ኤፌሶኔ 3

1

2

3

4

5

6

¹ሄሳ ጌዶን ታ ጳዉሎሲ ኢንቴስ ኣማኖንታይታ ጊሽ ዬሱስ ኪርስቶሲ ቃቺዳዴ ጊዳዲስ።

²ታ ኢንቴና ጎዓና ማላ ፆሲ ኪያቴꬃን ታስ ኦሶስ ኤፃ ኢሚዳይሳ ኢንቴ ቱማፔ ሲዪዴታ።

³ሃይሳፌ ካሴ ታ ኢንቴስ ቃንꬃራ ፃፊዳ ማላ ታስ ቆንጪን ታ ኤራናስ ዳንዳዪዳ ፁራይ ሃይሳ።

⁴ሄሳ ጊሽ ኢንቴ ሄሳ ናባቢሼ ኪርስቶሳ ፁራ ታ ኣይ ማላ ኤሪዳኮኔ ኢንቴካ ኤራናስ ዳንዳዬታ።

⁵ሄ ፁራይካ ሃዒ ኣማኒዛ ሃዋሬታሲኔ ናቤታስ ቆንጪዳ ማላ ካሴ ቤኒ ኣꬊዳ ዎዴ ዲዛ ኣሳታስካ ቆንጪቤና።

⁶ሄሲ ሄ ፁራይ ኣይዛቤቲ ሚሺራቾ ቃላ ባጋራ ኢስራዔሌ ናይታራ ኢሲፌ ላቲዛይታ፤ ኢሲፌ ኢሳዴ ኣሳቴꬅ ማላ ጊዲዲ ዬሱስ ኪርስቶሳ ባጋራ ቤቲዳ ሂዶታ ኢሲፌ ጊሼቲ ላቲዛይታ ጊዳናሳ።

⁷ታካ ኢዛ ዎልቃ ኦሶ ማላ ታስ ኢሜቲዳ ፆሳ ኪያቴꬃ ኢሞታ ማላ ሃይሳ ሚሺራቾ ቃላ ኦሳንቻ ጊዳዲስ።

⁸ታ ቃስ ሃንኮ ኣማኒዛ ኣሳፔ ላፋ ጊዲኮካ ኦኒካ ዛዋይ ባይንዳ ኪርስቶሳ ዱሬቴꬅ ኣይዛቤታስ ሳባካና ማላ ፆሳ ኪያቴꬃን ሃይሲ ታስ ኢሜቲዴስ።

⁹ሄሳꬆካ ዉርሲካ ሜꬊዳ ፆሳን ቤኒ ዎዴ ቆቴቲ ዲዛ ፆኦሳስ ፁራ ቆፋይ ኣዛኮኔ ኡባስ ታ ቆንጪሳና ማላ ታስ ፆሳ ኪያቴꬂ ኢሜቲዴስ።

¹⁰ኢዛ ቆፋይ ሃዒ ዎዴ ዎሳ ኬꬃ ባጋራ ዱማ ዱማ ሜꬋይ ዲዛ ፆሳ ሂላቴꬂ ሳሎን ዲዛ ሃላቃታሲኔ ጎዳታስ ኤሬታና ማላ ሃኒዴስ።

¹¹ፆሲ ኑ ጎዳ ዬሱስ ኪርስቶሳ ባጋራ ሃይሳ ፖሊዳይ ሜርና ባ ቆፋ ማላ።

¹²ኑኒ ኢዛይታ ጊዲዳ ጊሺኔ ኢዛን ኣማኒዳ ጊሽ ጌሻቴꬃራኔ ሂርጋይ ባይንዳ ኑኒ ፆሳኮ ሺቃና ዳንዳዮስ።

¹³ሄሳ ጊሽ ኢንቴ ቦንቼታና ማላ ታኒ ኢንቴ ጊሽ ታ ቦላ ጋኪዳ ዋዬዛን ኢንቴ ኡፋይስ ቃንፆንታ ማላ ታ ኢንቴና ሃዳራ ጋይስ።

¹⁴ሄሳ ጊሽ ታኒ ፆሳ ሲንꬃን ጉልባታይስ።

¹⁵ሳሎን ዲዛይኔ ቢታ ቦላ ዲዛ ኢዛሶ ኣሳይ ዉሪካ ኢዚ ሱንꬂን ሱሜስ።

¹⁶ኢንቴ ጋርሳ ባጋራ ሚናና ማላ ኣያና ባጋራ ኢዛ ቦንቾ ዱሬቴꬃይ ኢንቴስ ኢሜታና ማላ ታ ዎሳይስ።

¹⁷ሄሲካ ኪርስቶሲ ኢንቴ ዎዝናን ኣማኖን ዳና ማላኔ ቃሴካ ኢንቴ ኢዛን ፃጲዲ ሲቆን ሚናና ማላ።

¹⁸ኪርስቶሳ ሲቆስ ኣሆቴꬃይ፥ ኣዱሳቴꬃይ፥ ꬎቃቴꬃይኔ ጪማቴꬃይ ኣይ ጊናኮ ኢንቴ ኣማኒዛ ኣሳ ኡባራ ኢሲፌ ሻኪ ኤራና ማላ።

¹⁹ኢንቴ ፆሳ ኩሜꬃራ ሻኪ ኤሪዲ ኢዛን ኩሜꬅ ጊዳና ማላ ኣሳ ኤራፔ ቦላ ጊዲዳ ኪርስቶሳ ሲቆ ኢንቴ ኤራና ማላ ታ ዎሳይስ።

²⁰ሄሳ ጊሽ ኑ ጊዶን ኦꬂዛ ባ ዎልቃ ጊና ኑ ዎሲዛይሳፌኔ ዎይኮ ኑ ቆፒዛይሳፌ ኡባፌ ቦላራ ኬሂ ዳርሲ ኦꬃናስ ዳንዳዪዛ ፆሳስ፥

²¹ዎሳ ኬꬃን ቃሴካ ዬሱስ ኪርስቶሳ ባጋራ ዎዴ ኡባን ሜርናፔ ሜርና ጋካናስ ኢዛስ ቦንቾይ ጊዶ። ኣሚን።