ጋላቲያ 2

1

2

3

4

5

6

¹ታማኔ ኦይዱ ላይꬃፌ ጉዬ ቃሴካ ዬሩሳላሜ ባዲስ፤ ሄ ዎዴ ባርናባሳራ ዳይስ፤ ቲቶሳካ ታናራ ኤካ ባዲስ።

²ታስ ቆንጪዳ ጊሽ ሄ ባዲስ። ኣይዛቤታ ጊዶን ታ ሳባኪዛ ሚሺራቾ ቃላካ ኢስታስ ዮታዲስ። ጊዶ ኣቲን ታ ካሴ ሜላ ዎፂዳኮ ጋዳኔ ቃሴካ ሲንꬃፌ ጮ ሜላ ዎፆንታ ማላ ሂርጋዳ ዋናቲዛይታስ ዱማ ኤሪሳዲስ።

³ሃራይ ኣቶሺን ታናራ ዲዛ ቲቶሲ ኢዚ ጊሪኬ ኣስ ሺን ኢዚ ቃፃሬታና ማላ ዎልቃꬂቤቴና።

⁴ሃይሲ ሃ ዮዖዚ ዴንዲዳይ ኢሲ ኢሲ ዎርዶ ኣማኒዛይቲ ኑኒ ዬሱስ ኪርስቶሳን ዴሚዳ ጌሻቴꬃ ዩዪ ዩዪ ፓጪ ቤያናሲኔ ኑና ኣይሌቴꬃን ዛሪ ጌልꬃናስ ሎዳራ ኑኮ ሳሊ ጌሊዳ ጊሻሳ።

⁵ሃይታ ሄ ኣሳታስ ኑኒ ኢሲቶካ ሃሬቲቤኮ። ሄሲካ ኢንቴ ሚሺራቾ ቃላ ቱማቴꬃን ኤቂ ዳና ማላ ጊዲኮ።

⁶ዋና ሚሳቲዛ ኣሳቲ ታስ ኣይኮካ ሚሳቴቴና፤ ፆሲ ኣሳ ኣይፌሶ ቤዪዲ ማዶ ኦꬂ ኤሬና። ሄይቲ ሄ ኣሳቲ ታ ኪቲዛ ዮዖታስ ታስ ኣይኮካ ጉጂቤቴና።

⁷ጊዶ ኣቲን ጴፅሮሲ ቃፃሬቲዳይታስ ሚሺራቾ ቃላ ሳባካናስ ሃዳራ ኤኪዳይሳ ማላ ታካ ቃፃሬቶንታይታስ ሚሺራቾ ቃላ ሳባካናስ ሃዳራ ኤኪዳይሳ ኢስቲ ኤሪዳ።

⁸ጴፅሮሲ ኣይሁዳታስ ሃዋሬ ጊዲ ኦꬃና ማላ ኦꬂዳ ፆሳይ ታካ ኣይዛቤታስ ሃዋሬ ጊዳ ኦꬃና ማላ ታስ ኦꬂዴስ።

⁹ዋናቲ ያቆቤይ፥ ጴፅሮሲኔ ዮሃንሲካ ታስ ኢሜቲዳ ፆሳ ኢሞታ ኣኬኪዲ ታሲኔ ባርናባሳስ ባ ኡሻቻ ኩሼ ኢሚዳ፤ ሄሳፌ ጉዬ ኑኒ ኣይዛቤታስ ኢስቲ ቃስ ኣይሁዳታስ ቃላ ዮታናስ ቃላ ኤሮ ጊ ኤኪዳ።

¹⁰ኢስቲ ኑስ ሃዳራ ጊዳይ ማንቆታስ ቆፋ ኑ ኣጎንታ ማላ። ታ ኣሞይካ ሄሳ ኦꬃናሳ።

¹¹ጴፅሮሲ ኣንፆኪያ ዪዳ ዎዴ ኤሬቲዳ ባላ ኦꬂዳ ጊሽ ታ ኢዛ ቆንጬን ቆጳዲስ።

¹²ኢሲ ኢሲ ኣሳቲ ያቆቤ ኣቻፌ ያናፔ ካሴ ጴፅሮሲ ኣይዛቤታራ ኢሲፌ ካꬅ ሚዛይሳ ኣጊዲ ኣሳቲ ዪዳፔ ጉዬ ቃፃሬቲዳ ኣሳታስ ባቢዲ ኣይዛቤታፔ ሻኬቲዳ ጉዬ ጉዬ ጉሲ ኦይኪዴስ።

¹³ባርናባሲካ ኢስታꬆ ቆꬌፔ ቆሞን ሃኖን ኤኬታና ጋካናስ ሃራ ኣይሁዳ ባጋፌ ኣማኒዳ ኣሳይካ ኢዛራ ኢሲፌቲዴስ።

¹⁴ኢስታ ኦሶይ ሚሺራቾ ቃላ ቱማን ጊዶንታይሳ ታ ኤራዳ ኩሜꬃ ኣሳ ኣቻን ጴፅሮሳ “ኔ ኣይሁዳ ኣስ ሺን ኣይዛቤታ ዎጋን ኣቲን ኣይሁዳታ ዎጋን ዳቤዪካ፤ ሂስቲን ኣይዛቤቲ ኣይሁዳታ ዎጋ ካላና ማላ ኣዛስ ዎልቃꬃይ?” ጋዲስ።

¹⁵“ኑኒ ኑ ዬሌቴꬃን ኣይሁዳታፔ ኣቲን ኣይዛቤታ ማላ ናጋራንቻ ጊዶኮ።

¹⁶ኣሲ ዬሱስ ኪርስቶሳን ኣማኖን ፂላና ኣቲን ዎጋ ናጎን ፂሎንታይሳ ኑ ኤሮስ። ሄሳ ጊሽ ዎጋ ናጎን ጊዶንታ ኪርስቶሳ ኣማኖን ኑ ፂላና ማላ ኑካ ቃሴ ዬሱስ ኪርስቶሳ ኣማኒዶስ። ዎጋ ናጎን ኦኒካ ፂሌና።

¹⁷ኑ ኪርስቶሳን ፂላና ኮይኮ ኑ ናጋራንቻታ ጊዲዳይሲ ቆንጪ ኤሬቲዴስ። ሂስቲን ኪርስቶሲ ናጋራይ ዳሪ ዳሪ ባና ማላ ኮዪዜ? ኮዬና።

¹⁸ታኒ ላሊዳይሳ ዛራዳ ታርካ ታ ኩሼራ ኬፂኮ ታካ ዎጋ ሞሪዳዴ ጊዲዳይሳ ኣማኔታይስ።

¹⁹ታኒ ፆሳስ ዳና ማላ ዎጋ ባጋራ ሄ ዎጋስ ሃይቃዲስ።

²⁰ታኒ ኪርስቶሳራ ካቄታዲስ፤ ሃይሳፌ ጉዬ ታኒ ታስ ዲኬ፤ ጊዶ ኣቲን ኪርስቶሲ ታ ጊዶን ዴስ። ሃዒካ ታ ኣሾን ዲዛ ዱሳይ ታና ዶሲዲ ባና ታ ጊሽ ኣꬂ ኢሚዳ ፆሳ ና ቦላ ዲዛ ኣማኖን ዲዛ ዱሳ።

²¹ታኒ ፆሳ ኪያቴꬅ ካዉሺኬ። ፂሎቴꬂ ዎጋ ናጎን ቤቲዛ ሚሽ ጊዲኮ ኪርስቶሲ ሜላ ሃዳ ሃይቂዴስ ጉሳካ!”