ኤፌሶኔ 1

1

2

3

4

5

6

¹ፆሳ ሼኔ ማላ ዬሱስ ኪርስቶሳ ሃዋሬ ጊዲዳ ጳዉሎሳፔ። ዬሱስ ኪርስቶሳን ዲዛ ኣማኔቲዛይታስ ኤፌሶኔን ኣማኒዛ ኣሳስ።

²ኑ ኣዋ ፆሳፌኔ ጎዳ ዬሱስ ኪርስቶሳፔ ኪያቴꬂኔ ሳሮቴꬂ ኢንቴስ ጊዶ።

³ኑ ጎዳ ዬሱስ ኪርስቶሳ ባጋራ ሳሎን ኣያና ኣንጆ ኡባን ኑና ኣንጂዳ ጎዳ ዬሱስ ኪርስቶሳ ኣዋይ ፆሲ ኣንጄቶ።

⁴ኑ ኢዛ ሲንꬃን ጌሺኔ ዎሶይ ባይንዳይታ ጊዳና ማላ ቡሮ ኣላሜይ ሜꬌታናፔ ካሴ ባ ሲቆን ኪርስቶሳ ባጋራ ኑና ዶሪዴስ።

⁵ዬሱስ ኪርስቶሳ ባጋራ ኑ ኢዛ ና ጊዳና ማላ ባ ሎዖ ቆፋን ኮይሮ ዉርሲ ዎꬂዴስ።

⁶ሄሲካ ባ ዶሲዛዴ ባጋራ ጮ ሜላ ኑስ ኢሜቲዳ ቦንቾ ኪያቴꬃይ ጋላቴታና ማላ።

⁷ፆሳ ኣꬎ ኪያቴꬃ ዱሬቴꬃፌ ዴንዶይሳን ዬሱሳ ሱꬃን ዎዜቲዲ ናጋራፔ ኑ ማሬቲዶስ።

⁸ኢዚ ባ ኪያቴꬃ፥ ሂላቴꬃኒኔ ኤራቴꬅ ኡባን ኑ ቦላ ኬሂ ዳርሲዴስ።

⁹ፆሲ ቆፒዳ ፁራ ባ ቆፋ ኪርስቶሳ ባጋራ ባ ሎዖ ቆፋ ማላ ኑና ኤሪሲዴስ።

¹⁰ቡሮፔ ዎዴ ዉርሴꬃን ሃናናስ ዲዛ ኢዛ ቆፋይ ሳሎ ቦላኔ ቢታ ቦላ ዲዛይታስ ኡባስ ሁዔ ጊዲዳ ዬሱስ ኪርስቶሳፔ ዉርሲ ጋርስ ኣꬃናሳ።

¹¹ዉርሲካ ባ ሼኔ ማላ ኦꬂዛ ኢዛ ሼኔን ኮይሮካ ኢዚ ቆፒ ዎꬂዳይቲ ኑኒ ኢዛን ዶሬቲዶስ።

¹²ኑኒ ካሴቲዲ ኪርስቶሳ ባጋራ ኤካና ጊዲ ኡፋይሳን ናጊዛይቲ ፆሳ ቦንቾ ጋላታን ቆንጪሳናሳ።

¹³ኢንቴካ ቃሴ ቱማ ቃላ ሄሲካ ኢንቴና ኣሺዛ ሚሺራቾ ቃላ ሲይዲ ኪርስቶሳን ኣማኒዴታ። ኢዛ ኣማኒዲ ካሴ ኢሜታና ጌቴቲዳ ፂሎ ኣያና ማታሜን ኣታሜቲዴታ።

¹⁴ሄ ኣያናዚካ ኢዛ ቦንቾ ጋላታን ቆንጪሳና ማላ ፆሲ ኤራይስ ጊዲዳይታ ኡባታ ዎዛና ጋካናስ ኑ ላታስ ኦይꬆ።

¹⁵ሄሳ ጊሽ ኢንቴ ጎዳ ዬሱሳ ኣማኒዳ ጊሺኔ ኣማኒዛ ኣሳ ኢንቴ ሲቂዛይሳ ታ ሲዮሳፔ ሃ ሲሚን ኢንቴና ቆፓ ቆፓ ኤካዳ ታኒ ታ ዎሳን ኢንቴ ጊሽ ፆሳስ ጋላታ ሺሾ ኣጋቤይኬ።

¹⁷ቦንቾ ኣዋ ጊዲዳ ኑ ጎዳ ዬሱስ ኪርስቶሳ ኣዋ ፆሳ ኢንቴ ሎዔꬂ ኤራና ማላ ቆንጪሲዛ ኣያናይኔ ኤራቴꬃ ኣያናይ ኢንቴስ ኢሜታና ማላ ታ ኢንቴስ ፓጬይ ባይንዳ ዎሳይስ።

¹⁸ሄሳꬆካ ኢንቴ ኢዛን ፄይጌቲዳ ኡፋይሳይ ሄሲካ ኣማኒዛይታ ኣቻን ዲዛ ኢዛ ዱሬቴꬃይ ኣዛኮኔ ኢንቴ ኤራና ማላ ኢንቴ ዎዝና ኣይፌይ ፖዓና ማላ ዎሳይስ።

¹⁹ኑስ ኣማኒዛይታስ ኡባፌ ቦላ ጊዲዳ ኢዛ ዎልቃ ꬎቃቴꬅ ኢንቴ ኤራና ማላ ታ ዎሳይስ። ሄ ዎልቃይካ ኢዛ ጊታቴꬃ ሚኖቴꬃ ኦሶን ቤሲዳይሲ ሃይቆፔ ኪርስቶሳ ዴንꬂዲ ሳሎን ባ ኡሻቻን ኡቲሲዳ ኪርስቶሳ ባጋራ።

²¹ኣይሲዛይታፔ፥ ጎዳቴꬃፔ፥ ዎልቃፌኔ ካዎቴꬃፌ ቃሴካ ሃዒ ፃላ ጊዶንታ ቡሮፔ ያና ዎዴካ ጊዲን ሱንꬅ ኡባፌ ኢዚ ቦላ።

²²ፆሲ ሃራ ዉርሲ ኢዛ ቶሆፔ ጋርሳን ሃሪሲዴስ። ዎሳ ኬꬃንካ ኡባ ቦላ ሁዔ ኦꬂዴስ።

²³ዎሳ ኬꬂያ ኪርስቶሳ ኣሳቴꬃ። ሄ ኢዛካ ኡባሶን ኡባ ሚሽ ኩንꬂዛ ሄ ኢዛ ኩሜꬃ።