ጋላቲያ 3

1

2

3

4

5

6

¹ኢንቴኖ ዩሺ ቆፖንታ ጋላቲያ ኣሳቶ! ኢንቴስ ባሌቶንታ ማላ ኢዛ ካቄቴꬃ ታ ኢንቴ ሲንꬃን ሚሲሌ ማላ ጊጊሳ ቤሳዲስኮ ሺን ኢንቴና ኦኔ ቢቲዳይ?

²ኢንቴ ፂሎ ኣያና ኤኪዳይ ዎጋ ናጎኔዬ? ሳባኬቲዳ ቃላ ኣማኖኔ? ታ ሃኖ ኢሲኒዮ ኢንቴፌ ኤራና ኮያይስ።

³ኢንቴ ሄሳ ማላ ቆፒ ኤሮንታ ኣሴ? ፆሳ ኣያናን ኦይኪዳይሳ ዛሪዲ ኣሾ ሃኖን ፖላናስ ዋዬቴቲ?

⁴ቱሙ ኢንቴ ሃኖ ጋካናስ ዳቡሪዳ ዳቡርሳይ ጮ ሜላ? ጮ ሜላ ጊዲኮ ሃዳ ዳቡሪዴታ።

⁵ፆሲ ኢንቴስ ኣያና ኢሚዳይኔ ኢንቴ ኣቻን ማላታ ኦꬂዳይ ኢንቴ ዎጋ ናጊዳ ጊሼዬ? ዎይኮ ኢንቴ ሲዪዳ ቃላን ኣማኒዳ ጊሼ?

⁶ኣኔ ኢንቴ ኣብራሃሜ ጊሽ ቆፒቴ፤ ጌሻ ማፃፋን “ኢዚ ፆሴ ኣማኒን ኣማኖይ ኢዛስ ፂሎቴꬃን ቆዴቲዴስ” ጌቴቲ ፃፌቲዴስ።

⁷ሄሳ ጊሽ ኣማኒዛይቲ ኣብራሃሜ ናይታ ጊዲዳይሳ ዎዝናን ዎꬂቴ።

⁸ኣይዛቤይ ኣማኖን ኣታናይሳ ኤሪዲ ፆሲ ካሴ ጌሻ ማፃፋን “ዴሬይ ዉሪ ኔ ባጋራ ኣንጄታና” ጊዲ ሚሺራቾ ቃላ ኣብራሃሜስ ዮቲ ዎꬂዴስ።

⁹ሄሳ ጊሽ ኣማኒዛይቲ ዉሪ ኣማኒዛ ኣብራሃሜራ ኢሲፌ ኣንጄቲዳይታ።

¹⁰“ዎጋ ናጎን ኣማኔቲዛይቲ ዉሪካ ቃንጌꬃ ጋርሳን ዴቴስ። ዎጋ ማፃፋታን ፃፌቲዳይሳ ዉርሲ ኦꬆንታዴይ ኢዚ ቃንጌቲዳዴ” ጌቴቲ ፃፌቲዴስ።

¹¹“ፂሎ ኣሲ ኣማኖን ዴዔስ” ጊዛ ጊሽ ኦኒካ ፆሳ ሲንꬃን ዎጋን ኣቶንታይሲ ጌሻ።

¹²ዎጋይ ኣማኖን ፃጲቤና። ጊዶ ኣቲን “ዎጋታ ዉርሲ ናጊዛዴይ ሄ ኢዚ ናጊዳይሳን ዴዖን ዳና” ጌቴቲዴስ።

¹³“ሚꬃ ቦላ ካቄቲዛ ኣሲ ቃንጌቲዳዴ” ጌቴቲ ፃፌቲዳ ጊሽ ኪርስቶሲ ኑ ጊሽ ቃንጌቲዳዴ ጊዲዲ ኑና ዎጋ ቃንጌꬃፌ ዎዚዴስ።

¹⁴ኣብራሃሜስ ኢሜቲዳ ኣንጆይ ዬሱስ ኪርስቶሳ ባጋራ ዴሬስ ጋካና ማላ ኑና ዎዚዴስ። ሄሲካ ኑኒ ኣማኖን ፂሎ ኣያና ኤካና ማላ ሃኒዴስ።

¹⁵ታ ኢሻቶ! ኣኔ ታ ኢንቴስ ኣሲ ባ ዱሳን ሃኒዛ ሚሽ ሌሚሶ ኢማይስ። ሃራይ ኣቶ ሺን ኣሲ ኢሲቶ ጫቂዳ ቃላ ኢሲቶ ጫቂዳፔ ጉዬ ኦኒካ ሻራናስ ዎይኮ ሃራ ኢዛ ቦላ ጉጃና ዳንዳዮንታይሳ ማላ ሃይሲካ ሄሳ ማላ።

