ኤፌሶና 1

1

2

3

4

5

6

¹ታኒ ፆሳ ሼኒያን ኪሪስቶሲ ዬሱሲ ኪቴዳ ጳዉሎሲ፥ ኤፌሶናን ዴዒያ ፆሳ ናናው ቃሲ ኪሪስቶሳ ዬሱሳው ኣማኔቲዴ ዴዒያዋንቶ ሃ ዳቢዳቢያ ፃፋይ።

²ፆሳ ኑ ኣዉዋፔኔ ጎዳ ዬሱሲ ኪሪስቶሳፔ ኣꬎ ኬካቴꬃዪኔ ሳሮቴꬃይ ሂንቴንቶ ጊዶ።

³ኣያና ኣንጁዋ ኡባን ኪሪስቶሳ ባጋና ቦላ ሳሉዋን ኑና ኣንጄዳ ፆሳ፥ ኑ ጎዳ ዬሱሲ ኪሪስቶሳ ኣዉዋ፥ ኑኒ ጋላቴቶ።

⁴ኑኒ ኣ ሲንꬃን ጌሻቱዋኔ ፖኩ ባዪናዋንታ ጊዳና ማላ፥ ፆሳይ ኑና ሳዓይ ሜꬌታናፔ ካሴ፥ ኪሪስቶሳ ባጋና ባሬ ሲቁዋን ዶሬዳ።

⁵ፆሳይ ባሬ ሼኒያን ባሬ ዶሴዳዋዳን፥ ዬሱሲ ኪሪስቶሳ ባጋና ኑና ባሬ ናናቱዋ ኦꬃናው ካሴቲዴ ቆፒ ዎꬄዳ።

⁶ፆሳይ ባሬ ሲቂያ ናዓ ባጋና ኑሲ ጮ ኢሜዳ ኣꬎ ኬካቴꬃ ቦንቹዋ ዲራው፥ ኑፔ ጋላታ ኣካናው ሄዋ ኦꬄዳ።

⁷ኑኒ ፆሳ ኣꬎ ኬካቴꬃ ዳሩዋዳን፥ ኪሪስቶሳ ሱꬃን ዎዜቴዶ፤ ሄዋን ፆሳይ ኑ ናጋራ ኣቶ ጌዳ።

⁸ፆሳይ ባሬ ኣꬌዳ ኤራቴꬃ ኡባኒኔ ባሬ ዎዛና ቆፋ ኡባን ባሬ ኣꬎ ኬካቴꬃ ኑሲ ዳሪሲዴ ኢሜዳ።

⁹ኣዪሲ ጎፔ፥ ፆሳይ ባሬ ቆፔዳዋ ኦꬄዳ፤ ቃሲ ኪሪስቶሳ ባጋና ፖላናው ቆፒ ዎꬄዳ ፁራ ዬዉዋ ኑና ኤሪሴዳ።

¹⁰ፆሳይ ዎዲያ ዉርሴꬃይ ጋኪያ ዎዴ ፖላናው ቆፔዳ ቆፋይ ኪሪስቶሳ ዋና ኡዲዴ፥ ሳሉዋኒኔ ሳዓን ዴዒያ ሜꬌታ ኡባ ኢቲፔ ኣኒ ሺሻናዋ።

¹¹ኡባባይ ፆሳ ቆፋዳኒኔ ኢ ጌዳዋዳን ሃኔዳ፤ ፆሳይ ካሴቲዴ ቆፒ ዎꬄዳዋዳን፥ ኪሪስቶሳ ባጋና ኑኒ ኣዋንታ ጊዳናዳን፥ ኑና ዶሬዳ።

