ኤፌሶኔ 6

1

2

3

4

5

6

¹ናይቶ! ኢንቴ ኢንቴና ዬሊዳይታስ ጎዳን ኣዛዜቲቴ። ሄሲ ኢንቴስ ቤሴስ።

²“ኔ ኣዋኔ ኔ ኣዪዮ ቦንቻ” ጊዛ ኣዛዞ ጊዶን ዲዛ ሂዶታይ ኮይሮ ኣዛዞ።

³ኔ ሄሳꬆ ኦꬂኮ ኔስ ሎዓናኔ ኔስ ላይꬃይ ቢታ ቦላ ኣዱቃና።

⁴ዬሊዳይቶ! ኢንቴካ ኢንቴ ናይታ ሃንቄꬆፍቴ፤ ጊዶ ኣቲን ኢንቴ ናይታ ጎዳ ዞሬኒኔ ሴራን ዲቺቴ።

⁵ኦሳንቻቶ ኢንቴ ኪርስቶሳስ ኣዛዜቲዛ ማላ ቢታ ቦላ ኢንቴና ኦꬂሲዛይታስ ያሻቴꬃኒኔ ቦንቾን ሱሬ ዎዝናፔ ኣዛዜቲቴ።

⁶ጮ ኣሳ ኣይፌን ቤታና ማላኔ ኦꬂሲዛይታፔ ዱና ኣንጆ ኤካናስ ጊዶንታ ኢንቴ ኪርስቶሳ ኣይሌታ ማላ ፆሳ ሼኔ ኩሜꬃ ዎዝናፔ ፖላና ማላ ዎዝናፔ ኣዛዜቲቴ።

⁷ኣሳስ ኦꬂዛ ማላ ጊዶንታ ጎዳስ ኦꬂዛ ማላ ኢንቴ ኩሜꬅ ዎዝናፔ ኦꬂቴ።

⁸ጋሶይካ ኣይሌ ጊዲን ዎይኮ ጎዳ ጊዲን ባ ኦꬂዛ ሎዖ ኦሶስ ኡባስ ዎይቶ ኤካናይሳ ኢንቴ ኤሬታ።

⁹ኢንቴኖ ጎዳቶ! ኢንቴካ ኢንቴ ኦꬂሲዛይታስ ሄሳꬆ ኦꬂቴ። ኢስታሲኔ ኢንቴስ ጎዳ ጊዲዳይ ቦላ ሳሎን ዲዛይሳ፤ ኢዚካ ኣስ ኣይፌሶ ፄሊ ማዶንታይሳካ ኢንቴካ ኤሪዛ ጊሽ ኦሳንቻታ ባቢሶ ኣጊዲ ሎዖ ኦꬂቴ።

¹⁰ሃራ ባጋራ ሚኖ ጎዳኒኔ ኢዛ ጊታ ዎልቃን ሚኒቴ።

¹¹ዳቡሎሳ ጌኔ ኦሶ ኢንቴ ኤቄታናስ ዳንዳያና ማላ ፆሳ ኦላ ማይዖታ ማይቴ።

¹²ጋሶይካ ኑ ኦሌታናይ ኣሾራኔ ሱꬃራ ጊዶንታ ሃይሳ ꬉማ ኣላሜዛ ሃሪዛ ጎዳታራኔ ዎልቃማታራ ቃሴካ ሳሎ ቦላ ዲዛ ቱና ኣያና ኦላንቻታራ ኦሌቶስ።

¹³ኢታ ጋላሳይ ጋኪሺን ኢንቴ ሞርኬ ዎልቃራ ኤቄታናስ ዳንዳያና ማላ ፆሳ ኦላ ማይዖታ ኩሜꬅ ማይዒቴ። ኢንቴ ኡባካ ፖሊዳፔ ጉዬ ሚኒ ኤቃናስ ዳንዳዬታ።

¹⁴ሄሳ ጊሽ ኢንቴ ፄሳን ቱማ ዚናሬ ማላ ዳንጬቲዲ ፂሎቴꬃ ፁሩሬታ ማላ ቲራን ማይዒዲ፥

¹⁵ሳሮቴꬃ ሚሺራቾ ቃላ ቶሆን ጫማ ማላ ኣꬂዲ ጊጌቲ ኤቂቴ።

¹⁶ሄይታንታፌካ ቦላራ ታማ ማላ ፖፖልዑ ጊዛ ኢታ ኣያና ዎንዳፌታ ኢንቴ ዉርሲ ቶይሳና ዳንዳያና ማላ ኣማኖ ጎንዳሌ ማላ ዴንꬂቴ።

¹⁷ኣቶቴꬅ ቢራታ ቆቤ ማላ ሁዔን ዎꬂቴ። ኣያና ጊꬃ ማሻ ኦይኪቴ፤ ሄሲካ ፆሳ ቃላ።

¹⁸ዎሳን ኣይ ሃኖንካ ኣያናን ዎሲቴ። ሄሳ ቆፒዲ ቤጊቴ፤ ኣማኒዛይታ ኡባ ጊሽ ቃንፆንታ ዎኣሲቴ።

¹⁹ታኒ ሚሺራቾ ቃላ ፁራ ኣሳስ ቆንጪሳናስ ዱና ዶዪዛ ኡባ ዎዴ ያሺ ባይንዳ ታ ፃላቴꬃን ዮታና ቃላይ ታስ ኢሜታና ማላ ታስ ዎሲቴ።

²⁰ታኒ ሚሺራቾ ቃላ ጊሽ ሳንሳላታን ቃሼታዳ ኪቴቲዳዴ ጊዲዳይ ሄሳሳ። ሄሳ ጊሽ ታ ዮታናስ ቤሲዛይሳ ባቦንታ ዮታና ማላ ታስ ዎሲቴ።

²¹ታ ኣይ ማላ ዲዛኮኔ ኣይ ኦꬂዛኮ ኢንቴ ኤራና ማላ ዶሴቲዳ ታ ኢሻይ ጎዳስ ኣማኔቲዳ ኦሳንቻይ ቲቂቆሲ ኢንቴስ ሃኒዳይሳ ዉርሲካ ኢንቴስ ዮታና።

²²ኢንቴ ኑ ሃኖቴꬅ ኤራና ማላኔ ኢንቴ ዎዝና ኢዚ ሚንꬄꬃና ማላ ታ ኢዛ ኢንቴኮ ዬዳዲስ።

²³ኣዋ ፆሳፌ፥ ጎዳ ዬሱስ ኪርስቶሳፔ ሳሮቴꬂኔ ሲቆይ ኣማኖራ ኢንቴስ ታ ኢሻታስ ጊዶ።

²⁴ጎዳ ዬሱስ ኪርስቶሳ ፓጬይ ባይንዳ ሲቂዛ ኡባስ ሳሮቴꬂ ጊዶ። ኣሚን።