ኤፌሶና 5

1

2

3

4

5

6

¹ሲሚ ፆሳይ ሲቂያ ናናቱዋዳን፥ ኣ ማላቲቴ።

²ቃሲ ኪሪስቶሲ ኑና ሲቂዴ፥ ባሬ ሁጲያ ፆሳው ናሼቺያ ያርሹዋዳኒኔ ኢሞታ ኡዲዴ ኢሜዳዋዳን፥ ሂንቴካ ሲቁዋን ዴዓናው ቤሴ።

³ሺን ፆሳ ናናው ቤሲያዋዳን፥ ሂንቴ ጊዶን ዎሹሚያዌኔ ቱናቴꬃ ኡባይ፥ ዎይ ሚሻ ኣሞቲያዌ ሙሌካ ሲሴቶፖ።

⁴ዬላዪያዌኔ ኤያ ሃሳያይ ዎይ ፓꬄና ቂꬊ ሂንቴንቶ ቤሴናዋ ጊዲያ ዲራው፥ ሂንቴ ማታን ኡባካ ዴዖፖ፤ ሂንቴ ሄዋ ኡባ ኣጊዴ፥ ፆሳ ጋላታናው ቤሴ።

⁵ሃዋ ኤሪቴ፤ ኦኒኔ ዎሹሚያዋ ዎይ ቱናባ ኦꬂያዋ፥ ዎይ ሚሻ ኣሞቲያዋ ጊዶፔ፥ ኪሪስቶሳ ካዉቴꬃኔ ፆሳ ካዉቴꬃ ላታናው ዳንዳዬና፤ ሚሻ ኣሞቲያዌ ኤቃው ጎዪኒያዋፔ ዱማቴና።

⁶ሂንቴና ኦኒኔ ፓꬄና ሃሳያን ጪሞፖ፤ ኣዪሲ ጎፔ፥ ሃዋ ጋሱዋን ፆሳ ሃንቁ ኣዛዜቴና ኣሳ ቦላ ያና።

⁷ሲሚ ሄዋ ማላ ኣሳና ዙፔቶፒቴ።

⁸ኣዪሲ ጎፔ፥ ካሴ ሂንቴ ꬉማኒ ዴዔዲታ፤ ሺን ጎዳ ባጋና ሃዒ ፖዑዋን ዴዒታ፤ ፖዑዋን ዴዒያ ኣሳዳን ፖዑዋን ሃሜቲቴ።

⁹ኣዪሲ ጎፔ፥ ፖዑ ሎዖቴꬃ፥ ፂሎቴꬃኔ ቱማቴꬃ ኡባ ኣዪፌ።

¹⁰ጎዳ ናሼቺያባይ ኣዬንቶ ታማሪቴ።

¹¹ጎዒ ባዪና ꬉማ ኦሱዋ ቆንጪሲ ቤሲቴፔ ኣቲን ኣናና ዋላኬቶፒቴ።

¹²ኡንቱንቱ ጌማን ኦꬂያዌ ሃራይ ኣቶ ሃሳዪያዌካ ፖኬ።

¹³ሺን ኡባባይ ፖዑዋ ኬሲያ ዎዴ፥ ቆንጪያን ቤታና፤ ኣዪሲ ጎፔ፥ ቆንጪያን ቤቲያ ኡባባይ ፖዑዋ።

¹⁴ሄዋ ዲራው፥ «ጌሚዒሺያዎ፥ ቤጎታ፤ ሃዪቁዋፔካ ዴንዳ፤ ኪሪስቶሲ ኔው ፖዒሳናዋ» ያጌ።

¹⁵ሲሚ ሂንቴ ዋኒ ዴዒንቶ ኣኬኪቴ፤ ኣꬌዳ ኤራቴꬃና ዴዒያ ኣሳዳን ዴዒቴፔ ኣቲን፥ ኣꬌዳ ኤራቴꬃይ ባዪና ኣሳዳን ዴዖፒቴ።

¹⁶ዎዲ ኢታ ጊዲያ ዲራው፥ ሂንቴ ዎዲያ ሂንቴው ዳንዳዬቶዋዳን ሎዖቴꬃው ጎዔቲቴ።

¹⁷ሄዋ ዲራው፥ ጎዳይ ኮዪያዌ ኣዬንቶ ኣኬኪቴፔ ኣቲን፥ ኤያ ጊዶፒቴ።

¹⁸ቃሲ ሂንቴናን ጌሻ ኣያናይ ቃንፄናን ኩሞፔ ኣቲን፥ ሂንቴና ባዪዚያ ዎዪኒያ ጊያ ኤሳ ኡሺዴ ማꬆቶፒቴ።

¹⁹ማዚሙሪያ ዬꬃን፥ ጋላቲዴ ዬፂያዋኒኔ ኣያና ዬꬃን ኢቱ ኢቱዋና ሃሳዪቴ፤ ቃሲ ጋላቲያ ዬꬃኒኔ ማዚሙሪያ ዬፂያዋን ሂንቴ ዎዛናን ጎዳ ጋላቲዴ ዬፂቴ።