¹⁶ፆሲ ኣብራሃሜስ ዮቲዳ ቃላይ ኣብራሃሜሲኔ ኢዛ ዜሬꬃሳ። ጌሻ ማፃፋይ ዳሮ ኣሳስ ዮቲዛ ማላ “ኢዛ ዜሬꬃታስ” ጌና፤ ጊዶ ኣቲን ኢሲ ኣሳስ ዮቴቲዛ ማላ “ኔ ዜሬꬃስ” ጌስ። ሄሲካ ኪርስቶሳ።

¹⁷ታ ጊዛይካ ሃይሳ፤ ኦይዱ ፄታኔ ሄꬑ ታሙ ላይꬃፌ ጉዬን ኢሜቲዳ ዎጋይ ካሴቲዲ ፆሲ ሚንꬂዳ ጫቆዛ ላሊዲ ቡሮ ሃናና ሂዶታ ቃላ ሻሬና።

¹⁸ላታይ ዎጋን ሃኒዛኮ ሂዶታ ቃላን ጌላናስ ኮሼና ሺን፤ ፆሲ ባ ኪያቴꬃ ቃላን ኣብራሃሜስ ኢሚዴስ።

¹⁹ሂስቲን ዎጋይ ኣዛስ ኢሜቲዴ? ዎጋይ ኢሜቲዳይ ኣሳይ ዎጋ ዬꬊ ኣꬊዛ ጊሽ ሄ ኡፋይሳይ ቤሲዛ ዜሬꬃይ ያና ጋካናሳ፤ ዎጋይ ዪዳይካ ኪታንቻታ ባጋራ ጋና ጊዲዛ ኢሳዴ ባጋራ ዪዴስ።

²⁰ጊዲኮካ ጋናዚ ኢሳ ባጋ ፃላ ፄሊዛዴ ጊዴና። ፆሲ ጊዲኮ ኢሳ ፃላ።

²¹ሂስቲን ዎጋይ ሲንꬃፌ ፆሲ ዎꬃና ቃላ ዲጊዛዜ? ሙሌካ ዲጌና። ዎጋይ ኢሜቲዳይ ኣሲ ኢዛን ዴዖ ዴማናስ ጊዲዳኮ ቱሙካ ፂሎቴꬂ ዎጋ ባጋራ ቤታናኮሺን።

²²ቃሴ ጌሻ ማፃፋይ ሃይሲ ኣላሜይ ዉሪካ ናጋራን ቃሼቲዳይሳ ኣዋጄስ። ሄሲካ ኣሲ ዉሪካ ዬሱስ ኪርስቶሳ ኣማኖን ቤቲዛ ሂዶታይ ኣማኒዛይታስ ኡባስ ኢሜታናሳ።

²³ሃይሲ ኣማኖይ ያናፔ ካሴ ኑኒ ዎጋን ቃሼቲዲ ጎርዳን ዶስ።

²⁴ሄሳ ጊሽ ኑ ኣማኖን ፂላና ማላ ዎጋይ ኑና ኪርስቶሳኮ ጋꬃናስ ናጊዛዴ ማላ ጊዲዲ ኑና ናጊዴስ።

²⁵ሃዒ ቃሴ ሄ ኣማኖይ ዪዳ ጊሽ ሃይሳፌ ጉዬ ኑኒ ዎጋ ጋርሳን ዶኮ።

²⁶ኢንቴ ዉሪካ ዬሱስ ኪርስቶሳ ኣማኖን ፆሳ ናይታ።

²⁷ኢንቴ ኪርስቶሳራ ኢሲኖ ጊዳናስ ፃማቄቲዳይቲ ዉሪካ ኪርስቶሳ ማይዖ ማላ ማይዒዴታ።

²⁸ኢንቴ ዉሪካ ዬሱስ ኪርስቶሳን ኢሲኖ ኣቲን ኣይሁዳኔ ጊሪኬ፥ ኣይሌኔ ጎቃ፥ ማጫኔ ኣዴ ጊዛ ዱማቴꬂ ዴና። ኢንቴ ዉሪካ ዬሱስ ኪርስቶሳን ኢሲኖ።

²⁹ኢንቴ ኪርስቶሳይታ ጊዲኮ ኢንቴ ኣብራሃሜ ዜሬꬃታ፤ ካሴ ኢሜቲዳ ሂዶታ ቃላ ማላ ኢንቴ ላታናይታ።