ሉቃሳ 2:4-41 - Ooratha Caaquwaa

ሉቃሳ 2:4-41

Click on verse(s) to share them!

⁴ዮሴፎካ ዳዊታ ጎሊያፔኔ ያራፔ ጊዲያ ዲራው ጋሊላ ኣዉራጃን ዴዒያ ናዚሬቴ ካታማፔ ዴንዲዴ ዳዊታ ካታማ ጊዴዳዉኒኮ ዪሁዳን ዴዒያ ቤቴሊሄሜ ጌቴቲያ ካታማ ኬሴዳ።

⁵ሄ ዎዴ ዬሊያ ዎዲ ማቴዳ ኣው ኦሼታ ኡቴዳ ማይራማካ ኣናና ኢቲፔ ባዱ።

⁶ኡንቱንቱ ሄዋን ዴዒሺን ኢዚው ዬሊያ ዎዲ ጋኪ ኣጌዳ።

⁷ኢዛካ ባይራ ናዓ ጊዴዳ ኣቱማ ናዓ ዬላዱ፤ ኢማꬃይ ሼምፒያሳ ዴማ ቤና ዲራው፥ ናዓ ማዩዋን ፃፃዴ ጋጳቲያን ቄራዱ።

⁸ሄ ጋዲያን ቃማ ባሬንቱ ዉዲያ ሄሚዴ ዴምባን ኣቂያዋንቱ ዴዒኖ።

⁹ፆሳ ኪታንቻይ ቆፔናን ዪዴ ኡንቱንቱ ሚዪያን ኤቄዳ፤ ጎዳ ቦንቹ ኡንቱንቱ ዩሹዋን ፖዔዳ ዎዴ፥ ዎልቃማ ያሻይ ኡንቱንታ ኦይቄዳ።

¹⁰ኪታንቻይ ኡንቱንታ፥ «ያዮፒቴ፥ ኣሳው ኡባው ሃኒያ ዳሮ ናሼቺያ ሚሺራቹዋ ታኒ ሂንቴንቶ ኣሃዲ።

¹¹ሃቼ ዳዊታ ካታማን ኣሺያዌ ዬሌቴዳ። ኢካ ጎዳ ኪሪስቶሳ።

¹²ሃዌ ሂንቴንቶ ማላ ጊዶ፡ ጋጪኖ ናዓይ ማዩዋን ፃፄቲዴ ጋጳቲያ ጊዶን ጊሴዳዋ ዴማኒታ» ያጌዳ።

¹³ቆፔናን ጮራ ፆሳ ኪታንቻቱ ኮይሮ ኪታንቻና ኢቲፔ ቆንጬዲኖ።

¹⁴ፆሳካ ጋላቲዴ፥ ሃዋዳን ጌዲኖ፡ «ቦንቹ ፆሳው ቦላ ሳሉዋን ጊዶ። ሳዓን ኢ ዶሲያ ኣሳው ሳሮቴꬃይ ጊዶ» ያጌዲኖ።

¹⁵ኪታንቻቱ ኡንቱንቱፔ ሻኬቲዴ ሳሉዋ ኬሶዋፔ ጉዬ፥ ዉዲያ ሄሚያዋንቱ፥ «ጎዳይ ኑሲ ቆንጪሴዳዋ፥ ሃዋ ሃኔዳ ዬዉዋ ቤዓናው ቤቴሊሄሜ ቦይቴ» ጌቴቴዲኖ።