²⁰ኑ ጎዳ ዬሱሲ ኪሪስቶሳ ሱንꬃን፥ ኣዉዋ ፆሳ ኡባባው ኡባ ዎዴ ጋላቲቴ።

²¹ኪሪስቶሳው ያዪዴ፥ ኢቱ ኢቶ ሞዴቲቴ።

²²ማቼቶ፥ ጎዳው ሞዴቲያዋዳን፥ ሂንቴ ኣሲናው ሞዴቲቴ።

²³ኣዪሲ ጎፔ፥ ኪሪስቶሲ ቃሲ ዎሳ ጎሌው ሁጴ ጊዲያዋዳን፥ ኣሲናይካ ባሬ ማቻቲው ሁጴ፤ ቃሲ ኪሪስቶሲ ባሬ ሁጲያን፥ ባሬ ቦላ ጊዲያ ዎሳ ጎሊያ ኣሺያዋ።

²⁴ሺን ዎሳ ጎሊ ኪሪስቶሳው ሞዴቲያዋዳን፥ ማቼቱ ቃሲ ባሬንቱ ኣሲናው ኡባባኒ ሞዴታናው ቤሴ።

²⁵ኣሲናቶ፥ ኪሪስቶሲ ዎሳ ጎሊያ ሲቂዴ፥ ባሬ ሁጲያ ኢዚው ኢሜዳዋዳን፥ ሂንቴካ ሂንቴ ማቻቱዋ ሲቂቴ።

²⁶ኢ ዎሳ ጎሊያ ባሬ ቃላኒኔ ሃꬃን ሜጪ ጌሺዴ፥ ፆሳው ዱማያናው ሃዋ ኦꬄዳ።

²⁷ኪሪስቶሲ ዎሳ ጎሊያ ቂታይ ዎይ ዴሙዋ ጪꬊሲያዌ ዎይ ሄዋ ማላቲያዌ ባዪናን፥ ኣ ኩሜንꬃ ቦንቹዋና ጌሻኔ ቦሬቴናዋ ኡዲዴ፥ ባሬ ሁጴው ሺሻናው ኮዬዳ።

²⁸ሲሚ ቃሲ ኣሲናይ ባሬ ማቻቶ ባሬ ቦላዳን ሲቃናው ቤሴ፤ ባሬ ማቻቶ ሲቂያዌ ባሬና ሲቄ።

²⁹ኣዪሲ ጎፔ፥ ባሬ ቦላ ኢፂያ ኣሳይ ሙሌካ ባዋ፤ ሺን ኪሪስቶሲ ዎሳ ጎሊያ ሙዚያዋዳኒኔ ናጊያዋዳን ኦኒኔ ባሬ ቦላ ሙዜኔ ናጌ።

³⁰ኣዪሲ ጎፔ፥ ኑኒ ኣ ቦላ ዱማ ዱማ ኣሳቴꬃ።

³¹ፆሳ ማፃፋይ፤ «ሄዋ ዲራው፥ ኣቱማዌ ባሬ ኣዉዋኔ ባሬ ዳዮ ኣጊዴ፥ ባሬ ማቻቲና ኢቲፔ ዴዓና፤ ኡንቱንቱ ላዑካ ኢቲ ኣሹዋ ጊዳና» ያጌ።

³²ሃ ፁራይ ዎልቃማ ቱማቴꬃ፤ ሺን ታኒ ሃዌ ኪሪስቶሳባኔ ዎሳ ጎሊያባ ኦዴ ያጋይ።

³³ጊዶፔካ፥ ቃሲ ኣሲናይ ሁጲያን ሁጲያን ማቺያ ባሬ ሁጲያዳን ሲቃናው ቤሴ፤ ማቻታካ ባሬ ኣሲና ቦንቻናው ቤሴ።