌ ኣቲን ታ ኢንቴናራ ዲዛ ዎዴ ፃላ ጊዶፖ።

¹⁹ታ ናይቶ ኪርስቶሲ ኢንቴ ዎዝናን ፃፌቲን ታ ቤያና ጋካናስ ኢንቴ ጊሽ ታ ሚፃታይስ።

²⁰ታ ኢንቴ ጊሽ ቆፋን ሜቶታዲስ። ታ ዳንዳዪዛኮ ሃዒ ኢንቴ ጊዶን ቤታዳ ኢንቴና ሎዔꬃ ታማርሲዛኮ ኣይ ማላ ዶሳዚና!

²¹ኢንቴኖ! ዎጋ ጋርሳን ኣቃና ኮዪዛይቶ ኣኔ ታስ ዮቲቴ፤ ዎጋይ ኣይ ጊዛኮኔ ሲይቤይኬቲ?

²²ኣብራሃሜስ ኢሶይ ኣይሌፌ ኢሶይ ቃስ ጎቃይፌ ዬሌቲዳ ናምዑ ናይቲ ዲዛይሲ ጌሻ ማፃፋን ፃፌቲዴስ።

²³ኣዪሌፌ ዬሌቲዳ ናዚ ኣሾ ዎጋ ማላ ዬሌቲዴስ። ሃንኮ ጎቃይፔ ዬሌቲዳይሲ ኡፋይሳ ቃላ ማላ ዬሌቲዴስ።

²⁴ሃይቲ ናምዑ ማጫሳቲ ናምዑ ጫቆታ ቤሲዛይታ ጊዲዳ ጊሽ ሃይሲ ሌሚሶስ ኢሜቲዴስ። ኮይሮ ጫቆያ ሲና ዙማ ቦላ ጊዳሼ ኣይሌቴꬃስ ጊዲዛ ናይታ ዬሊዛሮ፤ ኢዛካ ኣጋሮ።

²⁵ሄሳ ጊሽ ኣጋራ ኣራቤ ቢታን ዲዛ ሲና ዙማ ጊሽ ጊዳዳ ሃዒ ዲዛ ዬሩሳላሜ ካታማዮ ሚሳታዉስ፤ ኢዛ ባ ናይታራ ኣይሌቴꬃን ዳዉስ።

²⁶ፑዴ ቦላ ሳሎን ዲዛ ዬሩሳላሜይ ጊዲኮ ጎቃ ጊዳዳ ዳዉስ፤ ኢዛካ ኑ ኣዮ።

²⁷“ኔኒ ዬሎንታ ማካራዬ ኡፋዬታ! ሃኔ ሚፃታ ኤሮንታሬ! ‘ኢሊሊ’ ጋ ዋሳ፤ ኣዚናይ ዲዛሪፔ ኣዚናይ ባይንዳሪ ናይቲ ዳሪዳ” ጌቴቲ ጌሻ ማፃፋን ፃፌቲዴስ።

²⁸ሄሳ ጊሽ ታ ኢሻቶ! ኢንቴካ ዪሳቃ ማላ ኡፋይሳ ቃላ ናይታኮ።

²⁹ኣሾ ሼኔ ማላ ዬሌቲዳይሲ ኣያና ዎልቃን ዬሌቲዳይሳ ጎዲዴስ፤ ሃዒካ ጎዴꬆን ዴስ።

³⁰ጊዶ ኣቲን ጌሻ ማፃፋይ ቃሴ ኣይ ጊዜ? “ኣይሌዮ ኢዚ ናዛራ ዲጋ፤ ኣይሌ ናይ ጎቃይ ናራ ላቴና” ጌስ።

³¹ሄሳ ጊሽ ታ ኢሻቶ! ኑኒ ጎቃይ ናይታ ኣቲን ኣይሌ ናይታ ጊዶኮ።