¹⁶ኡንቱንቱካ ኤሌሊዴ ቤዲኖ። ማይራሞኔ ዮሴፋ ዴሚዴ፥ ጋጪኖ ናዓይካ ጋጳቲያን ጊሴዳዋ ቤዔዲኖ።

¹⁷ሄዋፔ ጉዪያን ጉꬃ ናዓ ዲራው ኦዴቴዳዋ ቆንጪሲዴ ኦዴዲኖ።

¹⁸ሃዋ ሲሴዳ ኡባይ ኡንቱንቱ ኦዴዳ ዬዉዋን ማላሌቴዲኖ።

¹⁹ማይራማ ቃይ ሃዋ ኡባ ባሬ ዎዛናን ኦይቃዴ ቆፓዴ ጋሚዓዱ።

²⁰ዉዲያ ሄሚያዋንቱካ ኡባ ዬዉ ኡንቱንቶ ኦዴቴዳዋዳን ሃኒና ዴሞ ዲራው፥ ሲሴዳዎኔ ቤዔዳዎ ኡባው ፆሳ ቦንቺዲኔ ጋላቲዴ ሲሜዲኖ።

²¹ናዓው ሆስፑን ጋላሳ ጊዲና ቃፃሬቲያ ዎዲ ጋኮ ዎዴ፥ ኢ ኣቲ ኡሉዋን ኣታናፔ ካሴ፥ ኪታንቻይ ኬሶ ሱንꬃን፥ ዬሱሳ ጌቴቴዳ።

²²ሙሴ ዎጋ ማራዳን ጌዪያ ዎዲ ፖሌቴዳ ዎዴ ዮሴፎኔ ማይራማ ጋጪኖ ናዓ ፆሳው ሼꬋናው ዬሩሳላሜ ኣኪ ቤዲኖ።

²³ሄዌኔካ ጎዳ ዎጋን፥ «ኣቱማ ናዓ ጊዴዳ ባይራ ናዓይ ኡባይ ፆሳው ዱማቴዳዋ ጊዳናዋ» ጌቴቲ ፃፌቴዳዋዳኒኔ፥

²⁴ቃሲካ ጎዳ ዎጋን፥ «ላዑ ዶጎማቱዋ ዎይ ላዑ ሃራጴ ማራቱዋ» ጌቴቶዋዳን፥ ጎዳው ያርሹዋ ያርሻናው ኣፌዲኖ።

²⁵ሄ ዎዴ ፂሎኔ ጌንጫ ጊዴዳ ሲሞና ጌቴቲያ ኢቲ ቢታኒ ዬሩሳላሜን ዴዔ። ኢካ፥ ኢስራዔሊያ ኣሳው ኣቶቴꬃ ሂዶታ ናጊያዋኔ ኣያና ጌሻይ ኣ ቦላን ሼምፔዳ ኣሳ።

²⁶ጎዳን ኦኬቴዳ ኪሪስቶሳ ቤዔናን ሃይቄናዋ ኣያና ጌሻን ኣው ቆንጪሴዳ።

²⁷ኢካ ሄ ዎዴ ኣያና ጌሻይ ካሌꬂና፥ ጌሻ ጎሊያ ጌሌዳ። ናዓ ዬላዋንቱ ኤሪያ ዎጋ ማራዳን፥ ኮሺያዋ ኣው ፖላናው ጉꬃ ናዓ ዬሱሳ ኦይቂዴ ጌሎ ዎዴ፥

²⁸ሲሞኔ ሞኪ ኣኪ ናዓ ኢዲሚዴ ፆሳ ጋላቲዴ ሃዋ ያጌዳ፡

²⁹«ጎዳው፥ ኔኒ ቃላ ጌሎ ማራዳን ሃዒ ታና ኔ ኣይሊያ ሳሩዋን ኔኮ ኣፋ።

³⁰ጋሱካ፥ ታ ኣይፋቱ ኣሳ ኡባ ሲንꬃን ኔኒ ጊጊሴዳ፥ ኣሺያ ሂዶታ ቤዔዲኖ።

³²ሄዌካ ኢስራዔሊያ ጊዴና ኣሳው ቆንጬꬃ ኢሚያ ፖዑዋ። ቃሲ ኔ ኣሳው ኢስራዔሌው ቦንቹዋ።»

³³ዮሴፎኔ ኣ ዳያ ኣ ዲራው ሃሳዬቴዳ ዬዉዋሲ ማላሌቴዲኖ።

³⁴ሲሞኒካ ኣንጂዴ ማይራሞ፥ «ሃዌ ናዓይ ኢስራዔሊያን ጮራቱዋሲ ዴንዱዋሲኔ ኩንዴꬃው ጋሶ ጊዳናው፥ ቃሲካ ኢታ ሃሳዪያዋንቱሲ ማላ ጊዳናው ዶሬቴዳ።

³⁵ጮራቶካ ዎዛና ቆፋይ ቆንጮዋ ጊዳናው፥ ኔ ሼምፑካ ማሻን ቃንፆዋዳን ሴሌታናዋ » ያጌዳ።

³⁶ቃሲካ ኣሴራ ያራፔ ጊዴዳ ፓኑዔላ ናታ ሃኖ ጌቴቲያ ናባታ ዴዓው፤ ኢዛካ ሎይꬃ ጪማዱ። ባሬ ዎዶሮቴꬃን ጌሌዳ ኣሲናና ላፑ ላይꬃ ዴዔዳዉኖ።

³⁷ኢዚ ላይꬃይካ ሆስፑን ታማኔ ኦይዱዋ ጊዳና ጋካናው ጋላሳኔ ቃማ ጌሻ ጎሊያፔ ሻኬቴናን ፆማኒኔ ዎሳን ኪቴታዴ ኣምዔ ጊዳዴ ጋሚዓዱ።

³⁸ሄ ዎዴካ ሺቃዴ ፆሳ ጋላታዱ፤ ቃሲካ ዬሩሳላሜ ኣሳይ ዎዜታናው ናጊያዋንቶ ኡባቶ ጋጪኖ ናዓ ዬሱሳባ ኦዳዱ።

³⁹ዮሴፎኔ ማይራማ ጎዳ ሂጊያን ኣዛዜቴዳዋ ኡባ ፖሎዋፔ ጉዬ ጋሊላ ኣዉራጃን ዴዒያ ባሬንቱ ካታማ ናዚሬቴ ሲሜዲኖ።

⁴⁰ጉꬃ ናዓይካ ዲጪዴኔ ሚኒዴ ቤዳ፤ ኣꬎ ኤራኒካ ኩሜዳ፤ ፆሳ ኣꬎ ኬካቴꬃይ ኣቦላን ሼምፔዳ።

⁴¹ዮሴፎኔ ማይራማ ላይꬃን ላይꬃን ፓሲጋ ባላ ቦንቻናው ዬሩሳላሜ ካታማ ቢኖ።