¹²ኑኒ ካሴቲዴ፥ ኪሪስቶሳ ባጋና ኣካና ጊዴ ናሼቻን ናጊያዋንቱ፥ ፆሳ ቦንቹዋ ጋላቴቶ።

¹³ሂንቴዉካ ቃሲ ሄዋዳን ሃኔዳ፤ ቱሙ ኪታ፥ ሂንቴንቶ ኣቶቴꬃ ኣሄዳ ሚሺራቹዋ ቃላ፥ ሂንቴ ሲሴዳ ዎዴ ኪሪስቶሳ ኣማኔዲታ፤ ፆሳይ ሂንቴንቶ ኢማና ጌዳ ጌሻ ኣያና ባጋና፥ ሂንቴ ኣዋ ጊዲያዋ ኤሪሲያ ማታፋ ሂንቴ ቦላ ዎꬄዳ።

¹⁴ፆሳይ ባሬ ኣሳው ኢማና ጌዳዋ ኑኒ ላታና ጋካናው፥ ጌሻ ኣያና ዋሴቴꬃ ኦይቄዶ። ሄዌ ቃሲ ኣ ቦንቹዋሲ፥ ጋላታ ጊዳናዋ።

¹⁵ሄዋ ዲራው፥ ጎዳ ዬሱሳ ሂንቴ ኣማኒያዋኔ ጌሻቱዋ ኡባ ሂንቴ ሲቂያዋ ታኒ ሲሶዴፔ ዶማዴ፥

¹⁶ሂንቴንቶ ፆሳ ጋላቲያዋ ኣጋቤዪኬ፤ ፆሳ ዎሳዴ ሂንቴዉካ ዎሳይ።

¹⁷ቃሲ ጎዳ ዬሱሲ ኪሪስቶሳ ፆሳይ፥ ቦንቹዋ ኣዉ፥ ፆሳ ሂንቴ ኤራናዳን፥ ሂንቴና ኣꬌዳ ኤራንቻ ኦꬂያ ቃሲ ፆሳ ሂንቴንቶ ቆንጪሲያ ጌሻ ኣያና ሂንቴንቶ ኢማናዳን፥ ታኒ ዎሳይ።

¹⁸ፆሳይ ሂንቴ ኣካና ጊዴ፥ ናሼቻን ናጊ ኡቴዳዎ ሂንቴና ፄሴዳዋኔ ኢ ባሬ ኣሳው ኢማና ጊያ ኣንጁ ኣይ ኬና ዱሬንቶ ሂንቴ ኤራናዳን፥ ፆሳይ ሂንቴ ዎዛና ዶዪና፥ ኣ ፖዑዋ ሂንቴ ቤዓናዳን፥ ታኒ ፆሳ ዎሳይ።

¹⁹ቃሲ ኣ ኣማኒያ ኑናን ኣ ዎልቃይ ሎይꬂ ኦꬄ። ሃ ኑናን ዴዒያ ዎልቃይኔ ሃዪቁዋፔ ኪሪስቶሳ ዴንꬂዴ፥ ሳሉዋ ሳዓን ፆሳፔ ኡሼቻ ባጋና ኡቲሴዳ ዎልቃማ ዎልቃይ ኢቱዋ።

²¹ኪሪስቶሲ ሳሉዋ ሱንꬃቱዋፔ፥ ጎዳቴꬃይ ዴዒያዋንቱፔ፥ ዎልቃማቱዋፔኔ ጎዳቱዋ ኡባፔ ቦላ ጊዲዴ ሞዴ፤ ኢ ሃዒ ዴዒያ ዬሌታ ፃላላን ጊዴናን፥ ሲንꬃፔ ያና ዬሌታኒካ ሃራ ሱንꬃቴꬃ ኡባፔ ꬎቄ።

²²ፆሳይ ኡባባ ኪሪስቶሳ ጌዲያፔ ጋርሳን ሞዲሲዴ፥ ቃሲ ፆሳይ ኢ ኡባባኒ ኡባፔ ቦላና ጎዳ ጊዳናዳን፥ ዎሳ ጎሌው ኣ ኢሜዳ።

²³ዎሳ ጎሊ ኪሪስቶሳ ኣሳቴꬃ፤ ዎሳ ጎሊ ኪሪስቶሲ ኡባሳን ኡባባ ኩንꬂያ ኣ ፖሉዋ።